Read Swahilli Zaburi 105 Bible Online

Zaburi 105 - Swahilli bible

Zaburi 105

¹ Haleluya.[16] Mshukuruni BWANA, liitieni jina lake, Wajulisheni watu matendo yake.

²Mwimbieni, mwimbieni kwa zaburi, Yasimulieni maajabu yake yote.

³Jisifuni kwa jina lake takatifu, Na ufurahi moyo wao wamtafutao BWANA.

⁴ Mtafuteni BWANA na nguvu zake, Utafuteni uso wake siku zote.

⁵ Yakumbukeni matendo yake ya ajabu aliyoyafanya, Miujiza yake na hukumu alizotoa.

⁶Enyi wazao wa Abrahamu, mtumishi wake; Enyi wana wa Yakobo, wateule wake.

⁷ Yeye, BWANA, ndiye Mungu wetu; Hukumu zake ziko duniani kote.

⁸ Analikumbuka agano lake milele; Neno lile aliloviamuru vizazi elfu.

⁹ Agano alilofanya na Abrahamu, Na ahadi yake kwa Isaka.

¹⁰ Alilomthibitishia Yakobo liwe amri, Na Israeli liwe agano la milele.

¹¹ Akisema, Nitakupa wewe nchi ya Kanaani, Kama fungu la urithi wenu.

¹² Walipokuwa watu wawezao kuhesabiwa, Naam, watu wachache na wageni katika nchi,

¹³Wakatangatanga toka taifa hadi taifa, Toka ufalme mmoja hadi kwa watu wengine.

¹⁴ Hakumwacha mtu awaonee, Hata wafalme aliwakemea kwa ajili yao.

¹⁵Akisema, Msiwaguse masihi[17] wangu, Wala msiwadhuru nabii zangu.

¹⁶ Akasababisha njaa katika nchi, Akakiharibu chakula chote walichokitegemea.

¹⁷ Alimpeleka mtu mbele yao, Yusufu aliuzwa utumwani.

¹⁸ Walimwumiza miguu yake kwa pingu, Akatiwa katika minyororo ya chuma.

¹⁹Hadi wakati wa kuwadia neno lake, Ahadi ya BWANA ilimjaribu.

²⁰ Mfalme alituma watu na kumfungua, Mkuu wa watu akamwachilia huru.

²¹ Akamweka kuwa mkuu wa nyumba yake, Na mwenye mamlaka juu ya mali yake yote.

²²Awaongoze maofisa wake kama apendavyo, Na kuwafundisha wazee wake hekima.

²³ Israeli naye akaingia Misri, Yakobo akawa mgeni katika nchi ya Hamu.

²⁴ Akawajalia watu wake wazae sana, Akawafanya kuwa hodari kuliko watesi wao.

²⁵Akawageuza moyo wawachukie watu wake, Wakawatendea hila watumishi wake.

²⁶ Akamtuma Musa, mtumishi wake, Na Haruni ambaye amemchagua.

²⁷Akatenda mambo ya ishara zake kati yao, Na miujiza katika nchi ya Hamu.

²⁸ Alituma giza, na kufanya nchi kuwa na giza, Wakayaasi maneno yake.

²⁹ Aliyageuza maji yao yakawa damu, Akawaua samaki wao.

³⁰ Nchi yao ilijaa vyura, Hata nyumbani mwa wafalme wao.

³¹ Alisema, kukaja makundi ya mainzi, Na chawa katika nchi yao yote.

³² Badala ya mvua aliwapa mvua ya mawe, Na umeme uliomulika ghafla katika nchi yao.

³³Akaipiga mizabibu yao na mitini yao, Akaivunja miti ya nchi yao.

³⁴ Alisema, kukaja nzige, Na tunutu wasiohesabika;

³⁵Wakaila miche yote ya nchi yao, Wakayala matunda ya ardhi yao.

³⁶ Akawapiga wazaliwa wa kwanza katika nchi, Malimbuko ya nguvu zao.

³⁷ Akawatoa wakiwa na fedha na dhahabu, Katika makabila yao asiwepo mwenye kujikwaa.

³⁸Misri ilifurahi walipoondoka, Maana kwa ajili yao hofu imewaangukia.

³⁹ Alitandaza wingu liwe kifuniko, Na moto ili uwaangazie usiku.

⁴⁰ Walimwomba naye akaleta kware, Na kuwashibisha chakula cha mbinguni.

⁴¹ Akaufunua mwamba, kukabubujika maji, Yakapita jangwani kama mto.

⁴²Maana alilikumbuka neno lake takatifu, Na Abrahamu, mtumishi wake.

⁴³Akawatoa watu wake kwa shangwe, Na wateule wake kwa nyimbo za furaha.

⁴⁴ Akawapa nchi za mataifa, wakairithi kazi ya watu;

⁴⁵ Ili wazishike amri zake, na kuzitii sheria zake. Haleluya.