Read BIBILLYA Mareiyo Meele a Iruva 1 SAMUELI 28 Bible Online

1 SAMUELI 28 - BIBILLYA Mareiyo Meele a Iruva bible

1 SAMUELI 28

¹Kyeeri ekyo Vafilisti vakaumbya itorito naambo vandekapana na Vaisraeli. Akishi kavia Davidi, “Manya nisha sheelyi yewe mmbo kukeenda neeny fireny ando amwi na vandu vafo.”

²Davidi kavia Akishi, “N'songosiny, ulaalu llyo kushelollyaa ekyo nsero wafo ashiidimaa itana.” Akishi kavia Davidi, “Mmbo shakuvika yewe kuve mwishiringa.”

³Nalyo Samweli emmaa ifwa na Israeli woose vakammbikya kiyyo, vakanndika kulya Rama, mfo muriny kwakwe. Nawe Sauli mmbo emaa yaanta veawuya fisuku woose kulya Israeli.

⁴Nalyo Vafilisti vakakuumba vakandemannya ulale kulya Shunemu, na Sauli nawe kasang'irya Vaisraeli woose kulya Gibea.

⁵Ekilollya itorito va Vafilisti, Sauli keeryaa nnu neererema kyuumu.

⁶Na kyeeri Sauli alevesa Nndumi Iruva, Nndumi Iruva nnyalendouwa nta na yoorya nta na Urimu ao Tumimu-fo, nta na vakisuku-fo.

⁷Naasa Sauli kavia vandu vakwe, “Shiruiyeny nka moose atiri mumuyo wa imanya, naambo sheende kwakwe shindevesa-fo. Vandu yewo vakwe vakammbia kulya Endori.

⁸Naasa Sauli kaalasha soori takwe, keenda ariani na vandu vavii, vakandefika kwa nka ulya kio, kammbia, Mmbo shakutereva kushiawuye kya yeto shikuviaa.”

⁹Nka ulya kammbia, “Kwiishi shaasa Sauli aletana, llya alewaa valya veetiri mumuyo wa umanyo na vasavi urukeny,” A mmbo kyava inda ulaalu elyi kwashivika ureiyony kuute muu wakwa

¹⁰Nawe Sauli kallyiya mboo na irina lya Nndumi Iruva, sheelyi nkwifo ukasha loose lunsheyaafo.

¹¹Llyo na nka ulya kaamba, “A ni vi yeto kunsendaa? Kammbia, ‘Ni Samweli.’”

¹²Nka ulya eekilollya Samweli kafua na unyanga uniini, kavia Sauli, “A nkiki elyi kwashilemba, ate yewe ni mangyi Sauli.”

¹³Mangyi Sauli kammbia, “Kulairyae-fo, a nkyoki kulollye? Nka ulya kammbia, ‘Mmbo shilollye mumuyo ukeyuuka efo si.’” Nawe kammbia, “Ukee inda?”

¹⁴Nawe kammbia, “Mmbo uwakye mmiku akusikye na soori.” Naasa Sauli kamanya yeto n'Samweli muni, kakwiinyika si na kisangu.

¹⁵Naasa Samweli kavia Sauli, “Nkiki elyi kukeeshaatara, kwashirosa uwe?” Sauli kammbia, “Mmbo shammaatarika deny, mashika elyi Vafilisti yewo vakundye fira,” nawe Iruva kashira nalakirere neeny, nta na vakisuku, ao na moorya, Nkyo shakuvaanga yewe naambo kushivie kyeetana.

¹⁶Samweli kaamba, “A kwakooya Nndumi Iruva alenkura nkiki elyi kwashivesa yeny, a we mmbo akee nkiduva wafo?”

¹⁷We Nndumi Iruva Mmbo alekutannya shaasa eshivia shikuvie Nndumi Iruva mmbo alekusoka umangyi kanniingya amrasa wafo Davidi.

¹⁸Shamashika yewe nkuleirikya Nndumi Iruva-fo, nta nkuleinutya unyafi lwa Nndumi Iruva kwa Vaameleki-fo, nkyo kimaruma Nndumi Iruva kakutannya indo inu.

¹⁹Nalyo Nndumi Iruva mmbo ashevikaa Israeli woose maakony a Vafilisti neewe kusandywou. Na fika ndesi yewe na vana vafo mmbo mushilatyaa. Na kingi-da Nndumi Iruva mmbo asherambikyaa itorito lya Israeli maakony a Vafilisti.

²⁰Sauli eeta indo kawa si kifulufulu, keeryaa nnu kyeendwa mmarero a Samweli, kasya finya piny, mashika nta nnyellya kindo nkonu piti sanda na kio-fo.

²¹Nalyo nka ulya kasora Sauli kakooya ammeengya deny, kammbia, “Kulollye, kishinga kyafo mmbo kyatana shaasa kweekundye, llyo muu wakwa ukakaa rengeny,”

²²Naasa ulaalu shakutereva kwaaranyi kiterewo kya kishinga kyafo, shikudeesye naako ni nkate umwi kulye neewonisa finya kukweengyeeny.

²³Lyo we kalema kaamba, “Nshikundye ilya-fo.” Lyo vandu valya vakwe na nka ulya vakallelembya, kairikya. Kakwiipoo yoo eekai kakaa rembo yoo kitareny.

²⁴Na nka ulya etiri ngashe shivanri, ikashishwa swany, keepoo nswa kasongosya mikate.

²⁵Naasa kadeesya Sauli shoonga ando amwi na vandu vakwe vakalya Vekimaa vakeepoo kyaaro kio kilya kyeni.