Read Swahilli Hekima ya 17 Bible Online

Hekima ya 17 - Swahilli bible

Hekima ya 17

¹Kwa kuwa hukumu zako ni kuu nazo ni ngumu za kusimulia, ndiyo maana watu ovyo hupotea.

²Kwa maana wale wakorofi walipodhania ya kuwa wanashika taifa takatifu kwa nguvu, wao wenyewe walikuwa wamefungwa gizani, na kukazwa kwa minyororo ya usiku mrefu, wakitiwa sharti nyumbani mwao na kufukuzwa mbali na maongozi yako.

³Pindi walipodhania ya kwamba hawakuonekana katika dhambi zao za siri walitawanyika kila mmoja na mwenzake kwa pazia jeusi la usahaulifu wakashikwa na hofu ya kutisha, na kufadhaika kwa matokeo ya kivuli.

⁴Nyumba zao zenye giza walipokaa hawakuzilinda na hofu, ila sauti za kuwafadhaisha ziliwazunguka kwa kishindo, na vituko vilitokea, vya kuhuzunisha, vyenye nyuso za kukunjamana.

⁵Wala moto haukuwa na nguvu ya kutosha ili kuwaangaza, wala mwanga wa nyota haukuwa na uwezo wa kumulika katika usiku ule wa giza;

⁶ila walitokewa tu na kimoto kama wa moto uliojiwasha, na cha kutisha kabisa; na wakitishwa na matokeo hayo wasiyoweza kuyatazama walihesabu yale waliyoyaona kuwa ya kutisha zaidi.

⁷Tena hila za uchawi zilishindwa, na majisifu ya akili zao yakakemewa kwa aibu nyingi;

⁸maana wale walioahidi kufukuza hofu na fadhaa mbali na mwenye ugonjwa walikuwa wagonjwa wenyewe kwa woga wa kuchekesha.

⁹Ingawa hawakutishwa na kitu cha kuwataabisha, walitiwa hofu ya viumbe vitambaavyo na ya sauti ya nyoka, wakaangamia kwa kutetemeka, wakikataa hata kuitazama hewa isiyoepukika pande zote.

¹⁰Kwa maana ubaya asili yake ni woga, unahukumiwa kuwa mbaya na yule shahidi aliye ndani, na kwa kufuatiwa na dhamiri unatabiri yaliyo mabaya kabisa.

¹¹Madhali woga ni kuitupa misaada iliyoletwa na akili,

¹²na kwa kuwa moyoni kutumaini kumepungua, kutokujua sababu iletayo udhia kumezidishwa.

¹³Lakini wao, usiku kucha usio na nguvu, uliowajia kutoka ahera ya chini isiyo na nguvu, walikuwa wakilala usingizi sawasawa;

¹⁴pengine wakaogofishwa kwa matokeo ya kutisha, pengine, wakafadhaishwa kwa jinsi walivyokata tamaa; maana hofu isiyotazamiwa iliwajia kwa ghafla.

¹⁵Kwa hiyo kila mtu, awaye yote, akijilaza pale alipo, akafungwa katika gereza ile isiyokuwa na fito za chuma;

¹⁶kwamba ni mkulima, au mchungaji, au kibarua mwenye kazi za nyikani, akapatwa na kushikwa na sharti isiyoepukika, kwa maana walifungwa wote kwa mnyororo mmoja wa giza.

¹⁷Endapo walisikia baridi ivumayo, au sauti nzuri ya ndege katika matawi yaeneayo, au maporomoko ya maji yakienda kasi, au kuanguka miamba iliyovurumishwa,

¹⁸au wanyama wasioonekana wakikimbia ghafla na kuruka, au sauti ya hayawani wakinguruma kwa ukali, au mwangwi ukitoka katika mapango ya milimani; hayo yaliwaduwaza kwa hofu kuu.

¹⁹Maana penginepo pote ulimwengu uliangazwa nuru nakawa, watu wakijishughulisha na kazi bila mgogoro;

²⁰ila juu yao peke yao umetandikwa usiku mzito, kielelezo cha giza lile litakalowapokea baadaye; naam, nafsini mwao hao wakawa wazito kuliko giza lenyewe.