Read BIBILLYA Mareiyo Meele a Iruva 1 SAMUELI 11 Bible Online

1 SAMUELI 11 - BIBILLYA Mareiyo Meele a Iruva bible

1 SAMUELI 11

¹Wiikiirau mwiiri umwi, Nahashi Mwaamoni karwa kandemannya ulale nandekapa Yabesh-gileadi, na vandu woose va Yabeshi vakavia Nahashi, “Rera neese nisha, naambo lukurundye.”

²Naasa Nahashi yeto Mwaamoni kavavia, “Mmbo shimuviaa kyeetana, mukammiirikya naasa lwiitani nisha. Wo ndu nailuwa iriso lya woko usha, nayo ive n'teve ya Vaisraeli woose.”

³Naasa vamiku va Yabeshi vakammbia, “Luniinge mikonu mfungare neese lurumi vandu kunu Israeli koose, nalyo kammbwiikafo nndu mwilukapanya, lushekuviaa.”

⁴Naasa vandu vakafika kulya Gibea kwa Sauli, vakavia vandu marero yoo, na vandu woose vakayya misoru.

⁵Nawe Sauli kasaama ooka imungony eesoraa ng'umbe kavesa, “Nkyoki kyeengye vandu yeva vakaiya?” Llyo vandu valemmbia marero alya a vandu va Yabeshi.

⁶Nato mumuyo wa Iruva ukasheya Sauli na finya kyeeri aleeta marero yoo, nawe karooyo ni unyafi nnu.

⁷Keepoo ng'umbe ivii katirumbwa-rumbwa fyenga fyenga, kafirwaa efo minyanuny ya uruka lwa Israeli koose erumaa varumi vakwe, kaamba, “Nndu yeto araa nalavingya Sauli na Samweli mmbo ashetannyoo sha ng'umbe eti. Nawe kavaanta vakasomukya na nrima umwi nsi.”

⁸Eekiveekena kulya Bezeki kakooya ni vandu fiku mayana araru Vaisraeli na Vayuda fiku makumi araru.

⁹Nawo vakavia varumi valya, “Vieny vandu va Yabesh-gileadi, ndesi kyeeri mwi usimbiki mmbo mushelollyaa ukiro lwany!” Llyo varumi valya valewuya vakandevia vandu va Yabeshi, nawo vakafura nnu.

¹⁰Nawo vandu va Yabeshi vakaamba, “Ndesi mmbo lundevarayaa luvatanye ekyo lwakunda.”

¹¹Naasa elyi lya ndesi Sauli kaava vandu valya maronda araru, vakaanga kulya ulaleny ngama nraasi, vakakapa Vaamoni fika kyeeri mwi usimbiki, na valya valeturunya iwaawa vakanyanyaka umwi umwi.

¹²Nalyo vandu vakavia Samweli “Mmbi-ro ulya aleamba, a Sauli yeu mmbo alushillyaa yese? Vandu yewo veendwa yaa luvawaa nawo.”

¹³Kyeendi we Sauli kaamba, “Nkukiifo nndu akiwaawaa-fo, mashika Nndumi Iruva ammeende ukiro kunu Israeli.”

¹⁴Naasa Samweli kavia vandu valya, “Ulaalu lweende uviny Gilgali, lundenangisya-fo umangyi elu.”

¹⁵Vandu woose vakeenda Gilgali, vakarambikya-fo Sauli umangyi mbee ya Nndumi Iruva vakashishya-fo firaso fya ufoo. Nawo vandu va Israeli vakafura nnu.