Read Swahilli Ayubu 26 Bible Online

Ayubu 26 - Swahilli bible

Ayubu 26

¹Ndipo Ayubu akajibu, na kusema,

² Jinsi ulivyomsaidia huyo asiye na uwezo! Jinsi ulivyouokoa mkono usio na nguvu!

³ Jinsi ulivyomshauri huyo asiye na hekima! Na kutangaza ujuzi wa kweli kwa wingi!

⁴Je! Umetamka maneno kwa nani? Kisha ni roho ya nani iliyotoka kwako?

⁵Hao waliokufa watetemesha Chini ya maji na hao wakaamo humo.

⁶ Kaburi li wazi mbele yake, Uharibifu nao hauna kifuniko.

⁷ Yeye hutandaza kaskazi juu ya nafasi isiyo na kitu, Na kuutundika ulimwengu pasipo kitu.

⁸ Huyafunga maji ndani ya mawingu yake mazito; Na hilo wingu halipasuki chini yake.

⁹Husitiri uso wa kiti chake cha enzi, Na kulitandaza wingu lake juu yake.

¹⁰ Amepiga duara kuwa ni mpaka juu ya uso wa maji, Hata hapo mwanga na giza vinapopakana.

¹¹Nguzo za mbingu zatetemeka, Na kustaajabu kwa kukemea kwake.

¹² Huichafua bahari kwa uwezo wake, Na kumtema Rahabu kwa akili zake.

¹³ Hizo mbingu hupambwa kwa roho yake; Mkono wake umemchoma nyoka aendaye mbio.

¹⁴Tazama, hivi ni viunga tu vya njia zake; Na jinsi yalivyo madogo manong'ono tusikiayo katika habari zake! Lakini ngurumo za uweza wake ni nani awezaye kuzielewa?