Read Swahilli Yoshua Mwana wa Sira 17 Bible Online

Yoshua Mwana wa Sira 17 - Swahilli bible

Yoshua Mwana wa Sira 17

¹ BWANA alimuumba Adamu katika mavumbi, na hata mavumbini akamrudisha.

²Akawapa wanadamu siku kwa idadi, na muhula iliyoamriwa; akawapa amri juu ya vitu vilivyomo;

³akawavika nguvu kama Yeye mwenyewe, na kuwafanya kwa mfano wake.

⁴Akaitia hofu ya binadamu katika vyote vyenye mwili,

⁵ili wawatawale wanyama na ndege.

⁶Akawajaza maarifa ya hekima, na kuwapa kupambanua wema na uovu.

⁷ Akawafanyizia ulimi, na macho, na masikio akawapa na moyo wa ufahamu.

⁸Ili kuwaonesha adhama ya kazi yake,

⁹Ili wasijisifie katika miujiza yake,

¹⁰Na kukijulisha kicho chake ulimwenguni, Na kulihimidi jina lake takatifu;

¹¹Aliyaweka mbele yao maarifa, Akawapa sheria ya uzima kuwa urithi.

¹²Alifanya nao wateule wake agano la milele, na kuwaonesha hukumu zake.

¹³Kwa macho yao waliiona enzi ya utukufu wake, na kwa masikio yao waliisikia sauti yake yenye nguvu.

¹⁴Akawaambia, Jihadharini na yasiyo haki, akawapa amri kila mtu juu ya jirani yake. Mungu ni Hakimu

¹⁵Njia zao nazo zi mbele zake daima,

¹⁶wala hazitafichwa machoni pake.

¹⁷Kwa kila taifa aliamuru mfalme,

¹⁸Bali Israeli ni kura yake BWANA.

¹⁹Matendo yao ni kama jua mbele zake, Na mawazo yao ni dhahiri kwake.

²⁰Kwake makosa yao hayakufichika,

²¹Na dhambi zao zote zipo mbele zake.

²²Lakini kwake Yeye sadaka za mtu ni kama pete ya mhuri, naye ataweka akiba ukarimu wa wanadamu kama mboni ya jicho;

²³hatimaye atatokea na kuwapa thawabu, naye atawalipa waovu uovu wao juu ya vichwa vyao.

²⁴Hata hivyo huwajalia wale watubuo kurudi, na wao wanaopotewa na saburi huwafariji. Wito kwa kutubu

²⁵ Basi umrudie BWANA na kuacha dhambi; omba dua yako mbele za uso wake na kupunguza kikwazo;

²⁶umgeukie tena Yeye Aliye Juu, uyageuze maovu, uyakirihi yaliyo machukizo.

²⁷ Yaani, Mungu anayo ridhaa gani kwao wanaopotea? Ila kwao wanaoishi na kumtolea shukrani.

²⁸Shukrani hukoma kutoka kwa wafu, kama kutoka kwake yeye asiyekuwapo; bali mwenye uzima na afya atamhimidi BWANA.

²⁹Ee ajabu ya wingi wa rehema za BWANA, na ya masamaha yake kwao wanaomgeukia!

³⁰Sivyo ilivyo kwa wanadamu, Wala wazo lake si mawazo yao.

³¹Nini ing'aayo kuliko jua? Ila lafifia; Kadhalika yule asiyezuia tamaa.

³²Mungu huwahukumu majeshi ya mbinguni, Na wanadamu wote ni mavumbi na majivu.