Read Swahilli Hekima ya 18 Bible Online

Hekima ya 18 - Swahilli bible

Hekima ya 18

¹ Lakini watakatifu wako walikuwa na nuru tele; na hao Wamisri wakasikia sauti zao bila kuona sura zao, wakaihesabu kuwa vema ya kwamba wao pia wameteswa,

²ila hushukuru kwa kuwa wale waliolemewa kwanza hawawadhuru sasa, na kuwaomba waondoke.

³Hata hivyo uliwapa watu wako nguzo ya moto uliowaka, ili kuwa kiongozi wakienda wasikojua, na jua la kuwafadhili katika uhamisho wao wenye heshima.

⁴Kwa maana hao Wamisri walistahili sana kunyimwa nuru na kufungwa gizani, mradi hao walikuwa wamewafunga watoto wako kwa nguvu, ambao kwa nuru isiyoharibika ya torati itatolewa kati ya wanadamu.

⁵Hata walipokuwa wameshauriana kuwaua watoto wachanga wa watakatifu wako, na mtoto fulani ametupwa, na kuokolewa ili kuwahukumu, uliwaondolea wingi wa watoto wao, na kuwaangamiza jeshi lao katika mafuriko makuu.

⁶Usiku ule baba zetu walitangulia kuonywa, ili wakiwa na ufahamu hakika, wafurahishwe na viapo walivyovitegemia;

⁷kwa hiyo watu wako waliutazamia wokovu wa wenye haki na uharibifu wa adui.

⁸Madhali uliwalipiza kisasi watesi wale, na kwa njia ile ile uliwatukuza ukituita ili tukujie.

⁹Zaidi ya hayo watoto watakatifu wa watu wema walitoa dhabihu kwa siri, na kwa moyo mmoja walijitwalia agano la torati ya dini, ya kwamba watashirikiana katika mambo mema na vile vile katika hatari; pindi walipoimbisha nyimbo takatifu za mababu katika kumhimidi Mungu.

¹⁰Lakini adui wakaitika sauti zisizolingana, wakaeneza malalamiko ya kuhuzunisha kwa ajili ya watoto wao;

¹¹mtumwa pamoja na bwana wake wakaadhibiwa kwa adhabu ya haki sawasawa, na raia pamoja na mfalme,

¹²naam, wote pamoja chini ya namna moja ya kifo, wakawa na maiti pasipo idadi; hata waliokuwa hai hawakutosha ili kuwazika, maana kwa pigo moja wazao wao waliopendwa hasa waliangamizwa.

¹³Na maadamu wasiposadiki mambo yote kwa sababu ya uchawi, kwa kuangamia watoto wa kwanza wao walikiri kuwa taifa hili, Israeli, ni mtoto wa Mungu.

¹⁴Kwa maana majira mambo yote yalipokuwa kimya, na usiku ulikuwa katikati ya mwendo wake mwepesi.

¹⁵Neno lako Mwenyezi alishuka mbinguni kutoka kiti chao cha kifalme, shujaa aliye hodari, katika nchi iliyopasishwa hukumu, mwenye upanga mkali, ndio amri yako isiyopindika,

¹⁶akasimama na kujaza mambo yote mauti, na pindi alipogusa mbingu akaikanyaga nchi.

¹⁷Mara maono ya ndoto zao yakawafadhaisha sana, na maogofya yasiyotazamiwa nao yakawajia;

¹⁸na kila mtu, mmoja huko na mmoja huko, ameanguka nusu ya kufa, akaonesha sababu ya kifo chake;

¹⁹mradi zile ndoto zilizowahangaisha zikadhihirisha hiyo, ili wasipotee bila kutambua sababu ya kuteswa kwao.

²⁰ Kadhalika iliwapasa wenye haki nao kuionja mauti, na wengi wao walipigwa jangwani; ila hasira ile haikudumu sana

²¹kwa sababu Haruni, mtu mnyofu, alifanya haraka kuwa mjasiri wao. Huyo alileta silaha za utumishi wake, sala na kipatanisho cha uvumba, akaipinga hasira ile na kuukomesha msiba, akajionesha kuwa ni mtumishi wako.

²²Akamshinda mwenye hasira, si kwa nguvu za mwilini wala kwa mafaa ya silaha, ila kwa neno akamtuliza yeye aliyekuwa akiwaadhibu, kwa kukumbusha viapo na maagano waliyopewa mababu.

²³Kwa maana wafu walipokwisha kuanguka mafungu mafungu hata kulundika alisimama katikati, akaipinga njia mbele ya hasira, akaizuia isiwafikie waliokuwa hai.

²⁴Madhali juu ya vazi lake refu ulikuwapo ulimwengu, na sifa za mababu zilikuwapo juu ya mchoro wa safu nne za vito, na enzi yako juu ya kilemba kichwani pake.

²⁵Mambo hayo mharabu aliyaondokea, na watu waliyaacha; maana ilitosha kuonja tu hasira ile.