Read BIBILLYA Mareiyo Meele a Iruva VALETI 16 Bible Online

VALETI 16 - BIBILLYA Mareiyo Meele a Iruva bible

VALETI 16

¹Nalyo Samson keenda Gaza, nafo kakooya-fo nka wa shia kaanga kwakwe.

²Naasa vandu va Gaza vakafityo mbony sheelyi Samson mfo akai. Vakaringitya muri, vakalaaya kio tararaa yoo ngiriny ya muri veemalallye sau, veeshaammbaa, “Lwiirishe yaa fika ngama, lummbwae.”

³Samson kalala fika kio nnang'ani, kakupoo, katira mwaango wa ngiri na fisingiti fya vayo, kafiillwa ando amwi na firingisyo fya vayo, kavika meeveu, keenda kandefika uroron lwa ifumbu lyilya lyiiduvani na Hebron

⁴Numa ya vayo kakunda nka umwi wa kulya imungony lya Soreki avaangwaa Delila.

⁵Vasongoru va Vafilisti vakasora nka yeu vakammbia, “Nkyelelemmba Samson-te nakuvie kundo ootye finya yeto takwe, nakuvie na kindo kishiidimaa immbinga, naambo lundemfinga neelyisa ukiva, neese lukuniinge wo umwi weeru fesa kyiku na iyana.”

⁶Naasa Delila kandevia samson, “Mmbo shakutereva kushivye kundo kuutye finya yeto, kushivie na kindo kishiidimaa ikuvinga, kwiidimi ifingwa kulyiswa ukiva.”

⁷Samson kammbia, “Kwakooya shafingwa na fiwoye fivisi mfungare filandefinge kindo, uyo shisyaa finya, shivake vandu vengyi.”

⁸Llyo vasongoru va Vafilisti valemweengye fiwoye fivisi mfungare, nawe kamfinga nafyo. Nawe Delila mmbo emmaata vandu efo mmba, vaovye-fo.

⁹Naasa Delila kavia Samson, “Ekakawo Vafilisti.” Nawe na lyimwi nsi karummbwa fiwoye filya sheelyi muro urumbwaa uruu lwa soori. Nkyo mmbalemanya nta kundo ootye finya-fo.

¹⁰Naasa Delila kavia samson, “Mmbo kwashilemmba a mmbo kufingwa neekyi?”

¹¹Kammbia, “Vakanshifinga na fiwoye filandefinge kindo, mmbo shisyaa finya shive sha vandu vengyi.”

¹²Nalyo Delila keeboo fiwoye fiiya kamfinga nafyo, kammbia, “Ekakawo Vafilisti vakeesha.” Nawo valya vekeellaya vaka ovya efo mmba. Nawe kuruttwa fiwoye filya sheelyi nndu aruttwaa uruu.

¹³Delila kavia Samson, Lola-da kwanshilemmba lyingyi, nkyeshiviany kindo kishiidimaa ikufinga? Nawe kammbia, kwakooya kwafingu fii eti takwa na soori,

¹⁴Naasa kakibya misumari, kammbia, Ekakawo Vafilisti vakeesha. Nawe kooka rony, keelwa misumari neerummbwa soori ilya.

¹⁵Naasa nkeeto kammbia, “A mmbo kushaammbaa inda” Shikukunndye nato nrima wafo ulakee neeny? Mmbo kwanshilemmba kararu sele nta kulashivye kundo finya yafo yuukye.

¹⁶Naasa kimmba emmwiima kiimuya kimaruma kya marero meengyi wo nkonu, nrima wakwe nkarovyo nnu, neelollya usutu.

¹⁷Nalyo kammbia fyoose efyo eishi, eshaammbaa, “Weembe llulebaani nrwe wakwa-fo, mashika elyi shikee wa Kyaasa kwa Iruva uka elyo shilandewonike. Nkyo kwakooya shootwa nrwe na finya takwa mmbo tisyaa shive sha vandu vengyi.”

¹⁸Naasa Delila eekilollya ammuvia fyoose efyo fyekee nriminy wakwe, karuma nndu nandevaanga vasongoru va Vafilisti, kavavia, Nkyeoshony lyimwi nsi ulaalu mashika nndu ulya anshivia findo fyakwe fyoose. Llyo vasongoru va Vafilisti valeenda veerye fesa tilya.

¹⁹Nawe Delila kalelembya Samson yoo ng'undeny yakwe karekya rony, nawe kavaanga nndu kashemuutya-u nrwe, kansisika na finya takwe tikamuuka,

²⁰Llyo alemmbia, “Samson-ro, ekakawo Vafilisti veefo vakusheyaa.” Naasa kookya ron kakusara mmbo ashiiraa na poo sha mikonu ingyi, nakoorwe, Llyo nalamanyi sheelyi Nndumi Iruva ammaa imwiiyama.

²¹Vafilisti vakantira vakamwiillwa miso, vakandensota na kulya Gaza vakamfinga na minya idodorye, vakambika kundo avaseyaa nganu.

²²Lyo fii takwe tikapooka imya lyingyi.

²³Vafilisti vakakusang'irya naambo vasheutya iruva lyawo Dagoni kiraso, vakafura nnu, vakaammba iruva weeru mmbo ambika nkiduva weeru maakony eru.

²⁴Veekillollyo vakarumisha iruva lyawo vakaammba, “Iruva weeru allurambikya nkiduva yeu weeru, na mmbwe alerumata uruka lweru neewaa vandu veengyi.”

²⁵Veekapaa ukoru indo, vakaammba, “Luvaangyeny Samson nashelufinnya mmbasa-te.” Vakoota Samson kulya kifingyony, naambo nashefina, kavikwa nnangani ya ngo ivii.

²⁶Samson kavia nsoro yeto eenrye woko, “Nkyesheekya-te naambo shipaane ngo ta mmba yei, shikwanamire nato.”

²⁷Mmmba yeyo mmbo yeeishwe vandu, womi na vaka, na vasongoru woose va Vafilisti, neefo kai naafyo, mmbo kweefo vandu fiku firaru womi na vaka, veelolaa elyi Samson eefo afinaa.

²⁸Naasa llyo Samson kavaanga Nndumi Iruva, kammbia, “Woi Nndumi Iruva, kulashire, shakutereva, shaambika finya, shakutereva, tura yei sheni nsi, Woi Iruva wakwa naambo shikooye itaiya Vafilisti yeva kiduva kimaruma kya miso akwa yaa.”

²⁹Nalyo Samson katira ngo yeto teesiiki mmba yeyo, kakwaamira nato na finya eetiri imwi na woko elu neengyi na woko elu lungyi.

³⁰Samson kaammba, “Ra shifwe na Vafilisti yeva deny,” Kakwiinyika na finya toose, kakuna mmba ilya ikawoya vasongoru valya na vandu valya woose veefo. Na vandu yewo alevawaa kyeeri ekyi vakailannya valya alewaa kyeeri kya muu wakwe kyoose.

³¹Nalyo vandu va kwakwe na va kwa ndeye vakasoka indemoonndwa, vakandenndika ando a ndeye Manoa eerika kulya Sora ya Eshtaoli. Samson mmbo aleva mwiileta Israeli ando a myaaka makumi avii.