Read Swahilli Wimbo ulio Bora 7 Bible Online

Wimbo ulio Bora 7 - Swahilli bible

Wimbo ulio Bora 7

¹ Binti wa kimalkia, jinsi ulivyo mzuri Hatua zako katika mitarawanda. Mapaja yako ya mviringo ni kama johari, Kazi ya mikono ya fundi stadi;

²Kitovu chako ni kama bakuli la mviringo, Na isikose divai iliyochanganyika; Tumbo lako ni mfano wa chungu cha ngano, Iliyozungukwa na ugo wa nyinyoro;

³ Matiti yako mawili ni kama wanapaa wawili, Ambao ni mapacha ya paa;

⁴Shingo yako ni kama huo mnara wa pembe; Macho yako kama viziwa vya Heshboni, Karibu na mlango wa Beth-rabi; Pua yako ni kama mnara wa Lebanoni, Unaoelekea Dameski;

⁵Kichwa chako juu yako ni kama Karmeli, Na nywele za kichwa chako kama urujuani, Mfalme amenaswa na mashungi yake.

⁶Jinsi yalivyo mazuri, yalivyo matamu, Mapenzi katikati ya anasa!

⁷Kimo chako kimefanana na mtende, Na matiti yako na vichala.

⁸Nilisema, Nitapanda huo mtende, Na kuyashika makuti yake. Matiti yako na yawe kama vichala vya mzabibu, Na harufu ya pumzi yako kama mapera;

⁹Na kinywa chako kama divai iliyo bora, Kwa mpendwa wangu inashuka taratibu, Ikitiririka midomoni mwao walalao.

¹⁰ Mimi ni wake mpendwa wangu, Na shauku yake ni juu yangu.

¹¹Njoo, mpendwa wangu, twende mashambani, Tufanye maskani katika vijiji.[2]

¹² Twende mapema hadi kwenye mashamba ya mizabibu, Tuone kama mzabibu umechanua, Na maua yake yamefunuka; Kama mikomamanga imetoa maua; Huko nitakupa upendo wangu.

¹³ Mitunguja hutoa harufu yake; Juu ya milango yetu yako matunda mazuri, Mapya na ya kale, ya kila namna, Niliyokuwekea, mpendwa wangu.