Read BIBILLYA Mareiyo Meele a Iruva 1 SAMUELI 18 Bible Online

1 SAMUELI 18 - BIBILLYA Mareiyo Meele a Iruva bible

1 SAMUELI 18

¹Nalyo Davidi eekimaa irera na Sauli, Yonatan kakundana na Davidi deny, nrima wa Yonatan ukakunda Davidi nnu.

²Sauli nawe katira Davidi nalakikunde nawuye kyen kwa ndeye.

³Yonatan na Davidi vakakundana vakatana vavikyana kyaasa.

⁴Yonatan kakuuta soori yakwe ya uwe kavika Davidi na masara akwe na usu na ura na nkanda wa kisiny.

⁵Davidi katana wo kindo shaasa Sauli alemmbavasya, katana nisha, Sauli katana ammbika mwiisalallya vandu va fira. Vandu woose vakafura ando amwi na varundi va Sauli.

⁶Naasa kyeeri Davidi alemaa iwaa Mfilisti ulya, vaka vakasomukya wooka miriny myoose ya Israeli veeshiimbaa neefina naambo vasheambya Sauli. Mmbo veerye fiperengete na finanda vekapaa ukoru.

⁷Vaka valya vakeemba na yiirikyana indi, Sauli mmbo awaa fikufyakwe Lyo Davidi mfiku makumi.

⁸Sauli ekiita indo katirwa nkifirifiri deny, kasukyo nnu mmarero yoo, kaamba, “Davidi we mmbo vanniinga fiku makumi, neeny vakashiniinga kiku kyeni, a yekyo ashiidimaa-se iwonisa nkyoki kuuta umangyi weni?”

⁹Uka nkonu ulya Sauli katirya Davidi kififi.

¹⁰Elyi lya ndesi ya vayo mumuyo nkasha wuuka kwa Iruva ukasheya Sauli sha ikafya-da, kaororo efo kyeny kwakwe. Nawe Daudi kava mwiikukapya kinanda kyakwe kya ura shaasa eeshivye. Sauli katira ifumu efo wokony lwakwe.

¹¹Sauli keera ifumu llya eekusarye mmbo lyidoshaa Davidi lyindekooya isimamba wa mmba. Davidi kakukanga kavii karishya kwaasha.

¹²Sauli keeryaa Davidi mashika elyi Nndumi Iruva eekee nawe kanra we.

¹³Kimaruma kya vayo Sauli kansomuta efo kwakwe kammbika isalallya vasikari kyiku.

¹⁴Davidi kava nndu mwaarya deny efo mitanyiny yakwe. Nawe Nndumi Iruva kankaya.

¹⁵Sauli eekilollya shaasa Davidi aletana fya waarya, kamwiiryaa.

¹⁶Nawo vandu na Israeli na Yuda vakakunda Davidi mashika aleva mwivarundya.

¹⁷Naasa Sauli kavia Davidi, “Mmbo nkuningaa mfu wakwa nniini we Merabu nave nka wafo, lyo yewe kuve nsikari wakwa nkaari wa fira, kukapani fira na vandu va Nndumi Iruva Mashika Sauli mmbo alekusara we nalakimmbwaafo, nandewaawa ni Vafilisti.”

¹⁸Naasa Davidi kavia Sauli, “A yen ni vi, na vandu vakwa mmbo vaki, ao va mmba ya nde, shitani shava nkwaa mwona wa mangyi?”

¹⁹Lyo kufii Davidi nooriswa Merabu, koorwa ni Adrieli nndu wa Meholati.

²⁰Lyo mfu wa Sauli, Mikali kakundana na Davidi. Vandu vakandevia Sauli, nawe kikansenya.

²¹Sauli kaamba efo nriminy, Ra namoore nambiyye nreiyo, na Vafilisti nawo vambereye. Naasa Sauli kavia Davidi lya kavii, “Kukeeva nkwe wakwa.”

²²Naasa Sauli kavia mashinga akwe, Rereny na Davidi kirika mumbie, “Mangyi mmbo akukundye, na vandu vakwe mmbo vakukundye. Kuviyye nkwe wa mangyi.”

²³Nawo vandu va Sauli vakavia Davidi marero yoo moose. Davidi kavavia, “A yeni mmulollye shaasa kikee kindo kiniini iva nkwe wa mangyi neeny shikee mwana wa ngwera, shilaishiwa nta?”

²⁴Nawo vandu va Sauli vakandemmbia shaasa Davidi aamba.

²⁵Naasa Sauli kaamba, “Vieny Davidi indi, Mangyi nnyakundye findo fya ukwe-fo, mmbo akundye kurini Vafilisti iyana kumweengye, kive nkyo ataiya nakyo vakiduva vakwe.” Sauli kakusara nnyo shia arumataa nayo Davidi.

²⁶Kyeeri vandu va Sauli valevia Davidi marero yoo, Davidi kafura deny naambo nave nkwe wa mangyi. Nalyo nkwemmiira-u mikonu miingi-fo,

²⁷Davidi kakupoo na vandu vakwe, kandewaa vafilisti mayana avii. Davidi kavarina keengye mangyi Sauli mashong'u moose, naambo nave nkwe wakwe. Sauli kanniingya mfu wakwe Mikali nave nka wakwe.

²⁸Sauli eekilollya indo kamanya Nndumi Iruva mmbo akee na Davidi. Na Mikali kakunda Davidi nnu.

²⁹Sauli keengera yiiryaa Davidi na insua.

³⁰Wo kyeeri vasonguru va Vafilisti vakakwiipoo vakapani na Israeli. Lyo wo kyeeri Davidi katana fya urango kailanya vandu va Sauli woose. Davidi keengera itira nnduma.