Read BIBILLYA Mareiyo Meele a Iruva VALETI 9 Bible Online

VALETI 9 - BIBILLYA Mareiyo Meele a Iruva bible

VALETI 9

¹Naasa Abimeleki mwana wa Gidioni, keenda Shekemu kwa vanavamaye va maye, karera na vandu woose yewo vaparikye efo kwa ndeye wa maye, kavavia,

²“Shamutereva nkyeveseny womi woose va Shekemu, Vai nkyoki kyikee kyisha kwany, ndesa ni vana yewo va Yerubaali woose vamushillye yeni ao ndesa ni ishillyo ni nndu umwi? Na kyingyi lyo kummbweny sheelyi yeny nsamu imwi neeni.”

³Llyo vafyari yewo va maye vakavia vandu va shekemu mbony yeyo nawo vakasennyo Abimeleki mashika elyi eekee wa samu yaawo.

⁴Vakanniinga fyenga makumi mfungare fya fesa kwa Baal-beriti, nawe Abimeleki kanniinga vandu varavi vakee maraami naambo varue nawe uvayony.

⁵Naasa kwa ndeye kulya Ofra, kawaa vana va maye, mmbo vana valya va Yerubaali (Gidion) makumi mfungare woose, kavawaiya yoo uwe ya iwe iniini, kutani asaa-u mwana umwi nsi yeto afurummyi, mmbwe Yothamu, nawe mmbo aleovya elyi vanavamaye veefo veewaawaa.

⁶Naasa vandu va Shekemu vakakuummbya woose, na va mmba ya Milo, vakandevika Abimeleki mangyi, sindeny ya nri wa mwaloni kufii na turuve ya Shekemu.

⁷Naasa Yothamu eekifityo mbony yeto, kandesalala alya uwe ya ifumbu lya Gersimu, kaonisa unyanga kaammba, “Nkyeshaaranyinny-te, vandu va Shekemu, naambo na Iruva nawe namwaarannyi yeni.”

⁸Elyo kasha nkonu umwi miri mmbo yekuboo indevika umwi wa vayo mangyi. Ikavia nri wa mseituni, “Lushillye yewe-te.”

⁹Nri yeto wa mafura ukaammba, “A mbo shiraa ishora lya yuuta mseituni yoo vandu vaanaa Iruva kimaruma kya vayo, shindetiva-tiva shiishillya miri?”

¹⁰Llyo miri yewuiya irwaa ikalyivia, “Lushillye yewe-te.”

¹¹Nalyo irwaa lyikavia miri ilya, “A mmbo shiraa usha lwakwa na nrolo wa ndunda takwa shishetiva-tiva ishillya vandu?”

¹²Naasa miri ikawuiya nsabibu ikauvia, “Ao lushillye yewe-te.”

¹³Nato nsabibu ukavia muri yeyo ingyi, “Ale, mmbo shiraa mfinyo wakwa yeto usenyi Iruva na vandu nshetiva-tiva shimushillyaa yeni-ro?”

¹⁴Nalyo llyo miri myoose ilevia nri wa miinga, “Naasa, lushillyeny yewe.”

¹⁵Llyo nri yeto wa miinga ulevia miri ilya, “Kwankooya yeni dede mulanngye shimushillye, oshony mwiimuye si ya kirishe kyakwa, lyo mwanra mulatana indo, muro uuke kwakwa ukore nsito wa miri wa Lebanoni.”

¹⁶Kyasia kwakooya mmbo muletana kya urango na kya songosiny elyi mulevika Abimeleki mangyi, nako kwankooya kilesennya na mmba ya Yerubaali shaasa kyeesumani natannyo,

¹⁷(mashika lyo mwiishi shaasa nde Yerubaali alemukabannya, eevikaa muu wakwe nrengeny nnu, kamwaauwa maakonya a Vamidian.

¹⁸Lyo yeni ulaalu mmbo mwammbwaa va mmba ya nde, mukamamita vana vakwe, vandu yewo makumi mfungare uwe ya iwe iniini, neeni mukavika Abimeleki mangyi, nawe akee mwana wa kishinga, vai nave mangyi wa Shekemu, mashika elyi akee samu imwi neeni.)

¹⁹Naasany kwakooya mmbo muletannya mmba ya Yerubaali mesha na usumanu, naasa fureny na Abimeleki, nawe nafure neeni.

²⁰Llyo kwankooya kilakee indo, naasany, nato muro ufume kwa Abimeleki umamite vandu woose va Shekemu umwi na va mmba ya Milo, nato muro wuuke kwa vandu va Shekemu na kwa mmba ya Milo umamite Abimeleki.

²¹Eekimaa irera Yotam karisha keenda Beeri kandekaafo kimmba eereiye mwanamaye Abimeleki.

²²Naasa Abimeleki kashillya Vaisraeli ando a myaaka iraru.

²³Naasa Iruva keenngye Abimeleki na vandu va Shekemu mumuyo ntefusu, na vandu va Shekemu vakakapa Abimeleki mungo.

²⁴Nakyo kyikava kyeetaiya uravi yelo vana va Yerubaali valetannyo samu ya vandu yewo makumi mfungare uwe ya iwe iniini, neeni mukavika Abimeleki mangyi, nawe akee mwana wa kishinga, vai nave mangyi ya Shekemu, mashika elyi akee samu imwi neeni.

²⁵Naasa vandu va Shekemu vakavavika vandu vandelaaya Abimeleki efo mafumbuu, nawo vakava vasokaa vandu vashiiraa shia findo fyawo. Nawe Abimeleki kafityo mbony yeto.

²⁶Naasa Gaali mwana wa Ebedi keenda ando amwi na vana va maye fika Shekemu, na vandu va Shekemu vakammbwarya.

