Read Swahilli Yoshua Mwana wa Sira 1 Bible Online

Yoshua Mwana wa Sira 1 - Swahilli bible

Yoshua Mwana wa Sira 1

¹UTANGULIZI Kitabu hiki kimeingia katika orodha ya vitabu rasmi vya tafsiri ya Kigiriki ya Biblia, lakini siyo katika Biblia ya Kiebrania. Wakristo wa zamani za kale wamekichukua kama kitabu rasmi kutokana na tafsiri ya Kigiriki (yaani Septuaginta). Waprotestanti wanakichukulia kama mojawapo wa vitabu vya Apokrifa. Mtungaji Katika utangulizi wa mfasiri mjukuu wa mtungaji wetu hueleza kwamba yeye ndiye aliyefasiri kitabu hiki muda alipoishi Misri, yaani mwaka wa 38 wa mfalme Evergete. Bila shaka huyo ni mfalme Tolemayo wa Saba Evergete. Kwa hiyo fasiri hiyo imefanywa mwaka 132 K.K. Basi Yoshua mwana wa Sira mwenyewe, yaani babu yake, aliishi na kuandika hicho kitabu karibu mwaka 190 K.K. Mwaka 198 K.K. Palestina ikaanza kutawaliwa na Waseleusidi. Waisraeli wakawa makundi mawili. Kundi moja lilipendelea sana Ugiriki hata likapata uongozi. Punde kidogo Antioko Epifani (175-163 K.K.) akataka kwa nguvu kuingiza ustaarabu wa Kigiriki katika Palestina. Yoshua mwana wa Sira akatu(...)

²Nani awezaye kuhesabu Mchanga wa bahari na matone ya mvua Na siku za milele?

³Nani awezaye kutafuta Kimo cha mbingu na upana wa dunia Na kina cha bahari?

⁴Hekima iliumbwa kabla ya vitu vyote,

⁵Na ufahamu wa busara tangu milele.

⁶Nani aliyefunuliwa shina la hekima?

⁷Nani aliyejua mashauri yake merevu?

⁸Yuko Mmoja aliye na hekima, Naye yu wa kuogopwa sana, Ameketi katika kiti chake cha enzi.

⁹ BWANA ndiye aliyeiumba Na kuiona na kuihesabu, Na kuimwaga juu ya kazi zake zote.

¹⁰Ina wote wenye mwili kama aitoavyo, Na wale wampendao amewapa kwa wingi. Kumcha Mungu ni Hekima ya Kweli

¹¹Kumcha BWANA Ni heshima na utukufu, Na furaha na taji la shangwe.

¹²Kumcha BWANA Kunachangamsha moyo, Na kuleta sherehe na maisha kunjufu.

¹³Kumcha BWANA Kwamletea mtu heri mwishowe, Na siku ya kufa kwake atabarikiwa.

¹⁴Kumcha BWANA Ni chanzo cha hekima, Imeumbwa tumboni pamoja na waamini.

¹⁵Kwa watu imekaa tangu awali, Pia itadumu kwa wazao wao.

¹⁶Kumcha BWANA Ni utimilifu wa hekima, Inashibisha wanadamu matunda yake.

¹⁷ Itajaza nyumba pia vitakiwavyo, Na ghala zitajazwa mavuno yake.

¹⁸Kumcha BWANA Ni taji la hekima, Inasitawisha amani na afya nzuri.

¹⁹Kumcha BWANA Ni gongo na nguzo tukufu, Ni heshima ya daima kwao waishikao.

²⁰ Kumcha BWANA Ni shina la hekima,

²¹Na matawi yake ni maisha mengi. Saburi na kujiweza

²²Hasira isiyo haki haiwezi kuthibitishwa, Maana ukali wa ghadhabu ni maangamizi yake.

²³Mtu aliye mvumilivu atastahimili hata wakati ufaao, na hatimaye ukunjufu wa moyo utaanza kukua ndani yake.

²⁴Aidha, ujapo wakati ufaao atayaficha maneno yake, na wengi kwa midomo yao watautangaza ufahamu wake. Hekima na unyofu

²⁵Mithali za elimu zimo kazini mwa hekima, Bali utawa ni chukizo kwa mkosefu.

²⁶Ukitamani hekima uzishike amri, naye BWANA atakupa tele;

²⁷yaani, kumcha BWANA ndiyo hekima na mafundisho, tena imani na unyenyekevu ndiyo mapenzi yake.

²⁸Usikatae kumcha BWANA kama una haja, Wala usimkaribie nawe una nia mbili.

²⁹Usiwe mnafiki machoni pa watu, tena kuhusu midomo yako ufanye hadhari.

³⁰Wewe usijikuze mwenyewe, usije ukaanguka na kujiaibisha roho yako; madhali BWANA atazifunua siri zako, na kukuangamiza katikati ya kusanyiko, kwa sababu hukumfikilia BWANA mwenye kicho, lakini moyo wako umejaa hila.