Read BIBILLYA Mareiyo Meele a Iruva 1 SAMUELI 13 Bible Online

1 SAMUELI 13 - BIBILLYA Mareiyo Meele a Iruva bible

1 SAMUELI 13

¹Naasa Sauli kapooka ishillya kulya Israeli kashillya-fo myaaka deny,

²Nawe kasauwa itorito fiku firaru, yewo fiku fivii vakakaa nawe kulya Mikunashi na ifumbuu lya Beteli, na kiku kimwi vakakaa na Yonatan kulya Geba ya Benyaminy, na vandu valya valesaany kavasama vawuye na kyeny.

³Yonatan kandekapa turuve yeyo ya Vafilisti kulya Gibea, Vafilisti vakamanya. Nawe Sauli kakapa iranda kulya urukeny koose, eshaambaa, Vaebrania angusyeny.

⁴Vaisraeli vakeeta kyaambawa sheelyi Sauli ankapa turuve yeyo ya Vafilisti, na Vaisraeli vakeerese Vafilisti. Naasa vandu vakakusanyirya vandeiduva Sauli.

⁵Vafilisti nawo vakakusanyirya naambo vandekapana na Vaisraeli, veerye mitika fiku makumi araru na nkuka wa vandu ufye sha nsanga, vakarwa vakandemannya ulale kulya Mikunashi, taari ya Bet-aveni.

⁶Vaisreli vekilollya kyawo nkyuumu, mashika vandu mmbo valeiryaa nnu, vandu vakoovya efo mbangeny na mindesheny, na ngoroshony neefo maweny na marininy.

⁷Vaebrania vengi vakaruuka Yordan, vakaanga urukeny lwa Gadi na Gileadi, lyo we Sauli kasaa kulya Gilgali, nawo woose vakamwiiduva-fo veereremaa.

⁸Sauli kavera ando a mikonu mfungare kutani Samweli ammbyaa, lyo Samweli nalansore kulya Gilgali, wo vandu yewo vakakaa kwaasha.

⁹Naasa Sauli kaamba, “Shyeengyen firaso fyeekora na muro na firaso fya ufoo.”

¹⁰Llya alemaa yuuta firaso filya, na Samweli kasha. Sauli kandemwaambya nemwiidikira.

¹¹Samweli kavia Sauli, “A nkyokieki kwatana?” Na Sauli kammbia, “Mmbo shalollya vandu veenyanyakaa, neewe nkwensha-fo kyeeri kilya kisumani-fo, na Vafilisti mmbo vemmaa ikusanyirya kulya Mikunashi,”

¹²naasa shakusara, Vafilisti mmbo vakeeshisora vafike Gilgali kulore shambonisa mwaanya wa itereva Nndumi Iruva, nkyo kimaruma shakukaarisa yuuta kiraso kyeekora na muro.

¹³Naasa Samweli kavia Sauli, “Mmbo kwatana nnya urung'ani deny, nkwalatya ivavaso lya Nndumi Iruva, Iruva wafo-fo, mashika Nndumi Iruva mmbo adeesye ivangisa umangyi lwafo kunu Israeli.”

¹⁴Lyo ulaalu umangyi lwafo llukitiraa finya-fo, nawe Nndumi Iruva mmbo annduya nndu ungi yeto ashesennyaa nrima wakwe. Nawe ammuvavasya nasalallye vandu vakwe, kimmba yewe kwanra kulalatya irero lya Nndumi Iruva.

¹⁵Naasa Samweli kasaama ooka kulya Gilgali kandefika Gibea muri wa Benyaminy. Kyeeri Sauli aleekena vandu vaiyo kakooyau mayana arindaru.

¹⁶Nawe Sauli na mwana-akwe Yonatan na vandu valya veeriani nawo vakakaa kulya Geba wa Benyaminy. Lyo wo Vafilisti vakakuumbya kulya Mikmashi.

¹⁷Na vandu veerakkwa findo vakooka kulya kwa Vafilisti veekee maronda araru ironda lyimwi lyikavaasora shia ya Bet-horoni na vengi vakasora imungo lya Seboimu, taari ya kasa.

¹⁸Itorito lyingyi lyikalla Beth-honony na itorito lyingyi lyikalla nnyanuny woolokye imungony lya Seboimu kulella kasa koomu.

¹⁹Kyasia kulya Israeli nkweifo nndu mfuru nta umwi-fo. Nawo Vafilisti vakalollya Vaebrania yeva mmbo vashemanyaa isongosia ngyupanga na mafumu.

²⁰Vaisraeli woose mmbo veeishivye isoka na kulya urukeny lwa Vafilisti indenuyafo makumbi awo na mindo, na fyaara fyawo, na shummbwa tawo.

²¹Lyo kindo veetiri n'tupa ta yaarya-da.

²²Nkyoony, nkonu yeto wa fira wiikifika nkweifo nta nndu umwi wa Vaisraeli etiri usu nta ifumu-fo, kuuta Sauli muni na mwana wakwe Yonatan.

²³Vafilisti vakakupoo vanderinga nko ulya wa yaanga muriny wa Mikmashi.