Read BIBILLYA Mareiyo Meele a Iruva 1 SAMUELI 26 Bible Online

1 SAMUELI 26 - BIBILLYA Mareiyo Meele a Iruva bible

1 SAMUELI 26

¹Naasa Vazifi vakasora Sauli kulya Gibea, vakammbia, “A Davidi nshi kulya ifumbuny lya Hakila oovye, taari ya Yeshimoni?”

²Sauli kakwiipoo kandesoka na kulya kasa ka Zifu, eerye vandu fiku firaru, vasauwe efo Israeli koose, naambo wanderuuya Davidi kasoka Zifu.

³Sauli kashekabya meema alya kidoorony kya Hakila, kulella Yeshimoni, mbai ya shia, Lyo we Davidi ntaari ta kasa eekai, nawe Sauli kandenduuya-fo-da.

⁴Davidi karuma vandu va saa, kamanya songosiny sheelyi dede Sauli asheye nafo.

⁵Davidi kakupoo kandefika alya Sauli aleemuya, Davidi kalla ando Sauli alele, Abineeri wa Neri mwiisalallya vasikari va Sauli. Sauli kalala yoo nnang'ani ya ulale, na vasikari vakandingitya riti.

⁶Nalyo Davidi kavesa n'kohani Ahimeleki, Mhiti na Abishai mwana wa Seruya, mwanamaye wa Yoabu, “Mmbi andee neeny lweende kulya ulaleny kwa Sauli?” Abishai kaamba, “Yeny shindee neewe.”

⁷Davidi na Abishai vakakupoo kio vakandefika kulya ulaleny, vakakooya Sauli eelele yoo nnang'ani kavii ya mitika arekye nrwen deny, nalyo ifumu lyakwe lyikavaayo yoo nrweny wakwe, nawe Abineeri na vandu vakwe valele nrony vandingitye.

⁸Abishai kavia Davidi, “Ekakau Iruva ammbika nkiduva wafo maakony afo inu. Kyasia shira shinkape naifumu elyi lyakwe muni lyimwi nsi nalyo lyaange lyindetira sumbai, nshikapaa kavii-fo.”

⁹Lyo Davidi kavia Abishai, “Kulampaani-fo, A ni vi ashidimaa iwaa nsauwe wa Nndumi Iruva nare nalataiyo?”

¹⁰Davidi kaamba, “Mmbo shaamba na irina lya Nndumi Iruva, Nndumi Iruva nkuti nantaiye nato nkonu waifwa lyakwe kuti unkooye, ao neende fireny nandefiiyafo.”

¹¹Ra deny, yeny nshipaanaa nsauwe wa Nndumi Iruva-fo. Lyo lwiipoo ifumu elyi lyakwe, na kiiya ekyo kya mura, lweende nafyo.

¹²Naasa Davidi keepoo ifumu llya na kiiya kilya kya mura vakawara shia vakeenda, lyo vandu valya veelele nkwiiyoo alemanya-fo, nta mmbalekusinisa-fo, mashika mmbo veelele deny, kimmba Nndumi Iruva emmbarikya rwe shiroo.

¹³Nalyo Davidi kookau keenda kwakulya ya imungo llya, handesalala uwe ya kidooro, ando kutiri mwaanya nsha,

¹⁴nawe kakooma na unyanga waasha, kakoomya vasikari va Sauli na Abineeri nsongoru waawo, kaamba, “Abneri kushiitye?” Abineeri kammbia “A nnyewe vi kukeyaanta mangyi na vandu vakwe?”

¹⁵Nawe Davidi kammbia, “A yewe nshi kukee nndu nkaari, nta kulaifo ungi sha yewe kunu Israeli koose.”

¹⁶A nkiki elyi kulore kuleringa mangyi wafo Nndumi Iruva, nsauwe wa Nndumi Iruva. Nkyeloleny kwakooya ifumu lya mangyi lyiiyo na kiiya kyakwe kya mura filya fyeekee yoo nrony wakwe?

¹⁷Naasa Sauli kamanya elo ni unyanga lwa Davidi, kammbia, “Nnyewe-ro mwana-kwa Davidi?” Nawe Davidi kammbia, “Yee, ni yeny, mangyi wakwa Nndumi Iruva.”

¹⁸Kammbia, “A Nndumi Iruva wakwa mangyi mmbo akeeshivinnya indo nashiwaa nkiki? Nkyoki deny shilyamarye?’ Ukasha lwakwa llungalu?

¹⁹Naasa ulaalu shakutereva woi Nndumi Iruva wakwa mangyi kushaaranyi nisha yeny ishinga lyafo, Kwakooya ni Nndumi Iruva akuvavasye kushiwaa, kiraso kyakwe kishiidimaa yaalasha elyi aterewa, lyo kwankooya ni vandu vakeekwiitika, mmbo vadengwaa na irina lya Nndumi Iruva mashika mmbo vakeeshirishisa inu naambo shilakae na vandu va Nndumi Iruva vakashivia ‘Enderundya maruva engi.’

²⁰Naasany kulashire shifiiye kundo kungi, kwaasha na Nndumi Iruva-fo, Mashika nkiki lyo elyi mangyi ya Israeli asomuka nasheshiwaa yeny! Sheelyi nndu aruuyaa ngwale ngoroshony!”

²¹Naasa Sauli kammbia, “Shallyamara. Wuya mwanakwa Davidi mashika nshikikubaanaafo, mashika kulelollya muu wakwa nkindo kiniini. Lyo yeny mmbo shiletana kya urung'ani shalyamara deny.”

²²Davidi kammbia, “Nkyelola ifumu elyi woi mangyi, Ruma nsoro umwi nashelyoondwa.”

²³Nndumi Iruva mmbo ashetaiyaa wo nndu kiinani na mashora akwe, nawe Nndumi Iruva mmbo enkuvika maakony akwa, lyo shilakunde ipaana nsauwe wa Nndumi Iruva.

²⁴Na shaasa yeny shilelollya muu wafo nkindo kiniini kwakwa yeny, na muu wakwa uve kindo kiniini efo kwa Nndumi Iruva, nashaauwe ngatareny toose.

²⁵Nalyo Sauli kavia Davidi, “Iruva nakuvikye mbora mwanakwa Davidi, yewe mmbo kushevaa mwiitana findo finiini, kuvinge deny” Davidi keenda, na Sauli kawuya na kyeny.