Read BIBILLYA Mareiyo Meele a Iruva 1 SAMUELI 20 Bible Online

1 SAMUELI 20 - BIBILLYA Mareiyo Meele a Iruva bible

1 SAMUELI 20

¹Nawe Davidi karisha ooka kulya Rama kandesora Yonatan, kammbesa, “A mmbo ntanaa inda? Nkyoki shitannyi? Nkyoki shilyamarye ndoo kutani akunda ishiwaa?”

²Nawe kammbia “Nkullyamarye-fo.” Kweekyo nkufwaafo. Kwiishi, nde nnyatanaa nta kindo kimwi kulore ashivia-fo, kyikava kidu ao kiniini. Nawe nkiki elyi eeshisurumaa kindo eki? Shaasa kukeamba nshi indo-fo.

³Davidi kammbia deny, “Ndoo mmbo alelollya shaasa lukundani, nkyo nawe kakunda kulamanyi kindo eki, naambo kulasue.” Lyo nkindo kya dede. “Mmbo shakuvia na irina lya Nndumi Iruva na kya nrima yeto wafo, muu wakwa mmbo ukee kufii den na ufu.”

⁴Nawe Yonatan kavia Davidi, “Mmbo nkweekyaa kindo kyoose kukundaa.”

⁵Nawe Davidi kavia Yonatan, “Ndesi llyo mwiiri ulollyoo, neeny mmbo kishikooye ilya shoonga na mangyi, lyo mmbo shikeeindoovya kulya imungony ando a mikonu iraru.”

⁶Naasa ndoo kallollya nshiiyoo, amba, “Davidi mmbo aletereva muumu neende kwawo Betlehemu, mashika mmbo vandu vakwe vakeyuutya-fo Iruva kiraso kya mwaaka.”

⁷Kammaamba, “Naasa nkisha llyo na yeny nsero wafo nshetiraa ufoo nriminy.” Lyo kammisua, llyo kumanyaany mmbo arye ishitanya kindo kikasha.

⁸Kyasia, shitanya mesha yeny shikee nsero wafo kimaruma kya kyaasa kyeru mbee ya Nndumi Iruva. Lyo kwakooya kwiifo nriminy wakwa, shiwaa yewe kumuni, kulashirwaaye ndoofo.

⁹Yonatan kammbia, “Ekyo kiire kwaasha, mashika kukooye sheeshi nde mmbo akundye ikutannya ukasha, a mmbo sheeraa shilakuvia?”

¹⁰Davidi kavia Yonatan, “A ni vi asheshiviaa kwakooya ndoo arera kikasha kyakwa?”

¹¹Yonatan kammbia, “Nnde lweende kulya mareminy-te. Vakasomuka vakeenda nafo.”

¹²Naasa Yonatan kavia Davidi, “Nndumi Iruva wa Israeli nave nkureeki. Kyeeri shimaa ivesa nde, ndesi kyeeri eki, ao nrondo, kwakooya kwiiyoo irero isha kwafo, mmbo shiraa shilelyikweengye?

¹³Nawe Nndumi Iruva nasheekye kwakooya nde mmbo akundye ikutannya maravi neeny shara shilakuvia, neekura kutire ufoo nriminy. Nawe Nndumi Iruva nakukaye, shaasa alekaya nde,

¹⁴Llyo neewe kusheshooraa isarya lya Nndumi Iruva naambo shilafwe, nshi ulaalu-fo, mashika ulaalu shiiyo.

¹⁵Ando amwi na va mmba yakwa kuvaore usaari lwafo, kyeeri ekyo Nndumi Iruva ashevikaa vakiduva va Davidi woose kwaasha nawe.”

¹⁶Naasa llyo Yonatan kavikya mbuya yakwe Davidi kyaasa, kammbia, “Kwakooya kwafisha kyaasa eki Nndumi Iruva mmbo ashekuvesaa.”

¹⁷Yonatan kalyisa Davidi mboo lya kavii kimaruma kya ikunda lyawo neelyi enkundye shaasa akukundye we muni.

¹⁸Yonatan kammbia, “Kubookkya ndesi llyo mwiiri ulollyoo, neewe kuwiike kwa mangyi.

¹⁹Kukammiirau mikonu iraru, wuya uviny kundekaa efo koovye ulaalu, kundeovya alya nsau.

²⁰Llyo yeny nsheasaa mife iraru yoo mbai, vai kive sheelyi nkindo nkeyaasa.

²¹Shirumin mwana nasherorwa mife yeyo. Shammivya mwana yeto, Mife yeyo mmbo ikee taari yafo, llyo yewe kukusheyaa, nkikee kikasha taari yafo-fo, mmbo shakuvia deny na irina lya Nndumi Iruva.

