Read BIBILLYA Mareiyo Meele a Iruva USUKUYONY 10 Bible Online

USUKUYONY 10 - BIBILLYA Mareiyo Meele a Iruva bible

USUKUYONY 10

¹Naasa shalollya Nnsu ungyi atiri finya eshoolokaa ooka iruveu, akee nsikye ni ifishi, na ukova lwa ngyima lukee nrweny wakwe; kisangu kyakwe kyikava sha nkyeere, na marende akwe akavaka ngo ta muro.

²Na efo wokony lwakwe arye kyitabu kidu kyikee kitarambwe. Karwaa urende lwakwe usha yoo uwe ya yeeve, na elo umuso kalurwaa ulaniny.

³Nawe kaffwa na unyanga waasha, sha miiso idinaa. Kyeeri alefua, maruruma alya mfungare akariika.

⁴Kyeeri maruruma yoo mfungare aleriika, llyo shilekudeesya ireiya. Naasa sheeta unyanga looka iruveu lwishambaa, Vikya muuri marero yoo moose alererwa ni maruruma yoo mfungare, kure kulaareiya.

⁵Na nnsu ulya shilelollya esalalyi uwe ya yeeve na uwe ya uruka, kaorwa woko lwakwe usha na efo iruveu,

⁶kalya mboo na yeto akee na muu llung'anu fika llung'anu, yeto atannyi iruveu na fyoose fiefo, na ulana na fyoose fiefo, na yeeve na fyoose fiefo, kyeyaamba nkushekaa-fo fyeeri numa ya findo efi-fo;

⁷kuuta kyeeri kya mikonu ya unyanga llwa lwa nnsu ulya wa mfungare elyi ashekudeesya ikapa iranda, llyo ekyo Iruva akundye kisheinutywoo, shaasa aleongoya vasero yewo vakwe wo vakisuku.

⁸Na unyanga llwa shelwiita lushukaa iruveu shawuya ilwiita lyingyi lwireraa na yeny, lukaamba, Enda kwandewarya kyitabu kilya kyekee wokony, lwa nnsu ulya alesalala uwe ya yeeve na uruka.

⁹Naasa shaeengya nnsu ulya shammbia nashiniingye kyitabu kilya kidu. Kashivia, “Kiwarye kukilye. Nakyo kishekuvikyaa kivawo efo ndewuny yafo, kyaindi efo kaniny kyafo kisherolaa sha ukyi.”

¹⁰Shawarya kyitabu kyilya efo wokony lwa nnsu ulya, shakilya, kikarola sha ukyi kunu kaniny kyakwa, na kyeeri shemaa ikilya ndeu yakwa ikavava.

¹¹Vakashivia, “Mmbo kyikukooye kuute ukisuku lyingyi kwa vandu na fishomu na vamangyi veengyi.”