Read Swahilli Yoshua Mwana wa Sira 24 Bible Online

Yoshua Mwana wa Sira 24 - Swahilli bible

Yoshua Mwana wa Sira 24

¹Hutuba ya Hekima Hekima atajisifu nafsi yake, na katikati ya watu wake atajiadhimisha;

²katika mkutano wa Aliye Juu atafumbua kinywa chake na kujitukuza mbele ya majeshi yake.

³Mimi nilitoka kinywani mwake Aliye Juu, Na kama ukungu nikaifunikiza nchi.

⁴ Nikafanya maskani yangu palipo juu, Na kiti changu katika nguzo ya wingu.

⁵Mviringo wa mbingu nikauzunguka peke yangu, Nikatembea katika vilindi vya bahari.

⁶Katika mawimbi ya bahari, na duniani pote, Katika kila taifa na kabila nikamiliki.

⁷Pamoja na hao wote nikatafuta kikao; Na nipate kituo katika urithi wa nani?

⁸Ndipo Muumba vitu vyote aliponiagiza, Aliyeniumba aliisimamisha hema yangu; Akasema, Maskani yako iwe katika Yakobo, Urithi wako na uwe katika Israeli.

⁹Tangu awali aliniumba kabla ya ulimwengu, Wala sikomi kabisa hata milele.

¹⁰Katika Hema Takatifu nikahudumu mbele zake, Vivyo hivyo nikathibitika katika Sayuni.

¹¹Katika mji upendwao akanistarehesha, Na katika Yerusalemu nikapewa amri;

¹²Nikatia shina katika taifa lililo tukufu, Naam, katika sehemu ya urithi wa BWANA.

¹³Nikakuzwa kama mwerezi wa Lebanoni, Kama mshemeni milimani pa Hermoni.

¹⁴Nikakuzwa kama mtende uotao pwani, Mithili ya miwaridi penye Yeriko. Kama mzeituni mzuri katika uwanda, Na kama mwaramoni nikakuzwa.

¹⁵Kama mdalasini na mdewere na manemane Nikatapanya harufu ya kupendeza; Mithili ya uudi na unuka na ubani, Na kama moshi wa uvumba hekaluni.

¹⁶Kama mweloni nikanyosha matawi yangu, Na matawi yangu yana utukufu na uzuri.

¹⁷Kama mzabibu nikachipuza neema,

¹⁸Na maua yangu ni matunda ya ukwasi,

¹⁹Njoni kwangu, enyi nyote mnaonitamani, Nanyi mjazwe mazao yangu.

²⁰Ukumbusho wangu ni mtamu kuliko asali, Na urithi wangu kupita sega la asali.

²¹Wanilao watakuwa wakali wana njaa, Waninywao watakuwa wakali wana kiu,

²²Mwenye kunitii hatatahayarika kamwe, Wala wenye shughuli nami hawakosi. Hekima na sheria

²³Mambo hayo yote ni Kitabu cha Agano la Mungu aliye juu;

²⁴yaani, Torati ile ambayo Musa alituagiza ili iwe urithi kwa makusanyiko ya Yakobo.

²⁵Ndiyo Torati ambayo hufanya hekima kuwa maridhawa kama Pishoni, na kama Tigri wakati wa matunda mapya;

²⁶ambayo hufanya ufahamu kuwa umejaa kama Frati, na kama Yordani wakati wa mavuno;

²⁷ambayo hufanya mafundisho kufurika kama mto Nile, na kama Gihoni wakati wa mavuno ya zabibu.

²⁸Yule mtu wa kwanza hakuijua kamili, vivyo hivyo huyu wa mwisho hajamaliza kuichunguza.

²⁹Kwa maana fikira zake zimetekwa baharini, na mashauri yake kutoka vilindini.

³⁰Tazama, mimi nilitokea kama kijito kutoka kwa mto, na kama mfereji wa bustani.

³¹Nilisema, Nitatia maji bustani yangu, na kuyanywesha kwa wingi matuta yake; kumbe! Kijito kimekuwa mto, na mto umekuwa bahari.

³²Hata sasa nitazidi kumulikia mafundisho kama alfajiri, nami nitayang'arisha hayo mpaka mbali.

³³Nitakupua elimu kama unabii, na kuwaachia vizazi vitakavyokuja.

³⁴Tazama, mimi sikujitahidi kwa ajili yangu mimi peke yangu, ila kwa ajili ya wote waitafutao hekima kwa bidii.