Read BIBILLYA Mareiyo Meele a Iruva VALETI 19 Bible Online

VALETI 19 - BIBILLYA Mareiyo Meele a Iruva bible

VALETI 19

¹Naasa kyeeri ekyi Vaisraeli valatiri mangyi, kweefo Llevi umwi eeke efo urukeny lwa mafumbu lwa Efraimu nawe keepoo nka kishinga kulya Betlehemu ya Yuda.

²Nka yeto kalanga iwuya kwa ndeye elyi aleswa na mmi, kandekaa-fo ando a miiri iina.

³Nalyo mmi kandensora-fo, na ndellelemba naambo nawuye, keenda we na ishinga lyakwe na mishungu ivii, nawe nkeeto kammbwarya efo mmba kwa ndeye. Nawe ndeye kafura nnu illollya.

⁴Nalyo ndeye wa nkaakwe kamwiisima, nawe kakaa kwakwe mikonu iraru, veelyaa neena.

⁵Kufike nkonu wa kaana vakakwiipoo ngama nraasi naambo veende. Lyo ndeye-a-nka kammbia, “Fweera nrimate kulye mbele shoonga shinnyo, kweendeny.”

⁶Naasa vakakaa rembo vakalya shoonga ilya. Naasa ndeye wa nka eto kavia Llevi yeto, “Kukaye kweru nkonu piti, kwiimuye-te.”

⁷Naasa kwiikikya kakuboo neende, lyo ndeya-a-nka kamwiisima, kalala lyingyi-da.

⁸Naasa elyi kwamfika nkonu wa karaanu kakuboo naambo neende, lyo ndeye kammbia-se, “Fweera nrima shakutereva, kaa kweru fika nsanyiny, kakaau vakalya shoonga.”

⁹Naasa eekikuboo we na nka na ishinga lyakwe, ndeye-a-nka kavemmbia-se, “Ulaalu mmbo kwamfika nkwaany, lala lyingyi, naambo kwiimuye, ndesi llyo mweende nraasi.”

¹⁰Lyo Llevi yeto nnyalekunda ilala lyingyifo, kakuboo keenda kandefika muri wa Yebus (nto Yerusalemu) ando amwi na mishungu yaawo,

¹¹Vafika kufii na muri wa Yebusi nkwekifo nsanyiny-fo, ishinga llya lyikavia nndumi wakwe, “Nndeny lwaange neefo muriny, lulale-fo.”

¹²Nawe kammbia, “Llushaangaa muriny wa vandu lulaveeshi-fo, valakee Veesireeli, lweende lundekooya Gibea.”

¹³Kawuya kavia ishinga llya lyakwe, “Nndeny lusore miri yeyo ikee mbee yeeru, lundelala Gibea ao Rama.”

¹⁴Vakeenda na mbee, kukeela vekee kufii na Gibea, nato mmuri wa Benyaminy.

¹⁵Nalyo vakeenda neefo muriny vandelala-fo. Vakashesalala yoo shieny ya yaanga neefo muriny, lyo kulakae-fo nndu akunda ivawarya nafo.

¹⁶Elyi vaiyoo indo kukandesha nndu umwi nkuu, akuukya nreminy nkwaany, Nawe nndu yeu ekee wa efo Efraimu, kava muny efo Gibea. Lyo vandu va vayo vakava Vabenyamin.

¹⁷Naasa mmiku yeu kalollya Llevi yeu, kammbesa, “Nkwi kooka, neewe nkwi kukeenda?”

¹⁸Mmbo looka Betlehemu ya Yuda, lwiire yaa lweende uruka lwa mafumbu lwa Efraimu, shindefika ando a yiinndya Iruva. Lyo llwandewona nndu mwiiluwarya kwakwe-fo.

¹⁹Neese lyo lurye mare a nshungu, na nkate na mfinyo-da, fyalumaa shaasa lukai, lluturye kindo-fo.

²⁰Mmiku yeto kammbia, “Wuiyo mmu, neefyo fya kwaanguya kusheonisaa kwakwa, oshony kwakwa.”

²¹Naasa kavarwaa kwakwe, kavasangya marende, vakalya na shoonga, na nshungu ukaniingwa mare.

²²Veefo valyaa na yiimuya, vakasha vandu varavi va efo muriny, vakaringitya mmba, vakakaba mwaango, vakavia muni mmba, “Ende nndu yeto aanga kwafo lulale nawe.”

²³Muni mmba kasomuka kavavia, “Oode nyiraa-kwa nkivaa indo-fo, mmbo shamutereva mulasheetana uravi lwa ngata yeyo-fo, mulasheetannya munyi wakwa kindo kya urung'ani sheekyo-fo.”

²⁴Yeny mmbo shitiri mwana wa kyika, na muny yeu atiri nka wakwe-da, reny shimusomutye muvatannye shaasa mwalollya muveni. Lyo muny yeu mmuntannyaa urung'ani yelo-fo.

²⁵Lyo vandu yewo mmbaleirikya-fo. Naasa nndu yeto kavasomutya nka yeto wakwe, nawo vakantefura kio kyoose. Kwiikyaa vakamweekeya neende.

²⁶Nawe nka yeto kasha nraasi kashewa yoo mwaangony wa mmba alya mmi eelele, maako akwe akabaana kisingiti.

²⁷Kyeeri kulekya mmi wakwe kakupoo naambo neende, paripari ekau nkaakwe nnyoo mwaangony alele.

²⁸Nawe kammbia, “Naasa, kwiipoo lweende, lyo nnyalenrerya-fo.” Nalyo kamwiipoo kankikisa yoo uwe ya nshungu. Keenda kandefika ando kulaiyoo nndu.

²⁹Eekianga mmba, keepoo kyaandu, karumbwa-rumbwa nka yeto wakwe, malungo lungo, akava ikumi na avii, kanderarata efo urukeny lwa Israeli koose.

³⁰Nalyo wo nndu alelollya kindo ekyo kaammba, “Eki nkilellollyo nta nkiletanyike-se uka elyo Israeli vauka Misri fika inu-fo! Nkyekusareny-dwa, mwaandwe, neerummbwa mwaandu!”