Read BIBILLYA Mareiyo Meele a Iruva 1 SAMUELI 14 Bible Online

1 SAMUELI 14 - BIBILLYA Mareiyo Meele a Iruva bible

1 SAMUELI 14

¹Naasa nkonu umwi Yonatan mwana wa Sauli kavia nsoro yeto mwimwipoiyo fisha fyakwe, “Kye nnde lusore Vafilisti kulya ulaleny lwawo. Lyo nnyelevia nta ndeeye-fo.”

²Nawe Sauli mmbo akee taari ilya ya kavii ya muri ulya wa Geba, kava mwikaa yoo si ya nri keemuyau, eeringwaa ni vandu vakwe mayana arindaru.

³Nawe Ahiya mwana wa Ahitubu mwana maye wa Ikabodi akee mwana wa Finehasi wa Eli ulya nkohani wa Nndumi Iruva kulya Shilo. Nta yeva mmbalemanya kindo Yonatan akunde itana-fo.

⁴Neefo kwafo mianya mfo Yonatan eekundye yiira nandefikya turuve ilya ya Vafilisti. Nang'u mmbo kweiyo mawe avii maniini taari yei na taari yei. Lyimwi mmbo lyevangwaa Bosesi neelyo lyingi ni Sene.

⁵Elyo lyimwi mmbo lyekee taari ya Mikmashi mfo taari ya ndoo, neelyo lyingi lyikakaa Geba mfo taari ya sinde.

⁶Naasa Yonatan kavia nsoro ulya mwiimwipoiyo fisha fyakwe, “Kye nnde lundesora masembo yoo alakee marini, nawe Nndumi Iruva ashelwekyaa-da, mashika nkwiifo kindo kishimaa Nndumi Iruva nalalwaauwe-fo, kinnywo ao kiniini.”

⁷Neeto mwimwiboiyo fisha kammbia, “Tana shaasa kulollye efo nriminy wafo. Neeny mmbo shikee neewe na nrima moose.”

⁸Naasa Yonatan kaamba, “Yese luruuke lusore vandu yewo valulollye.”

⁹Nawo kwakooya valuvia, “Luvereny yoo,” lwiirishe luvavereyeu.

¹⁰Lyo vakalluvia, “Oshony, saaminy na kunu, llyo luvasore, mashika indo llyo Nndumi Iruva ammbavika maakony eru.” Ekyo nkyo lulolaa.

¹¹Naasa vakandekoora alya turuveny ya Vafilisti. Nawo Vafilisti vakaamba, “Ako! Ulaalu Vaebrania vafuma efo marininy kundo woovye!”

¹²Na vandu yewo va efo turuveny vakavia Yonatan na nsero ulya eeriani nawe, “Nkye saaminy na kunu lukai lumoore nri.” Yonatan nawe kavia nsoro eto wakwe, “Kye shisora, mashika ulaalu Nndumi Iruva mmbo ammbavika maakony a Israeli.”

¹³Nalyo Yonatan kasaama nafo eeshaafwaa, nawe nsero yeto wa fisha fyakwe kansora. Naasa llyo vandu yewo vakawa elyi Yonatan alesha kufii nawo, na nsoro yeto wakwe kavawaa umwi umwi.

¹⁴Vandu valewaawa ni Yonatan na nsoro yeto wakwe vakafika makumi avii. Alya valefiiya mmbo kweefye sha kyenga kya irema lyaremwa ni nndu umwi.

¹⁵Kulya ulaleny kukaitiwa kidina-si, neefo mareminy, Vafilisti woose vakarerema ando amwi na itorito lyawo, na uruka loose lukaiya.

¹⁶Nawo varingi valya va Sauli kulya Geba vakaimaiya-fo, vakalollya vandu valya vatarakana vakanyanyaka.

¹⁷Naasa Sauli kavia vandu valya vekee nawe, “Ekeniny vandu veru mulole ni vi nalaiyo. Vekyeekyena vakakooya Yonatan na ulya mwiikurika fisha fyakwe nnyaiyo-fo.”

¹⁸Nalyo Sauli kavia Ahiya, “Ende isanduku lya mavavaso na yaa.” Kyeeri eki isanduku elyo lya mavavaso a Iruva mmbo lyeetirwa ni vana va Israeli.

