Read Swahilli Tobiti 13 Bible Online

Tobiti 13 - Swahilli bible

Tobiti 13

¹Basi Tobiti akatunga sala ya kushangilia, akisema, Amehimidiwa Mungu aishiye milele. Na ufalme wake umebarikiwa.

²Kwa maana hurudi, na kurehemu tena; Hushusha hata kuzimu, na kuinua tena; Wala hakuna awezaye kujiepusha na mkono wake.

³Enyi wana wa Israeli, mshukuruni mbele ya mataifa Yeye ambaye ametutawanya katikati yao.

⁴ Huko huko utangazeni ukuu wake; Mwadhimisheni mbele ya wote walio hai; Kwa kuwa Yeye ndiye BWANA wetu. Naye Mungu yu Baba yetu milele.

⁵Ataturudi kwa ajili ya maovu yetu, Na kutuonesha rehema zake tena. Atatukusanya kutoka kwa mataifa yote Ambao tumetawanyika katikati yao.

⁶Mkimgeukia kwa moyo wote na roho yote Na kutenda kweli mbele zake Ndipo atakapowageukia ninyi, Wala hatawaficheni uso wake. Angalieni atakavyowatendea; Mshukuruni kwa vinywa vyenu vyote; Mhimidini BWANA mwenye haki: Mkuzeni Mfalme wa milele. Katika nchi ya kufungwa kwangu namshukuru; Nawahubiri taifa la wakosaji nguvu zake na enzi yake. Enyi wakosaji, geukeni, mkatende haki mbele zake; Nani ajuaye kama atawakubali na kuwarehemu?

⁷Mimi namwadhimisha Mungu wangu; Na roho yangu yamkuza Mfalme wa mbinguni:

⁸Naam, nitaushangilia ukuu wake. Watu wote wamtolee shukrani katika Yerusalemu.

⁹ Ee Yerusalemu! Ulio Mji Mtakatifu! Atakurudi kwa ajili ya matendo ya wanao; Tena atawarehemu watoto wa wenye haki.

¹⁰Mshukuruni BWANA kwa utauwa: Mhimidini Mfalme wa milele. Maskani yake ijengwe tena ndani yako kwa furaha, Ili awafurahishe ndani yako walio wafungwa. Na kuwapenda daima ndani yako walio na huzuni.

¹¹Mataifa mengi watakuja kutoka mbali, Hata kulijia jina la BWANA Mungu. Wenye tunu mikononi mwao, Naam, tunu kwa Mfalme wa mbinguni. Vizazi vya vizazi watakusifu, Na kukuimbia nyimbo za furaha.

¹²Wamelaaniwa wote wakuchukiao, watabarikiwa milele wote wakupendao;

¹³Furahi, na kuwashangilia watoto wa wenye haki. Kwa maana watakusanywa pamoja Na kumhimidi BWANA wa wenye haki.

¹⁴Wa heri wote wakupendao, Watafurahiwa kwa ajili ya amani yako. Wa heri walioyahuzunikia mapigo yako, Kwa sababu watakufurahia. Wakati watakapoiona fahari yako yote, Wakafurahishwa wenyewe hata milele.

¹⁵Roho yangu imhimidi Mungu, Mfalme mkuu,

¹⁶Kwa kuwa Yerusalemu utajengwa tena, Kwa yakuti na zumaridi na vito vya thamani; Kuta zake na minara na maboma kwa dhahabu safi. Na njia za Yerusalemu zitatiwa sakafu ya mawe, Kwa berilo na johari na vito vya Ofiri.

¹⁷Njia zake zote zitasema, Haleluya, na kumhimidi, Kusema, Ahimidiwe Mungu aliyekukuza milele.