Read Swahilli Hekima ya 13 Bible Online

Hekima ya 13 - Swahilli bible

Hekima ya 13

¹Basi, bila shaka wanadamu wote kwa asili ni ubatili, ambao hawana akili za kumtambua Mungu; tena hawakupata uwezo wa kumjua yeye aliyepo kwa kuvitazama viumbe vizuri vinavyoonekana, wala kwa kuyaangalia yaliyofanywa hawakumfahamu yule fundi aliyeyafanya.

²Lakini moto, ama upepo, ama hewa nyepesi, ama mzunguko wa nyota, ama mafuriko ya maji, ama mianga ya mbinguni walidhani kuwa ni miungu inayoutawala ulimwengu!

³Huenda ilikuwa kwa kupendezwa na uzuri wake walivyodhani viumbe hivyo kuwa ni miungu, basi na wajue kadiri gani BWANA, Mfalme wao, avipitavyo; kwa maana Yeye aliye asili ya uzuri ndiye aliyeviumba.

⁴Lakini kama ilikuwa kwa kuzistaajabia nguvu zake na maongozi yake, na wafahamu kwa kuviangalia kadiri gani Yeye aliyeviumba anayo nguvu zaidi;

⁵maana kwa jinsi uzuri hata wa viumbe vilivyoumbwa ulivyo mkuu, kwa kadiri hiyo hiyo mwanadamu huyatunga mawazo yake juu ya Muumba.

⁶Walakini watu hao hawana hatia nyingi. Madhali yawezekana kwamba hao wamekosea tu, pindi wanapomtafua Mungu, na kutamani kumwona;

⁷kwa sababu huishi katikati ya viumbe vyake, huvichunguza kwa bidii, na mwisho hujitoa kwa maono yao, mradi vitu vyenyewe wanavyovitazama ni vizuri kweli kweli.

⁸Walakini tena watu hao hawana udhuru.

⁹Kwa maana wakiwa walikuwa na uwezo wa kufahamu kadiri hiyo, hata kuweza kuchungulia taratibu ya viumbe, imekuwaje ya kwamba hawakudiriki upesi kumtambua Mfalme Mkuu wa viumbe vyake hivyo?

¹⁰ Lakini wale wamekuwa wanyonge kabisa, ambao waliweka matumaini yao katika vitu vifu, wakiviita miungu vitu vilivyo kazi za mikono ya wanadamu; vitu vya dhahabu na fedha, vilivyofanyizwa kwa ustadi, au mifano ya wanyama, au hata jiwe la bure, kazi ya mkono wa mtu wa kale.

¹¹Hata na mkata miti, akiisha kukata mti uwezao kuchukuliwa kwa urahisi, huondoa maganda yake yote, kisha huchonga vizuri na kufanyiza chombo kifaacho kwa matumizi ya maisha;

¹²kisha kuchoma takataka za kazi yake ili kukipika chakula chake, na kula na kushiba;

¹³kisha huchukua, katika mabaki yasiyofaa kitu, kipande cha mti kilichopotoka, tena kimejaa mafundo, hukitia nakshi kwa bidii ya ubwete wake na kukiumba kwa ustadi wa ulegevu wake; kisha hukipa umbo la sanamu ya mwanadamu,

¹⁴au kukifananisha na mnyama hafifu, akikipaka zingefuri, na kukitia rangi nyekundu, na kulifunika kila waa liliomo;

¹⁵kisha hukifanyiza chumba cha kukistahili, na kukiweka ukutani, na kukikaza kwa chuma;

¹⁶maadamu akiangalia kisianguke, kwa sababu anajua ya kwamba hakiwezi kujisaidia; mradi kwa hakika ni sanamu, inahitaji msaada!

¹⁷Basi, mwisho wa yote, anapoomba dua yake katika habari ya biashara, au harusi, au watoto, huyo haoni aibu kusema na kitu kisicho hao; naam, kuomba afya hukiitia kilicho dhaifu,

¹⁸na kuomba uhai hukisihi kile kilicho dhaifu, na kuomba msaada hukililia kisicho na ujuzi, na kuomba safari njema hukiomba kisichoweza kwenda hata hatua moja,

¹⁹na kuomba utajiri, au mapato, au kufanikiwa mikono yake, hutaka ustadi kwa kitu kile kilicho mtovu kabisa wa ustadi wa mikono!