Read Swahilli Mithali 5 Bible Online

Mithali 5 - Swahilli bible

Mithali 5

¹Mwanangu, sikiliza hekima yangu; Tega sikio lako, uzisikie akili zangu;

² Upate kuilinda busara, Na midomo yako iyahifadhi maarifa.

³Maana midomo ya malaya hudondosha asali, Na kinywa chake ni laini kuliko mafuta;

⁴ Lakini mwisho wake ni mchungu kuliko pakanga; Ni mkali kama upanga wenye makali kuwili.

⁵ Miguu yake inateremkia mauti; Hatua zake zinashikamana na kuzimu;

⁶Hata asiweze kuiona njia sawa ya uzima; Njia zake ni za kutangatanga wala hana habari.

⁷Basi, wanangu, nisikilizeni sasa, Wala msiache maneno ya kinywa changu.

⁸Itenge njia yako mbali naye, Wala usiukaribie mlango wa nyumba yake.

⁹Usije ukawapa wengine heshima yako, Na wakatili miaka yako;

¹⁰Wageni wasije wakashiba nguvu zako; Kazi zako zikawa ndani ya nyumba ya mgeni;

¹¹Nawe ukaziombolea siku zako za mwisho, Nyama yako na mwili wako utakapoangamia;

¹²Ukasema, Jinsi nilivyochukia maonyo, Na moyo wangu ukadharau kukemewa;

¹³Wala sikuisikia sauti ya waalimu wangu, Wala sikuwategea sikio langu walionifundisha!

¹⁴Nilikuwa karibu na kuingia katika maovu yote, Katikati ya mkutano na kusanyiko.

¹⁵Unywe maji ya tangi lako mwenyewe, Na maji yenye kububujika katika kisima chako.

¹⁶Je! Chemchemi zako zitawanyike mbali, Na mito ya maji katika njia kuu?

¹⁷Yawe yako mwenyewe peke yako, Wala si ya wageni pamoja nawe.

¹⁸ Chemchemi yako ibarikiwe; Nawe umfurahie mke wa ujana wako.

¹⁹ Ni ayala apendaye na paa apendezaye; Matiti yake yakutoshe siku zote; Na kwa upendo wake ushangilie daima.

²⁰Mwanangu! Mbona unashangilia malaya, Na kukikumbatia kifua cha mgeni?

²¹ Kwa maana njia za mwanadamu ziko mbele ya macho ya BWANA, Na mienendo yake yote huitafakari.

²² Maovu yake yeye yatampata mdhalimu, Naye atashikwa kwa kamba za dhambi zake.

²³ Atakufa huyo kwa kukosa maonyo, Naye atapotea kwa wingi wa ujinga wake.