Read Swahilli Hekima ya 14 Bible Online

Hekima ya 14 - Swahilli bible

Hekima ya 14

¹Tena, kuna mtu anayejiweka tayari kusafiri jahazini, endapo anataka kufanya safari yake juu ya maji yaumkayo, naye hulitia gogo la mti, bovu kabisa kuliko jahazi itakayomchukua!

²Kwa maana jahazi ile ilibuniwa kwa tamaa ya faida; na fundi akaiunda kwa akili zake;

³ila maongozi yako, Baba, ndiyo yanayoiongoza njiani. Kwa sababu hata baharini umetupa njia, na katikati ya mawimbi kuna mapito ya salama.

⁴Ukituonesha ya kwamba unaweza kuokoa katika kila hatari, hata na mtu asiye na ufundi huo aweza kung'oa nanga.

⁵Nayo ni mapenzi yako kazi za hekima yako zisikae bure; kwa hiyo watu huyaaminisha maisha yao kwa kipande kidogo cha mti, na kwa kupitia msukosuko wa bahari hata juu ya chelezo cha mbao huletwa salama mpaka pwani.

⁶Hata na siku za kale pia, wale majitu wenye kiburi walipokuwa wakiangamia, Nuhu, yule mtu aliyekuwa tumaini la ulimwengu alikimbilia safina, na, kwa kuwa mkono wako ulishika usukani, akawaachia wanadamu mbegu ya vizazi vitakavyokuja.

⁷Kwa maana kimebarikiwa kile kipande cha mti, ambacho kwa njia yake kumekuja wokovu.

⁸Lakini sanamu iliyofanyika kwa mikono imelaaniwa, naam, sanamu na yeye aliyeifanya pia; kwa sababu kuifanya kulikuwa kazi yake, na kile kitu kinachoharibika kimeitwa mungu.

⁹Maana mfanyaji aliye mwovu na uovu wake pia ni makuruhu machoni pa Mungu;

¹⁰naam, hakika yake kitendo kitaadhibiwa pamoja na yule aliyekitenda.

¹¹Kwa hiyo katikati ya sanamu za mataifa kutakuwa na mapatilizo; kwa sababu, ingawa zimefanyizwa katika viumbe alivyoviumba Mungu, zimefanyizwa kuwa machukizo, na vikwazo mbele ya roho za watu, na matanzi kwa miguu ya wapumbavu.

¹²Kwa maana kubuni sanamu kumekuwa chanzo cha uasherati, na uvumbuzi wake ni uharibifu wa maisha.

¹³Mradi hizo hazikuwako tangu awali, wala hazitakuwako hata milele;

¹⁴yaani ziliingia ulimwenguni kwa majivuno ya wanadamu, na kwa hiyo zimeamriwa mwisho wake utakaokuja kasi.

¹⁵Kwa kuwa baba mmojawapo aliyetaabika kwa majonzi yasiyotazamiwa, akifanya sanamu ya mtoto wake ambaye amefariki mapema, angeweza halafu kumstahi kama mungu yeye aliyekuwa kwanza binadamu aliyekufa tu, na kuwakabidhi wale waliokuwa chini yake madhehebu mengineyo na kanuni za ibada.

¹⁶Baadaye desturi hiyo ya upotevu, ikithibitishwa baada ya miaka kupita, hushikwa kuwa sheria;

¹⁷hata kwa amri ya wakuu sanamu za kuchonga zikaabudiwa. Tena, hapo wasipoweza kumheshimu mfalme hadharani, kwa sababu walikuwa wakikaa mbali sana, wakiwazia sura yake hapo walipo mbali, watu walifanyiza sanamu iliyoonekana ya mfalme huyo waliyemheshimu; ili kwa juhudi yao wapate kujipendekeza kwake yeye asiyekuwapo, kana kwamba amekuwapo.

¹⁸Hata na zaidi ya hayo, watu wasiomjua waliongeza ibada yao, wakiwa wameshawishiwa kwa jitihada ya mchonga sanamu;

¹⁹maana yeye, akitaka labda kumpendeza mwenye mamlaka, alitumia ufundi wake katika kuuzidisha uzuri wa sura hiyo;

²⁰na makutano, wakivutwa kwa uzuri wa kazi yake, halafu walimdhania kuwa ni mungu wa kuabudiwa, yeye aliyekuwa kwanza akiheshimiwa kama mtu tu.

²¹Basi, jambo hilo likawa kikwazo cha maisha, kwa jinsi watu, wakishurutishwa ama kwa maafa, ama kwa usultani, walivyotaja mawe na miti kwa jina lile lisiloshirikika.

²²Baadaye haikutosha watu wasipotoshe njia zao katika habari za kumjua Mungu; lakini zaidi ya hilo, wakiishi katika hali ya taabu kubwa kwa sababu ya kutokumjua, wamekosea juu ya umati wa maafa ambao huutajia amani.

²³Kwa maana, ama kwa kuua watoto katika ibada zao, ama kwa kuzishika ibada zilizo za siri kabisa, ama wakienda mandari zenye wazimu zilizo za kigeni,

²⁴wameacha hata kuuheshimu uhai, au usafi wa ndoa; bali mtu mmoja aweza kumletea mwenzake ama kufa kwa hila, ama uchungu wa kupata mwana wa haramu.

²⁵Tena, mambo yote yameingia fujo, yamejaa damu na uuaji, kuiba na kudanganya, ufisadi, uongo, ghasia, zuri, zahama,

²⁶utovu wa shukrani kwa fadhili zilizopokewa, kuzinajisi roho za watu, kuburuga hali ya kiume na kike, machafuko ya ndoa, uzinzi na uasherati.

²⁷Madhali kuziabudu zile sanamu zisizo halali hata kuzitaja ni chanzo, na sababu, na kusudi, la kila lililo ovu.

²⁸Maana wale waziabuduo hujifurahisha kwa wazimu, au kutabiri uongo, au huishi wenyewe katika ufasiki; tena huapa kwa uongo bila kufikiri,

²⁹kwa kuwa wanazitumainia sanamu zisizo na uhai, na wakiisha kuapa kwa upotovu wanatazamia ya kuwa hawatapata madhara yoyote.

³⁰Lakini kwa malipo ya dhambi hizo mbili watu wale watafuatiwa na Haki, maana kwa kustahi sanamu walimwazia Mungu mawazo mabaya, pia wakaapa katika udhalimu na hila kwa sababu wanaudharau utakatifu.

³¹Lakini si nguvu ya viumbe vile ambavyo watu huapa kwa kuvitaja, ila ndiyo Haki inayowachungulia wakosaji; nayo siku zote huupatiliza udhalimu wa wabaya.