Read Swahilli Ayubu 33 Bible Online

Ayubu 33 - Swahilli bible

Ayubu 33

¹ Lakini, Ayubu, nakuomba usikilize hoja yangu, Ukayasikilize maneno yangu yote.

²Tazama basi, nimefunua kinywa changu, Ulimi wangu umenena kinywani mwangu.

³ Maneno yangu yatatamka uelekevu wa moyo wangu; Na hayo niyajuayo midomo yangu itayanena kwa unyofu.

⁴ Roho ya Mungu imeniumba, Na pumzi za Mwenyezi hunipa uhai.

⁵Ikiwa unaweza, nijibu; Yapange maneno yako sawasawa mbele yangu, usimame.

⁶ Tazama, mimi ni mbele ya Mungu kama ulivyo wewe; Mimi nami nilifinyangwa katika udongo.

⁷ Tazama, utisho wangu hautakutia hofu wewe, Wala sitakulemea kwa uzito.

⁸Hakika umenena masikioni mwangu, Nami nimesikia sauti ya maneno yako, ukisema,

⁹ Mimi ni safi, sina makosa; Sina hatia, wala hapana uovu ndani yangu;

¹⁰ Tazama, yuaona sababu za kufarakana nami, Hunihesabu kuwa ni adui yake;

¹¹ Hunitia miguu yangu katika mkatale, Na mapito yangu yote huyapeleleza.

¹² Tazama, nitakujibu, katika neno hili huna haki; Kwa maana Mungu ni mkuu kuliko mwanadamu.

¹³ Kwa nini unapingana naye, ukisema, Hatajibu hata neno langu moja?

¹⁴Kwa kuwa Mungu hunena mara moja, Naam, hata mara ya pili, ijapokuwa mtu hatambui.

¹⁵ Katika ndoto, katika maono ya usiku, Usingizi mzito uwajiapo watu, Katika usingizi kitandani;

¹⁶Ndipo huyafunua masikio ya watu, Na kuyatia mhuri mafundisho yao,

¹⁷Ili amwondoe mtu katika makusudio yake, Na kumfichia mtu kiburi;

¹⁸Yeye huizuia nafsi yake isiende shimoni, Na uhai wake usiangamie kwa upanga.

¹⁹ Yeye hutiwa adabu kwa maumivu kitandani mwake, Na kwa mashindano yaendeleayo daima mifupani mwake;

²⁰Hata roho yake huchukia chakula, Na nafsi yake huchukia nyama nzuri.

²¹ Nyama ya mwili wake huliwa, isionekane; Na mifupa yake isiyoonekana yatokeza nje.

²²Naam, nafsi yake inakaribia shimoni, Na uhai wake unakaribia waangamizi.

²³ Lakini akiwapo malaika pamoja naye, Mpatanishi, mmoja katika elfu, Ili kumwonesha binadamu hayo yampasayo;

²⁴ Ndipo amwoneapo rehema, na kusema, Mwokoe asishuke shimoni; Mimi nimeuona ukombozi.

²⁵Nyama ya mwili wake itakuwa laini kuliko ya mtoto; Huzirudia siku za ujana wake;

²⁶ Yeye humwomba Mungu, naye akamtakabalia; Hata auone uso wake kwa furaha; Naye humrejeshea mtu haki yake.

²⁷Yeye huimba mbele ya watu, na kusema, Mimi nimefanya dhambi, na kuyapotosha hayo yaliyoelekea, Wala sikulipizwa jambo hilo;

²⁸Yeye ameikomboa nafsi yangu isiende shimoni, Na uhai wangu utautazama mwanga.

²⁹Tazama, hayo yote ni Mungu anayeyafanya, Mara mbili, naam, hata mara tatu, kwa mtu,

³⁰ Ili kurudisha roho yake itoke shimoni, Ili atiwe mwanga kwa mwanga wa walio hai.

³¹Angalia sana, Ee Ayubu, unisikilize; Nyamaza, mimi nitasema.

³² Kama una neno la kusema, nijibu; Nena, kwani nataka kukuhesabia kuwa na haki.

³³ Kama sivyo, unisikilize mimi; Nyamaza, nami nitakufunza hekima.