Read BIBILLYA Mareiyo Meele a Iruva VALETI 15 Bible Online

VALETI 15 - BIBILLYA Mareiyo Meele a Iruva bible

VALETI 15

¹Naasa elyi numa kyeeri kya fimu fya nganu, Samson kandesaiya nka yeto wakwe, keenda eerye mburu, kaammba, “Mmbo nshaangaa efo mmba kwa nkaakwa.” Lyo ndeye-a-nka kalema.

²Ndeyaanka kammbia, “Yeny mmbo sheeishi mmbo kulemuswa deny nkyo kimaruma shanniinngya mbuya afo. A mwanawo kulollye ninsha ngota we ndi? Ipoo yeto nave we nkaa-fo ando a yeto.”

³Samson kammbia, “Tura yei yeny nshitiri mbese na Vafilisti-fo, mashika lyo nkuti shivavie ukasha.”

⁴Samson kakuboo kandetira mabarwe mayana araru, numa keeboo fimwii fya muro kafifinngya efo mikyeny ya vayo ivii ivii, kayaatyany muro.

⁵Kooka-fo kalekeyany mabarwe yoo akeera efo mareminy a nganu a Vafilisti, ekimaa yaatya muro, na miri ya mafura nayo ikaveeya.

⁶Naasa Vafilisti vakaammba, “A mbovi yeto alutannya indi?” Vakaammba, “Ni Samson yeto nkwe wa Mtimna mashika elyi ndeye aleniinngya nndu ungyi nka wakwe.” Nalyo Vafilisti vakandemamita nka yeto na ndeye na muro.

⁷Nawe Samson kavavia, kwakooya mwatana findo fya ngata yeyo nkuti neeny shimutaiye, shimandeny.

⁸Kavakaba nnu deny, kasoka kandekaa ando ngereko ya iwe itiri yaanga iniini kulya Elamu.

⁹Naasa Vafilisti vakarwa vakandemanya ulale kulya urukeny lwa Yuda fika Lehi.

¹⁰Vandu va Yuda vakaammba, “A nkyiki elyi mukunndye ikabana neese?” Vakaammba, “Mmbo lwasha naambo lusheavika Samson, luntannye shaasa nawe alelutannya yese”.

¹¹Llyo vandu fiku firaru va Yuda valesoka na kulya Elamu yaangeny lya iwe, vakandevia Samson, “Kwiishi-se sheelyi Vafilisti mmbo valushillye? A nkyoki yewe kulevatannya?” Nawe kavavia, “Shaasa valeshitannya wo, niindo neeny shilevatanya-wo.”

¹²Naasa Vayuda vakammbia, “Yese mmbo lwasha lushekwaavika neekurammbikya Vafilisti.” Samson kavavia, “Shilyiyyeny mboo sheelyi mmushiwaa yeni muveni-fo.”

¹³Vakammbia, “Nkisha, lyo mmbo lukwiinivaa deny, lukurambikye kwawo; lyo yese llukuwaa-fo.” Naasany vakamfinga na fyoove fivii fiyya, vakamuuta efo iweny eekai.

¹⁴Kyeeri Vafilisti vellollya efo Lehi vakoongora woose. Nalyo mumuyo wa Nndumi Iruva ukansheya na finya nnu, na fyoove filya ekeemfinge nafyo fikeelela fikava sha ngatani yakorwa na muro, nafyo fikaangarya yoo si.

¹⁵Naasa Samson kalollya iffwa lya yuundu lya nshungu, kalyiipoo neekapa nalyo vandu kyiku.

¹⁶Samson kaammba, “Ni iffwa lya nshungu shilekaba nalyo vandu kyiku, Shavafwafwala vakakuumbya nguru nguru.”

¹⁷Eekimaa irera keera iffwa llya lya nshungu efo, nang'u ando alya akavaangwa Ramath-lehi.[2]

¹⁸Nalyo Samson kaakuka nnu, kavaanga Nndumi Iruva kaammba, “Yewe mmbo kukeeluniinga ukiro wokony lwa nsero wafo, neeny ulaalu mmbo shiifo shiwaawaa nnyura, shitirwa ulaalu mmbandu valaishi Iruva.”

¹⁹Nawe Nndumi Iruva karauwa yoo si yoo Lehi, mura ukarukau, nawe Samson ekimaa ina, kawuiyo mmuu, kafura, nang'u ando allya akavaangwa, Enhakore, nang'u mmbo kulollyo alya Lehi fika inu.

²⁰Nawe kava mwileta Israeli ando a myaaka makumi avii kyeeri Vafilisti veetiri ushillyi.