Read Swahilli Ayubu 21 Bible Online

Ayubu 21 - Swahilli bible

Ayubu 21

¹Ndipo Ayubu akajibu, na kusema,

²Yasikizeni sana maneno yangu; Jambo hili na liwe faraja yenu.

³Niacheni, nami pia nitanena; Tena nikiisha nena, zidini kudhihaki.

⁴ Mimi, je! Mashitaka yangu yamhusu mwanadamu? Nami kwa nini nisikose kusubiri?

⁵Niangalieni, mkastaajabu, Mkaweke mkono kinywani.

⁶Hata nikumbukapo nahuzunika, Na utisho wanishika mwilini mwangu.

⁷ Mbona waovu wanaishi, Na kuwa wazee, naam, na kuongezeka kuwa na nguvu?

⁸Kizazi chao kinathibitika nao machoni pao, Na wazao wao mbele ya macho yao.

⁹Nyumba zao ni salama bila hofu, Wala fimbo ya Mungu haiwapigi.

¹⁰Fahali wao huvyaza wala hapungukiwi na nguvu; Ng'ombe wao jike huzaa, asiharibu mimba.

¹¹Huwatoa kama kundi watoto wao. Na watoto wao hucheza.

¹²Huimba kwa matari na kwa kinubi, Na kuifurahia sauti ya filimbi.

¹³Siku zao hutumia katika kufanikiwa, Kisha hushuka kuzimuni ghafla.

¹⁴Walakini walimwambia Mungu. Tuondokee; Kwani hatutaki kuzijua njia zako.

¹⁵Huyo Mwenyezi ni nani, hata tumtumikie? Nasi tutafaidiwa nini tukimwomba?

¹⁶Tazama, kufanikiwa kwao hakumo mkononi mwao; Mipango ya waovu na iwe mbali nami.

¹⁷Je! Ni mara ngapi taa yao waovu huzimwa? Na msiba wao kuwajia? Na Mungu kuwagawanyia uchungu kwa hasira yake?

¹⁸Ili wawe kama mabua makavu mbele ya upepo, Kama makapi yaliyochukuliwa na dhoruba?

¹⁹Mwasema, Mungu huwawekea watoto wa mtu huo uovu wake. Na amlipe mwenyewe, ili apate kuujua.

²⁰Macho yake mwenyewe na yaone uharibifu wake, Akanywe ghadhabu zake Mwenyezi.

²¹Kwani ana furaha gani katika ukoo wake baada yake, Hesabu ya miezi yake itakapokwisha katwa katikati?

²²Je! Mtu awaye yote atamfundisha Mungu maarifa? Naye ndiye awahukumuye walioko juu.

²³Mmoja hufa katika nguvu zake kamili, Mwenye kukaa salama na kustarehe;

²⁴Vyombo vyake vimejaa maziwa, Na mafuta ya mifupani mwake ni laini.

²⁵Mwingine hufa katika uchungu wa roho, Asionje mema kamwe.

²⁶ Wao hulala mavumbini sawasawa, Mabuu huwafunika.

²⁷Tazama, nayajua mawazo yenu, Na mipango miovu mnayoazimia kufanya juu yangu.

²⁸Kwa kuwa mwasema, Nyumba ya huyo mkuu i wapi? Na hema waliyoikaa hao waovu iko wapi?

²⁹Je! Hamkuwauliza wapitao njiani? Na maonyo yao hamyajui?

³⁰ Kwamba mwovu huachiliwa katika siku ya msiba? Na kuongozwa nje katika siku ya ghadhabu?

³¹Ni nani atakayetangaza njia yake usoni pake? Tena ni nani atakayemlipa kwa hayo aliyofanya?

³²Pamoja na hayo atachukuliwa kaburini, Nao watalinda zamu juu ya kaburi lake.

³³ Udongo wa bondeni utakuwa tamu kwake, Na watu wote watafuata nyuma yake, Kama vile walivyomtangulia watu wasiohesabika.

³⁴Basi imekuwaje ninyi kunituliza moyo kwa utupu mtupu, Kwa kuwa katika majibu yenu unasalia uongo tu.