Read BIBILLYA Mareiyo Meele a Iruva 1 SAMUELI 25 Bible Online

1 SAMUELI 25 - BIBILLYA Mareiyo Meele a Iruva bible

1 SAMUELI 25

¹Nkisuku Samweli kafwa, na Israeli woose vakakuumbya ando amwi, vakamuiya, vakandika kyeny kwakwe kulya Rama.

²Nalyo Davidi kandesoka na kulya kasa ka Maoni. Nafo kweefo nndu eetiri masaa kulya Karmeli. Nndu yeu kava nsuri deny, nawe mmbo eetiri moonri fiku firara na mburu kiku. Nawe mmbo eesemaa moonri mafwaa yoo Karmeli.

³Nndu eto evangwaa Nabali, na nka wakwe ni Abikaili. Nkaakwe mmbo eetiri urango nnu kasenya miso, lyo mmi wakwe kava nndu nrung'ani, mwiitana meesi, nawe ekee wa ufyari lwa Kalebi.

⁴Naasa llya Davidi ekee kulya kasa kaita sheelyi Nabali mmbo akeesema moonri mafwaa.

⁵Nawe Davidi kanrumya vasoro ikumi, kavavia, “Enden kulya Karmeli kwa Nabali munrwaaye fiidikiro fyakwa.”

⁶Mukamfika-fo mumbye indi, “Ufoo lukae na yewe, na efo kyeny kwafo, nalo lukae na vandu vafo woose.”

⁷Na yeny mmbo shileeta sheelyi kutiri vandu vakeesema moori afo mafwaaa. Veesi vafo mmbo vekee neese, nta lulavatanyi ukasha, nta mmbaletura kindo llya vekee efo, Karmeli-fo.

⁸Vavese mbony eto nawo vakoongoyaa fyoose. Naasany warya vasoro yeva, kimmba lwasha nkonu wa pule. Mmbo shakutereva kuvaniinge kindo kyoose ekyo kukooyaa kwiitiri, wo vakee sha mashinga afo na yeny Davidi shikee nsero wafo.

⁹Naasa vasero valya vekifika kwa Nabali, vakaamba na marero yoo moose Davidi alevaruma, vakamaa, vakamalallya.

¹⁰Naasa Nabali kavia vasoro yewo na Davidi, “A Davidi ni vi? A mwana wa Yese mmbwe vi? Fyeeri efi mashinga mengi mmbo akeerisha kwa vandumi vawo.

¹¹A yeny mmbo shiniingyaa nkate wakwa, na mura, na findo efyo shanshishya vandu vakwa yewo vakeesema moonri akwa mafwaa, shiniingye vandu shilaishi nta kundo vafuma nafo?”

¹²Naasa vasoro valya va Davidi vakainduka vakeenda, vakasheruuya Nndumi Iruva waawo marero yoo moose.

¹³Naasa Davidi kavia vandu vakwe, “Nkye nndeny, wo nndu na usu lwakwe, Davidi nawe keepoo usu lwakwe, vakasora Davidi.” Nawo vekee vandu mayana aana: vandu mayana avii wo vakarewa veringaa kyeny.

¹⁴Lyo nsoro umwi kandevia Abikaili mbony tilya, kaamba, “Davidi mmbo aleruma vandu wooka kulya kasa naambo vasheidikira mmi wafo, lyo we kavainyala.”

¹⁵Nawo ni vandu valelutanya mesha nnu, nta llulelollya ukasha loose ao ireta nta kindo-fo kyeeri ekyo kyoose lwekee nawo.

¹⁶Vandu yeva mmbo vekee varingi veru kio na nsanyiny kyeeri kyoose lwekeyiisa moonri.

¹⁷Ulaalu manyany kukusare kyeetana, “Mashika mmbo kyanrerwa kikasha nnu kya Nndumi Iruva weeru na mmba yakwe shoose, kimmba akee nndu nalavaa, nta kilamaa nndu narere nawe.”

¹⁸Abikaili kaangusya yiipoo mikate mayana avii, na mboloko ivii ta mfinyo, na suva shishishe isaanu, na bakuri isaanu ta piisi, na fivale iyana fya ndunda ta nsabibu, na mikate ya ndunda mayana avii, karika mishungu.

¹⁹Kookafo kavia vasoro vakwe, “Nkye ndifony, shiifo nshaa. Lyo nnyalevia mmi wakwe Nabali-fo.”

²⁰Elyi eefo asaamyi nshungu wakwe eshoolokaa ando a kisambalo, kalollya Davidi nawe eshoolokaa ariani na vandu vakwe, kavakooya.

²¹Nawe Davidi mmbo emmaamba, “Naasa mmbo kileva kya ruu parany elyi shileringya nndu yeu masaa akwe moose, kilareke nta kindo kimwi kyakwe.’ We ulaalu mmbo ashitaa na makasha ando a mesha.

²²Iruva nashitanyi sha vakiduva vakwa, kwakooya elyi kwiikyaa efo kwakwe kusherewaau nta kimwana kya kyuumi.