²⁷Naasa vakeenda mareminy awo a misabibu, vakayaya ndunda ta vayo, vakakama vakasongosia mfinyo vakavika sukukuu mmba ya iruva lyawo, vakalya neena needenga Abimeleki

²⁸Nawe Gaali mwana wa Ebedi kaammba, “Abimeleki ni vi na vandu va Shekemu, kutani lwandendunndya we. A we nshi mwana wa Yerubaali na Sebuli nshi nshilyi wakwe.” Kyasia yeni sye runndyeny vandu va Hamori ndeye wa Shekemu, lyo yese mmbo lundundyaa nkyiki?

²⁹A nkyema vandu yeva vekee ushilyiny lwakwa! Mmbo sheemaa mbony ta Abimeleki. Naasa kavia Abimeleki, “Engera itorito vafo kweenda.”

³⁰Naasa nshilyi wa muri wa Sebuli katirwa ni unyafi ekiita marero a Gaali mwana wa Ebedi

³¹Karuma vandu kilaishiwa naambo veende kwa Abimeleki, nandevio, “Kwiishi, Gaali na vandu vakwe mmbo vansha Shekemu yeende-fo nriingyi kunu muriny.”

³²Kyasia neewe kuboo na vandu vafo kio ekyi, mundevalaaya efo mareminy,

³³neelyi kwiikya mukuboo nraasi neewoya muri. Nawe na vandu vakwe elyi vashaa ishekabana neeni llyo kuvatannye shaasa kwakunda.

³⁴Naasa Abimeleki kakuboo kio na vandu vakwe woose vekee maronda aana vakalaaya muri wa Shekemu.

³⁵Nawe Gaali wa Ebedi kooka-fo kandekaa alya ngiriny ya muri, llyo Abimeleki na vandu vakwe vakooka alya vekeelaaya.

³⁶Llya Gaali alelollya vandu valya kavia Sebuli, “Kulollye, kwiifo vandu vakooloka kulya.” Sebuli kammbia, “Nkirishe kya fidooro efyo kulollye, nshi vandu-fo.

³⁷Naasa Gaali kaammba lya kavii, yee, lola kwiifo vandu vakooloka, na ironda lyimwi lyikeesora shia ya nsito wa Meonenimu.

³⁸Nawe Sebuli kammbia.” A nkyiki elyi kulaammba vai, Abimeleki ni vi kutani lwiindunndyaa? A yewo nshiwo vandu valya kuveelye deny? Kyasia kwiibony kundekabana nawo.

³⁹Naasa Gaali kasomuka nandekabana na Abimeleki efo Shekemu.

⁴⁰Lyo Abimeleki kamfuna na vandu vakwe vakakabwa.

⁴¹Abimeleki kakaa Aruma, na Sebuli koota Gaali na vandu vakwe kulya Shekemu.

⁴²Naasa elyi lya ndesi Abimeleki kashevio sheelyi mmbo vakunndye yeenda neefo mareminy.

⁴³Nawe keeboo vandu vakwe kavaava maronda araru, vakandelaaya efo mareminy, vakalollya vandu veefo vashuukaa efo muriny, kakabana nawe kavavinga.

⁴⁴Abimeleki itorito vakwe vakeengera yeenda na mbee, vakandesalala alya ngiriny na maronda alya avii a itorito vakawoya yewo woose vekee mareminy vakavavinga.

⁴⁵Abimeleki kakabana na muri yeto nkonu piti, kauvinga, kawaa vandu woose veefo, kauwunndwa neeletya-fo shumbi.

⁴⁶Naasa vandu valya vekee kulya kisauny kya Shekemu kyeeri valeeta mbony yeto vakandeanga kulya turuveny ya El-beriti.

⁴⁷Nalyo Abimeleki kashefityo mbony yeto.

⁴⁸Nawe kandesaama na kulya ifumbuny lya Salmoni, we na vandu vakwe. Naasa Abimeleki kamanya irammba lya nri na kyara, kalyivika yeeven. Naasa kavia yewo veeriani nawe vatane shaasa we atana.

⁴⁹Woose vakamanya marammba vakasora Abimeleki, na marammba yoo vakandeavika yoo turuveny, nalyo vakayaatya muro. Nkyo vandu woose va turuve yeyo vakafwa, vafikye kiku indi, womi na vaka.

⁵⁰Naasa Abimeleki keenda Tebesi, kakabana nato na yuuvinga.

⁵¹Nato muri yeu mmbo weekee mwiikare nisha, na vandu woose mmbo venrishya-fo neendesaama uwe.

⁵²Nawe Abimeleki kakabana nawo, kakunda yaatya turuve ya vayo muro.

⁵³Vekee efo uwe nka umwi kawunndwa iwe iniini sha isewe, nalyo lyikawoya Abimeleki nrony, lyikapara nrwe.

⁵⁴Naasa Abimeleki kavaanga nsoro yeto mwiikamara fisha fyakwe, kammbia, “Ipoo usu lwafo kwashimarisyany, naambo vandu valasheyaammba, ‘Abimeleki mmbo alewaawa ni nka.’” Naasa nsoro yeto keepo usu kalunsemikya, nawe kafwa.

⁵⁵Kyasiany, Veesiraeli veekilollya Abimeleki amfwa, wo nndu kawara shia keenda wo nndu kyeny kwakwe.

⁵⁶Naasany niindo Iruva aletaiya Abimeleki kya uravi lwakwe elyi alewaa vana va maye valya makumi mfungare.

⁵⁷Kiwo na vandu va Shekemu Iruva kavataiya uravi lwawo, Niindo na kidengo kya Yotam mwana wa Gidioni kilevasheya.