²²Lyo shammivia mwana yeto ‘Mife mmbo ikee kulya mbee yafo, naasa llyo yewe kuriishaa,’ mashika niindo Nndumi Iruva akoora.

²³Na kya filya lulevikyana kyaasa yeny neewe, Nndumi Iruva nalweekye kive indo llung'anu.”

²⁴Naasa Davidi koovya efo mareminy, na elyi mwiiri ulelollyo mangyi kaanga nalye shoonga.

²⁵Kakaa rembo shaasa eeishivye yoo kufii na isimamba, Yonatan kakaa yoo mbee yakwe, Abineeri kakaa kufii na mangyi. Lyo kitima kya Davidi nkyetiri nndu-fo.

²⁶Indi Sauli nnyaleamba kindo nkonu yeto-fo, mashika mmbo alekusara kulakooye nkindo kya nkooya kava ntefusu.

²⁷Elyi lya ndesi nalyo-da kitima kya Davidi nkyeetiri nndu-fo. Naasa Sauli kavia mwana wakwe Yonatan, “Nkiki elyi nsoro yeu wa Yese nalakeesha ilya shoonga neese, nkwaany na yenu-da?”

²⁸Yonatan kavia ndeeye Sauli, “Davidi mmbo aleshitereva deny naambo neende kwawo, Betlehemu,”

²⁹kashivia, “Nshakutereva muumu sheende, mashika vandu va ufyari lweru mmbo vakeniingya kiraso, neeny nshavaangwa sheende. Naasa ulaalu shakutereva kushiirikye sheende indekwaanya na vana va ma yewo. Eki nkyo kimaruma kulore ashelya shoonga na mangyi yaa inu na ukoou.”

³⁰Sauli akiita indo karosya Yonatan unyafi, kammbia, “Yewe mmbo kukee mwana wa nka mbafu. Mmbo shilaishi sheelyi yewe mmbo kukundani na mwana yeu wa Yese kikuviyye sony yewe kumuni, neewe kwava nravi sha mau!

³¹Mashika kyeeri kyoose mwana yeu wa Yese aiyo, nkuvonisaa nta usha lumwi fo, nta umangyi nkuvonisaa-fo. Kyasia, ruma vandu nandeendwa uviny, mashika lyo nkuti nafwe.”

³²Yonatan kavia ndeye Sauli, “A nkiki elyi afwaa? Nkyoki atannyi?”

³³Akiita indo Sauli kamweerya ifumu. Yoo nng'u Yonatan alemanya dede sheelyi Sauli mmbo akundye iwaa Davidi.

³⁴Nawe Yonatan kooka alya ikwaanuny lya shooga, eetirwa mbunyafi, kulore nta allya shoonga mashika elyi alerovyo nriminy nnu kimaruma kya Davidi, kantinnywo, na elyi ndeye alensutya alya shoongeny.

³⁵Elyi lya ngama Yonatan keenda kulya mareminy kyeeri kilya alevikyana kyaasa na Davidi, nawe keenda ariani na mwana n-du.

³⁶Naasa kavia mwana yeto wakwe, “Enda risha, elyi nshaasa mife kusheengye.” Nalyo elyi mwana yeto eefo asheendaa, kaasa mfe ukeera uwe yakwe.

³⁷Na mwana llya alefika alya mfe ulya ulewa, Yonatan kakooma kavia mwana ulya, “A mfe eto nshi efo mbee yafo ukai?”

³⁸Kakooma lyingi kammbia, “Kyasia angusya swany. Mwana ulya kasang'irya mife ilya keengye nndumi wakwe Yonatan.”

³⁹Lyo mwana ulya we nnyalemanya kya mife ilya-fo. Ni Yonatan na Davidi veni veeshi.

⁴⁰Nalyo Yonatan karambikya mwana fisha fyakwe kammbia, “Rwaa kyeny.”

⁴¹Naasa mwana ulya ekimaa yeenda, Davidi kooka alya mbangeny eeovye, kawa si kifulufulu, kawuya kakwiinyika kararu, vakakumiminda na Yonatan, vakayya nnu. Davidi kasokyo nnu mfyoova.

⁴²Nawe Yonatan kavia Davidi, “Kweengye na ufoo, lyo yese luvaavi mmbo lulevikkyana kyaasa na irina Nndumi Iruva sheelyi Nndumi Iruva nalukaye yoo nnang'ani yeeru, navekaa yoo nnang'ani ya vandu vafo na vandu vakwa llung'anu.” Davidi keenda. Yonatan nawe keenda kwakwe kulya muriny.