Read BIBILLYA Mareiyo Meele a Iruva 1 SAMUELI 12 Bible Online

1 SAMUELI 12 - BIBILLYA Mareiyo Meele a Iruva bible

1 SAMUELI 12

¹Nalyo Samweli kavia Vaisraeli, “Mulollye, yeny mmbo shileiranya unyanga lwany shamuvikya mangyi.”

²Naasa ulaalu mmbo mukee na mangyi, neeny shammikwa. Na vana vakwa ekawo vakee neeni, neeny mmbo shilemusalallya uka elyo shikee n-du.

³Nkyekureekeny ulaalu mbee ya Nndumi Iruva na mbee ya nsauwe yeu wakwe kwakooya shilemmaafinya nndu shansoka ng'umbe yakwe ao nshungu? Ao kwakooya shilembwarya kindo kyeeniingwa naambo sheevete usumanu lwa nndu, mmbo sheekiviiraa inu.

⁴Nawo vakaamba, “Nkulelwaafinyi nta ilufotafo, nta nkulewarye kindo kya nndu-fo.

⁵Kookafo kavavia, Nndumi Iruva ni nkureeki, na maangi-da, sheelyi nshitiri kindo kya undu-fo.” Nawo vakaamba, “Yee mmbo akee nkureeki.”

⁶Samweli kawuya kavavia, “Ni Nndumi Iruva alevaanga Mose na Aron, na mmbwe-da aleuta vande valya vany kulya Misri.”

⁷Ulaalu uranyiny shimuvie kya mashora maniini Nndumi Iruva alemutannya yeni na vande valya vany.

⁸Kyeeri Yakobo ekee kulya Misri na vande valya vany, llyo valefuuya Nndumi Iruva nawe karuma Mose na Aron, vakandewoota-fo, vakashevafita yaa.

⁹Lyo vakarekyo Nndumi Iruva waawo, nawe kavavika maakony a Sisera ulya ekee nteteri wa itorito lya Hazori, kavevavika maakony a Vafilisti na maakony a mangyi ya Moabu vakakapana na Israeli.

¹⁰Lyo wo vakafuuya Nndumi Iruva vakammbia, “Mmbo lulelyamara nnu elyi lulera Nndumi Iruva lukarundya maruva a wongo Lyo ulaalu lwakutereva kulukire maakony a vakiduva veru, lukurundye yewe.”

¹¹Nndumi Iruva karuma Yerubaali na Baraka, na Yefta na Samweli, vakashemuuta efo maakony a vakiduva vany, mukakukaya noofoo.

¹²Na kyeeri mulelollya Nashashi ulya mangyi ya Vaamon llya aleshekapana neeni mukashivia, “Kukooye mmbo lweetiri mangyi kyeevaa, ra llya Nndumi Iruva eemushillye yeni.”

¹³Kyasiany ulaalu, irikyeny mangyi yeu mulenkunda mukansauwa muveni, nawe Nndumi Iruva kamuvikya.

¹⁴Kwakooya mwaaranya unyanga lwa Nndumi Iruva neetana ekyo akundye mwaaranyi na mangyi yeu alemuvikya mwiireiye Nndumi Iruva, Iruva waany, llyo kishevaa mbusha kwany,

¹⁵Lyo mukallema Unyanga lwakwe na yiimmbwa mavavaso akwe, llyo woko lwa Nndumi Iruva lushemukapaa indo shaasa lulekapa vande valya vany.

¹⁶Ulaalu lolen-te mulollye mashora maniini Nndumi Iruva ashemutannyaa.

¹⁷Ulaalu kwiifo fimu fya nganu se? Mmbo shiterevaa Nndumi Iruva neende mmbwa na maruruma llyo mushemanyaa shaasa uravi lwany lufye elo muletanya Nndumi Iruva llya muleruuya mangyi.

¹⁸Naasa Samweli katereva Nndumi Iruva nawe kavika mmbwa na maruruma na vandu woose vakairyaa nnu Nndumi Iruva vakasanga na Samweli.

¹⁹Vandu woose vakaamba, “Lwakutereva kuluterevye yese mashinga afo, naambo lulafwe, mashika lyo mmbo luleengera uravi lweru elyi lulekukunndya mangyi.”

²⁰Samweli kavavia, “Kyasia ulaalu mulakiiryee-fo, lyo dede muletana kikasha, lyo mulakire isora Nndumi Iruva-fo, nndundyeny na nrima moose.”

²¹Mulasore findo fya tangalu,

²²filasheekyaa nta ikira, nta filavaa. Nawe Nndumi Iruva nnyasheraa vandu vakwe-fo, mashika mmbwe muni alemusauwa muve vakwe.

²³Lyo yeny mmbo shikeekuringa shilasheera imuterevya kive ulyamari kwakwa. Nkuti shimoore shia isumani shiimuloshaa.

²⁴Indyeny Nndumi Iruva muvendundya na nrima moose, mwiikumbwaa shaasa alemutannya findo finiini.

²⁵Lyo kwakooya mweengera ilyamara nkuti murumake yeni na mangyi yaany-da.