Read Swahilli Yoshua Mwana wa Sira 14 Bible Online

Yoshua Mwana wa Sira 14 - Swahilli bible

Yoshua Mwana wa Sira 14

¹Heri ya kweli Yu heri asiyejikwaa kwa kinywa chake, Wala hakuchomwa na kusikitika kwa dhambi.

²Yu heri asiyehesabiwa hatia rohoni mwake, Wala hakutindikiwa na tumaini lake. Wajibu wa kutumia mali

³Mali hazimpasi bahili; mnyimivu atafanyaje na fedha?

⁴Achumaye kwa kujinyima roho yake awachumia wengine, na wengine watajifurahisha kwa mapato yake.

⁵Aliye mbaya wa nafsi yake atakuwa mwema kwa nani? Aidha, hatapata furaha katika vitu vilivyo vyake.

⁶Hakuna mbaya zaidi kuliko yeye anayejihusudu mwenyewe; na hii ndiyo thawabu ya ubaya wake.

⁷Hata akitoa fadhili hutoa kwa sababu ya usahaulifu; na mwishowe hufunua wazi ubaya wake.

⁸Ni mwovu aliye mwenye kijicho, akigeuzia mbali uso wake, na kuzidharau roho za watu.

⁹Mwenye choyo jicho lake haliridhiki na sehemu yake; na udhalimu ulio mbaya hukausha roho yake.

¹⁰Mwenye jicho ovu huwa mnyimivu wa chakula, na mwenye ubahili hata mezani pake.

¹¹Mwanangu, kadiri ulivyo navyo, ujifanyizie mema, na kumletea BWANA sadaka kama ipasavyo.

¹²Kumbuka ya kwamba mauti haikawii, wala hukufunuliwa agizo la kaburi.

¹³Na umfanyizie mema rafiki yako asijekufa; na kadiri uwezavyo nyosha mkono wako ukampe.

¹⁴Usijinyime siku ya furaha, wala fungu la matakwa mema lisikupite.

¹⁵Je! Hutamwachia mwingine kazi zako? Na mapato yako ili yagawanyike kwa kura?

¹⁶Toa na kupokea, na ujiburudishe roho yako, kwa maana hakuna kutafuta anasa kaburini.

¹⁷Wote huchakaa kama vazi; agizo la tangu awali ni hili, Kufa utakufa.

¹⁸Katika majani yasitawiyo juu ya mti mkubwa, hupukutisha mengine, na mengine huyaotesha; vivyo hivyo katika vizazi vya mwili na damu, kimoja hukoma, kimoja huzaliwa.

¹⁹Hakika ya kila tendo huchakaa, na kuanguka; na mtendaji atawenda zake vivyo hivyo. Furaha ya kutafuta hekima

²⁰ Yu heri mtu yule atakayetafakari hekima, na kuangalia ufahamu,

²¹na kukaza moyo wake katika njia zake, na kupata maarifa katika siri zake.

²²Toka ukaende kumtafuta kama mwenye kuaua, na kumwotea katika mapito yake.

²³Anayepeleleza dirishani pake atasikiliza mlangoni pake;

²⁴anayetua karibu na nyumba yake atapiga kigingi ukutani mwake;

²⁵ataisimika hema yake karibu naye, na kufanya kituo panapo mema.

²⁶Atajenga kiota chake katika tanzu zake, na kupumzika chini ya matawi yake;

²⁷kwake atapata kivuli katika joto, na kufanya kikao katika utukufu wake.