Read BIBILLYA Mareiyo Meele a Iruva YUDA 1 Bible Online

YUDA 1 - BIBILLYA Mareiyo Meele a Iruva bible

YUDA 1

¹Yeny Yuda shikee ishinga lya Yesu Kristo, nkee mwanamaye wa Yakobo, mmbo shamwiidikira yeni Vakristo mukee vakunde kyeendwa ni Iruva Nde, na iringwa kimaruma kya Yesu Kristo.

²Shamukundya mwengerywa ilyillyo na urilalyi na ikundana.

³Vakunde vakwa, kyeeri shekee ikutakura deny imureiya kya ukiro yelu lweru yese loose, mashika shilewona kuti shimureiye, naambo shimwiitike mulalakye iirikyo llya siri sheele ilerambikywa.

⁴Mashika kwiifo vandu valeanga siriny veshoovyaa, vakee vautye uvingo uka kipooka. Nawo ni vandu valaishi Iruva, vakee vealasha isarya lya Iruva lyikava kindo kya tangalu. Nawo mmbo valema Iruva yeto muni akee mmbwe wa dede, na Nndumi weeru Yesu Kristo.

⁵Lyingyi mmbo shikunndye imukumbura, lla elyi mwammaa imanya efi fyoose, sheelyi llya Nndumi alemaa iwouwa vandu vauke kulya Misri, mmbo alerumata valya elyi numa valera iirikyo lya dede.

⁶Naakwa ni vasu va iruveeu valya valera valaringa itumbe lyawo veni, vakakillya nnyanu wawo ulya ukwaani nawo, mmbo alevafinga llung'anu vakae ireeminy vavere uvingo lwa nkonu ulya nniini.

⁷Kimwi sha Sodoma na Gomora na miri ilya ya minyanuny shaasa valeva veetuusa vakavaka yeva, velatyaa ngaa ya mwiili ilya ya kasha, vakavaka yeva, nawo mmbo valelyamarwa ni muro wa llunganu.

⁸Na yeva nikiwo-da, vakee sheelyi vashooryaa mmbo vakatefusa mwiili, vakalema kindo vavioo na imina ngaa sheele.

⁹Kyaindi Mikaeli, we nsu yeto nniini, llya alewaana na Mmbishwa, na iwakyana nawe kya mwiili wa Mose, nnyaleidima yaamba-u kikasha kyakwe-fo, lyo mmbo aleamba, “Nndumi nakukyeemyi.”

¹⁰Indi vandu yeva mmbo vakeeyaarara kindo valakiishi nta, na filya vafiishi uka mbee vakakutefusa nafyo na ivaka mafisi alatiri nta urango.

¹¹Oshiny lwawo! Mashika mmbo valevaka Kaini, na irenga sha Balaamu na kindo valetawa kya efyo ni irumatwa sha Kora.

¹²Vandu yeva mmbo vaeresye nnu mashika elyi mwavika mirumwa yaany misha mmbo vashelyaa na yeni shoongeny, nta kulaore vereiye isanga na yeni. Vakavaka mafishi alatiri mura avivitwaa ni uraato, na miri yammaangara mamburu, ilakivikaa ndunda, yammaa ifwa kavii na iiluwa tushu.

¹³Vakawuya ivaka matundulu a yeeve alavaa isiika, na irosa maffwe akee nng'u sony yaawo, vakavaka nyinyiri tirekye shia, vakawoywa ni ireema lyiveemyaa fika llung'anu.

¹⁴Enoki yeto akee wa mfungare kuuka Adamu, mmbo alerera kyawo sha nkisuku, kaamba, “Lola-te, Nndumi mmbo alesha eriyani na veele vakwe, fiku na fiku.

¹⁵Naambo naidimi irumbuya vandu vakwe mwaandu, na yuutya valya valashinndyaa Iruva uvingo, kyeendwa ni mashora awo maravi valeatana valariyani na Iruva. Kimaruma kya marero awo maravi valyamari yewo valearera alakee a iindya Iruva.

¹⁶Vandu yeva mmbo vakunung'unaa, vakasora lango tawo, na kana kyawo kakarera marero maroo ekurosa, vekundyaa valya vatiri uniini naambo vawoni-fo mbusha yaawo.”

¹⁷Kyaindi yeni, vakunde vakwa, kumbweny marero alya alererwa uka llya mbee ni varumi valya va Nndumi weeru Yesu Kristo.

¹⁸Mmbo valemmbia, “Fyeeri fya ifurumya mmbo kushekaa-fo vandu vetatala, vesoraa lango tawo veni yeto tiretaa.

¹⁹Vandu yewo mmbo vakeende mirauko, mmbo vakee va kiulana vakatura Mumuyo wa Iruva.”

²⁰Kyaindi yeni vakunde vakwa, mukankutira na iirikyo lyany lyikee yeele nnu, na itereva mukee na Mumuyo Mweele.

²¹Kutireny na ikunda lya Iruva, mwivereyaa ulyilyi lwa Nndumi weeru Yesu Kristo, kutani mwawona muu wa llung'anu.

²²Lyillyeny vengyi yewo vatirwa nnyinyira.

²³Na vengyi muvakire mwiivaraakwaa efo murony. Na vengyi valyillyeny na usau, musue naakwa ni isara lyitiri kyuuna kya mwiili.

²⁴Na yeto ashidimaa imuringa mulawoni nsindara, na imurwaa itumbeny lyakwe mukee na ifura iniini,

²⁵mmbwe Iruva umwi nsi, na Mwikira weeru we Yesu Kristo Nndumi weeru. Nnduma ni wakwe, na ulyimbi, na wiidimi na finya, uka llung'anu, na enu, na fika llung'anu. Amen!