¹⁹Kyeeri ekyo Sauli eefo areraa na nkohani indo, kyoorongye kilya kulya ulaleny lwa Vafilisti kikeenda kiing'anaa. Nawe Sauli kavia nkohani, “Ra mbele.”

²⁰Naasa Sauli na vandu vakwe vakakuumbya ando amwi naambo vandekapana. Nawo Vavilisti mmbo vempooka ikapana wo veni na veni na ngyusu. Kukaafo kusu kusu niini nnu deny.

²¹Nawo Vaebrania valya vekee kwa Vafilisti uka elyo, valollya kive indo vakainduka vakakaa kyaalu kya Sauli na Yonatan.

²²Na valya vengi valeeta kyoorongye vekee kulya mafumbuny a Efraimu, vakamanya Vafilisti vanrisha, nawo vakavingya indevakopa.

²³Niindo Nndumi Iruva aleauwa Israeli nkonu yeto, fira ikakabana ikeera kwambee ya Bet-aveni.

²⁴Nkonu yeto vandu va Israeli mmbo veatarika deny kimaruma kya shaa, mashika Sauli mmbo emmbalyisya mboo kulave nndu alya shoonga kaamba, “Kulore mmbo shataiya vakiduva vakwa, yeto alyaa shonga nave n-denge.” Nalyo kulakaefo nndu akarya ilya shoonga.

²⁵Nawo llya valefika ando a ngorosho vakakooya-fo wuki.

²⁶Nato wuki yeto mmbo wekeeshoshoka; lyo kulakae-fo nndu akarya iwukomba kimaruma kya yiiryaa mboo ilya.

²⁷Lyo we Yonatan nnyemmiita kya ivavaso elyo ndeye aleniinga vandu na kya mboo ilya-fo. Nkyo we koorwa nsengye wakwe, kapaana nato wuki ulya elyi wiifo ushoshokaa, kawuya kaata woko lwakwe efo maraniny a wuki kalya wuki ulya, nalyo miso akwe akaambuka.

²⁸Naasa kukava-fo nndu umwi ammbia, “Ndoo mmbo aleema vandu woose, kavalyisa na mboo, eshaambaa, Kulave nndu alya shoonga. Yeto alya mmbo adengwaa. Na vandu vakasya finya deny.”

²⁹Nawe Yonatan kaamba, “Nde mmbo asaveesa vandu ruu,” Nkyelola shaasa shaambuka miso elyi shakomba wuki yelu kinnywo.

³⁰A nkyeevaa kishase ndesa kukooye vandu yeva nawo valya neewuura inu veefuraa na findo efi vatira fireny, kive indo nkyekusare mmbo veewaa Vafilisti veenga?

³¹Nkonu ulya Vaisraeli vakakapa Vafilisti vawoota alya Mikmaishi fika Ayaloni. Lyo mmbo vemmisya finya deny kimaruma kya shaa.

³²Nalyo vandu vakarangya findo filya valetira fireny, mburu na ng'umbe vakatishishya alya, vakalya nyama ando amwi na samu.

³³Nalyo vengi vakavia Sauli, “Vandu yeva mmbo valyamarya Nndumi Iruva elyi valya nyama ando amwi na samu ya vayo.” Nawe kavavia, “Yeni mangaaro a vandu, nkye shisemberyeny iwe iniini na yaa.”

³⁴Sauli kawuya kaamba, “Kyasia ulaalu endeny efo vandu mundevavia wo nndu nasheengye ng'umbe yakwe, na suva yakwe, mushishye yaa mulyiiye-u, naambo mulasheelyamarya Nndumi Iruva se, elyi mulelya nyama na samu.” Nawo vakeende ng'umbe kio kilya, vakatishishya.

³⁵Nawe Sauli katannya Nndumi Iruva kitara kyeerasya, nakyo nkyo kitara kya mbee Sauli aletannya Nndumi Iruva.

³⁶Nalyo Sauli kavia Vaisraeli, “Kye nndeny luvingye Vafilisti kyeeri kya kio, fika nraasi lukooye lwambatira mifungwa lulasheekeya nta umwi waawo naturushuke-u.” Nawo vakaamba, “Kevetana shaasa kyakusenya kumuni.” Nawe nkohani kaamba, “Luvese mbele Iruva-te.”

