Read BIBILLYA Mareiyo Meele a Iruva VALETI 17 Bible Online

VALETI 17 - BIBILLYA Mareiyo Meele a Iruva bible

VALETI 17

¹Kyeeri ekyi mmbo kweefo nndu umwi evangwaa Mika wa kulya urukeny lwa mafumbu lwa Efraimu,

²nawe kavia maye, “Fesa eto tafo kyiku na iyana tileewa, neewe kwadenga shiitye, fesa yeto lola ni yeny shilatiipoo.” Maye kaammba, “Nndumi Iruva nakuvikye mbora mwanakwa.”

³Nawe kaviirya maye fesa eto kyiku na iyana. Nawe maye kaammba, “Fesa eti mmbo shatiniingya deny tive kiraso kwa Nndumi Iruva, tuuke maakony akwa deny, na mwanaakwa nakae kipwa, nato tisongosye ifwanu lyeepasha, nkyo mmbo shatikuviirya yewe.”

⁴Maaye ekimmbiirya fesa eto, maaye kootany fesa mayana avii, karuuya mwiitana fesa, kasongosya ifwanu lyeepasha, na ya yuummba, tikavikwa mmba kwa Mika.

⁵Nawe Mika yeu mmbo eetiri mmba ya maruva a mafwanu na umwi wa vana vakwe kava nkohani wa maruva yoo.

⁶Kyeeri ekyi efo Israeli nkweefo mangyi-fo, wo nndu kakutannya shaasa akukunndya we muni.

⁷Nalyo kyeeri ekyi kukavekaa-fo nndu umwi nkoo Llevi wa mmba ya Yuda wa kulya Betlehemu ya Yuda, kakaa kundo kweny,

⁸Nndu yeu kooka muriny wa Betlehemu ya Yuda kanderwa ifumbu lya Efraimu kashefika mmba kwa Mika.

⁹Nawe Mika kammbesa. “A kukee wa kwi?” Nawe kammbia, “Mmbo shike Llevi wa Betlehemu ya Yuda, neeny mmbo shikeruuya ando koose avaa ikaa.”

¹⁰Nawe Mika kammbia, “Kukaye kwakwa mbee, kuve nde na nkohani wakwa, neeny shikutae fesa ikumi wo mwaaka, ando amwi na soori na shoonga.

¹¹Nawe Llevi yeto kakaa kwakwe.”

¹²Naasa llyo Mika alerambikya nndu yeu nkoo ishora lya ukohani yelo kakaa kwakwe.

¹³Nalyo Mika kaammba, “Ulaalu shammanya Nndumi Iruva anshiirikya elyi shammbonisa Llevi muni nave nkohani wakwa.”