²³Abikaili ekilollya Davidi kaangusya uviny yooloka nshunguny, kawa kifulufulu yoo mbee yakwe.

²⁴Kawa yoo marendeny akwe, kaamba, “Woi Nndumi Iruva wakwa uravi yelu llwakwa yeny shimuni, uravi yelu lushiwoye yeny, woi mmbee aranya kishinga kyafo kiireraa neewe.”

²⁵Shakutereva woi Nndumi Iruva wakwa, kulalole mbony ta nndu yeu wa tangalu Nabali-fo, Shamashika shaasa irina lyakwe lyikai niindo nawe akai. Ni urung'ani. Lyo yeny kishinga kyafo nshilelollya vasero yewo Nndumi Iruva wakwa kulevaruma-fo.

²⁶Naasany woi Nndumi Iruva wakwa na irina lya Nndumi Iruva na irina lyafo, kimmba Nndumi Iruva ankwiima kulashepuswa samu nta kulakitaiye kiduva, naasany ulaalu vakiduva vafo neewo vakukundye makasha vavake Nabali ulaalu.

²⁷Na findo efi fya pya sheengye Nndumi Iruva wakwa nafiwarye maakony a kishinga kyakwe naniingye vasero vakwe variani nawe.

²⁸Mmbo shakutereva kusarye ukasha lwa kishinga kyafo, mashika shiishi deny nkuti Nndumi Iruva navangise mmba ya Nndumi Iruva wakwa, mashika elyi ava mwiikapana fira na Nndumi Iruva, nalo uravi llushelollyoo kwafo nta kyeeri kimwi-fo.

²⁹Naakwa nndu wa vandu aamba ni ikureiya nakuwae, Nndumi Iruva mmbo ashenringaa, we Iruva wafo, na vakiduva vafo vashefwallyo kwaasha.

³⁰Na elyi Nndumi Iruva asheinutyaa efyo fyoose avikye Nndumi Iruva wakwa kyaasa, neekusaleesa kushillye Israeli,

³¹eki nkisheendee nsindara nta isukya Nndumi Iruva wakwafo, kimmba nalandepuswe samu ya nndu kikee kya ruu, ao nta itaiya kiduva kwa yewo vansuuye-fo, “Neelyi Nndumi Iruva, iruva asheinutyaa mesha yoo kwafo llyo kushikummbwe na yeny kishinga kyafo.”

³²Na Davidi kavia Abikaili, “Nndumi Iruva, Iruva wa Israeli navikkywa mbora, yeto akuruma nkonu yeu kukwaanannye neeny!

³³Lyivikywa mbora ikusaro lyafo na kuvikkywa mbora yewe kweedima ishipaaya inu shilapusswe samu na itayya kiduva na woko lwakwa shimuni.

³⁴Mashika dede ya Nndumi Iruva, Iruva wa Israeli, yeto ashiima shilakuwaa, kukooye kulore kwaangusya ishisheya, Nabali yeu nnyereeyoou nta mwana n-du wa kyuumi kufike ngama-fo.

³⁵Nalyo Davidi kawarya findo filya fya pya maakony a Abikaili, kammbia, “Naasa kuwuiyeny na ufoo kweende kyeny.” Shankwiirikya yewe neefyo kwashivia.

³⁶Naasa Abikaili kashekooya mmi wakwe Nabali, ammbika sukukuu niini ya kimangyi, kakyesa nnu mashika ennangwa, mmbwari. Nkyo Abigaili nnyalemmbia nta kindo kimwifo, fika elyilya ndesi.

³⁷Nalyo elyi lya ndesi kyeeri wari wammaa isya nrony, nkaakwe kammbia fyoose shaasa kyava, nawe kaawukwa kava sha iwe.

³⁸Kwiikisia mikonu ikumi, Nndumi Iruva kakapa Nabali, kafwa.

³⁹Davidi eekita Nabali amfwa, kaamba, Nndumi Iruva naarafumwa yeu alekaa kyaalu kyakwa kya efyo Nabali aleshitannya, nawe kashiima yeny ishinga lyakwe shilashelyamara. Nawe Nndumi Iruva kaviirya Nabali uravi lwakwe muni. Nawe Davidi karuma vandu vandeende Abikaili nave nka wakwe.

⁴⁰Nawo vandu va Davidi vekisha kwa Abikaili kulya karmeli, vakammbia, “Davidi mmbo aluvia lushekwiipoo kundeva nka wakwe.”

⁴¹Nawe kawa si kifulufulu kaamba, “Lola kishinga kyafo mmbo kikee ishinga lyeesangya vasero vafo marende.”

⁴²Nalyo Abikaili kaangusya, kasaama nshungu aryani na fishinga firaanu fyeemwiimya, kasora varumi yewo va Davidi kandeva nka wakwe.

⁴³Nawe Davidi ammoora Ahinoamu wa Yezreeli ulaalu katira na Abikaili kava nka wakwe.

⁴⁴Nalyo kyeeri Sauli emmuninga mfu wakwe Mikali ulya aleniingwa Palti wa Laishi nndu wa Galimu.