³⁷Nawe Sauli kavesa Nndumi Iruva, “A ndesa kwakunda lusore Vafilisti? A ndesa kushevavikaa maakony a Israeli?” Lyo Nndumi Iruva nalandouwe nta kindo nkonu ulya.

³⁸Naasa llyo Sauli alevia vandu, “Oshon na yaa moose yeni vasonguru va vandu mumanyi shaasa ulyamari elu lwa inu kikai.

³⁹Naambo mumanyi mmbo shamuvia na irina lya Nndumi Iruva yeu mwiiwouwa Israeli, kwakoya ulyamari elu n'kwa mwanaakwa Yonatan lukai, naakwa niwe mmbo kinkooye nafwe.” Lyo kulaonike-u nta nndu anndouwa.

⁴⁰Naasa kavia Israeli woose, “Yeni kaeny taari yaany, na yeny na Yonatan taari ingi.” Nawo vakavia Sauli, “Tana ekyo kyakusenya.”

⁴¹Naasa Sauli kavia Nndumi Iruva, we Iruva wa Israeli, A nkiki elyi kulaore kwarouwa nsero wafo? Kwakooya ulyamari elu llwakwa ao llwa mwana wakwa Yonatan nkyelooreny na kura ya Urimu woi Nndumi Iruva, na kwakooya ni ya Israeli kuloore na kura ya Tumimu? Kura yiikikabwa ikoora ni Yonatan na Sauli, vandu vakaashuka.

⁴²Sauli kaamba, “Ulaalu kapa lyingi yakwa na mwanaakwa Yonatan. Neeto Nndumi Iruva ashelooraa, ifwa nafwe.” Naasa vandu vakavia Sauli, “Indo nkivaafo.” Lyo Sauli kavaitikya, na kura ikakapwa yakwe na Yonatan, nayo ikoora ulyamari llwa Yonatan.

⁴³Naasa Sauli kavia Yonatan, “Shivia ekyo kuletana.” Naasa Yonatan kavia Sauli, “Ni dede yeny shilelya wuki shilepaana na nsengye ulya sheerye, nakyo ulaalu kishikooye shifwe kimaruma kya vayo.”

⁴⁴Nawe Sauli kaamba, “Na irina lya Iruva nkuti kufwe mwanakwa Yonatan.”

⁴⁵Nalyo vandu valya vakavia Sauli, “A mmbo kivaa inda Yonatan nafwe, nndu aleende uvingi uniini indo kunu Israeli? Oode, na Irina lya Nndumi Iruva lulareke nta ufiilumwi lwa nrewe wakwe-fo, mashika we mmbo arunda ekee na Nndumi Iruva inu.” Niindo vandu yewo vakaauwa Yonatan iwaawa.

⁴⁶Naasany, llyo Sauli alera isora Vafilisti, nawo vakeenda urukeny lwawo.

⁴⁷Naasa Sauli eekiva mangyi ya Israeli, kakapana na vakiduva vakwe va taari toose apookya Moabu, Amon na Edomu na vamangyi va Soba, na Vafilisti, woose kavavinga.

⁴⁸Kava nkaari kavekapa na Vaameleki, kaauwa Israeli maakony awo yewo venkamarwa mfungwa.

⁴⁹Nawo vana va Sauli ni Yonatan, Ishvi, Malkishua. Na marina a vefu vakwe ni Merabu na wa kavii ni Mikali.

⁵⁰Na nka wa Sauli ni Ahinoamu mfu wa Ahimaasi. Na irina lya mwisalallya itorito vakwe ni Abineri mwana wa Neri, nawe ni mwanawo wa ndeye.

⁵¹Nawe Kishi ni ndeye wa Sauli, na Neri we ndeye wa Abineeri vakava ni vana va Abieli.

⁵²Kyeeri kyoose kya Sauli mmbo kweefo fira shiingi teekapa Vafilisti. Nawe Sauli kasanyirya vandu woose yewo vekee varango vakava vakaari naambo vakae nawe.