Read BIBILLYA Mareiyo Meele a Iruva 1 SAMUELI 16 Bible Online

1 SAMUELI 16 - BIBILLYA Mareiyo Meele a Iruva bible

1 SAMUELI 16

¹Nawe Nndumi Iruva kavia Samweli, “A mmbo kuiyaa kya Sauli indo kufike kwi kwakooya ni yeny shilellema nalakive mangyi ya Israeli?” Naasa, ishurany wombe lwafo mafura kundefika kulya kwa Yese nndu wa Betlehemu kimmba shammbonisa mangyi efo vaneny vakwe.

²Samweli kaamba, “A mmbo nshendaa inda, mashika Sauli kamanya mmbo ashiwaa.” Nawe Nndumi Iruva kammbia, “Ipoo ngashe ya ng'umbe kwaambe,” Mmbo shasheutya Nndumi Iruva kiraso.

³Endevaanga Yese nashe yoo kwayuutya firaso neeny nshekooraa kyeetana, “neeto nshensendaa mmbwe kumwambe mafura.”

⁴Nawe Samweli katana kilya Nndumi Iruva alemmbavasya, keenda Betlehemu. Nawo vamiku va muri ulya vakashemwaambya veereremaa, vakammbesa, “A ndesa mmbo kwasha kya mafoo?”

⁵Nawe kavavia, “Yee, n'kya mafoo.” Kwiilyisen-te, yeny mmbo shasheutya Nndumi Iruva kiraso. Sangeny neeny luute firaso. Samweli kailyisa Yese na vana vakwe llyo vakashany yuuta firaso.

⁶Naasa llya valesha Samweli kalola mwana ulya wa Yese we Eliabu, kakusara efo nriminy, “Ni dede yeu mmbwe nsauwe wa Nndumi Iruva.”

⁷Kyeendi Nndumi Iruva kavia Samweli, “Kulalole fwana yakwe nta waasha lwakwe-fo, mashika nshiwe shinkundye-fo.” Mashika Nndumi Iruva nnyalolaa sha nndu wa vandu-fo. Mashika vandu mmbo valolaa fwana ya nndu, lyo Nndumi Iruva we kalola nrima.

⁸Nalyo Yese kavaanga Abinadabu kamwiita alya Samweli akai. Nawe kaamba, “Nta yeu Nndumi Iruva nnyalensauwa-fo.”

⁹Yese keetau Shama. Samweli kaamba, “Nta yeu Nndumi Iruva nnyalensauwa-fo.”

¹⁰Niindo Yese aleetau vana vakwe mfungare, na Samweli kaveamba, “Nndumi Iruva nnyalesauwa nta umwi wa yeva yaa-fo.”

¹¹Naasa llyo Samweli alevesa Yese, “A vana vafo woose vaiyo yaa?” Nawe kammbia, “Eefo n-du wa yeva, nawe mmbo akeiisa moonri.” Samweli kavia Yese, “Nkyeruma nndu nandeendwa mashika kulore asha llukaa rembo-fo.”

¹²Nawe karuma nndu, mwana ulya kandeendwa. Nawe mmbo adodorye katira miso asenyi na yuumba lyakwe lyikasenya. Nawe Nndumi Iruva kavia Samweli, “Naasa, kwiipoo kumwambe mafura, mashika yeu mmbwe.”

¹³Samweli kaipoo wombe lwa mafura, kamwaamba mafura alya mbee ya vana vamaye. Na mumuyo wa Nndumi Iruva ukasheya Davidi na finya nnu uka nkonu ulya. Eekimaa ekyo Samweli kakuwuiyany na kulya Rama.

¹⁴Nato mumuyo wa Nndumi Iruva ukara Sauli, Nndumi Iruva kanrikya mumuyo nkasha, ukansaveesa.

¹⁵Nalyo mashinga a Sauli kammbia, “Kulollye, Iruva mmbo akurikya mumuyo yeu nkasha naambo ukusaveese.

¹⁶Kyasiany Nndumi Iruva weeru nalurumi yese lukee yaa lunderuuya nndu akee nndango weekapa kinanda kya ura, na kyeeri mumuyo yeto nkasha wauka kwa Iruva ushekusheyaa, we kakapa kinanda ekyo llyo yewe kusheelelisywoo.”

¹⁷Naasa Sauli kavavia, “Nkisha, endeshiruuiyeny nndu nndango weekapa kinanda ekyo muusheengye.”

¹⁸Nalyo umwi wa mashinga akwe karouwa kaamba, “Mmbo shilelollya mwana umwi wa Yese wa Betlehemu akee nndango weekapa kinanda kya ura, kaveva nndu nsha akundyo ni Nndumi Iruva nawe mmbo akee nndu nkaari wa fira, areraa marero a urango.”

¹⁹Naasa llyo Sauli karikya Yese varumi vakwe, kammbia, “Shirumya mwana wafo Davidi, yeto eshiisa moonri.”

²⁰Yese kepoo mishungu weiipoo mikate, na mboloko ya mfinyo, na ngurana yeeshisha, kafirika Davidi nanderwaaya mangyi Sauli fya pya.

²¹Nawe Davidi kandefitwa alya Sauli akai, kallola kankunda deny. Kammbika nave mwiiboo fisha filya fyakwe.

²²Naasa Sauli karuma nrumi kwa Yese kammbia, “Mmbo shakutereva Davidi nakae neeny, mashika shammukunda.”

²³Naasa kyeeri mumuyo ulya nkasha ulerumwa ni Iruva alesheya Sauli, Davidi kawarya kinanda kyakwe kya ura, kakikapa, na Sauli kaelelisyo, nato mumuyo eto nkasha ukanra.