Read Swahilli Yoshua Mwana wa Sira 30 Bible Online

Yoshua Mwana wa Sira 30 - Swahilli bible

Yoshua Mwana wa Sira 30

¹Kuhusu watoto Ampendaye mwanawe atafululiza kumpiga, apate kumfurahia hatimaye.

²Amrudiye mwanawe atapata faida kwake, na kuona fahari juu yake mbele ya rafiki zake.

³Amfundishaye mwanawe atamtia wivu adui yake, na mbele ya rafiki zake atamshangilia.

⁴Babaye yuafa, ila imekuwa kana kwamba hakufa; kwa maana ameacha nyuma yake mtu aliye kama yeye;

⁵katika maisha yake alimwona na kumfurahia, pia hapo alipofariki hakusikitika;

⁶aliacha nyuma yake mtu wa kuwalipiza kisasi adui zake, tena mtu wa kuwalipa marafiki zake hisani yao.

⁷Mwenye kumtundua mwanawe na afunge jeraha zake, hata na moyo wake atafadhaika kwa kila kilio.

⁸Farasi asiyefugwa huwa mkaidi; na mwana aliyeachwa huwa mkorofi.

⁹Ukimkinaisha mtoto wako atakutia fadhaa, ukicheza naye atakuhuzunisha.

¹⁰Usicheke pamoja naye usije ukapata huzuni kwake; hatimaye utasaga meno yako.

¹¹Usimpe mamlaka yoyote wakati wa ujana wake, wala usiyaachilie upumbavu wake.

¹²Uinamishe shingo yake maadamu yu kijana, umpige mbavuni wakati wa utoto wake; ili asije akawa mkaidi akakuasi, ikawemo huzuni moyoni mwako.

¹³Basi, umrudi mwanao na kujitahidi kwa ajili yake, ushupavu wake usije ukakuchukiza. Afya

¹⁴Yu heri maskini aliye mzima mwenye siha njema, kuliko yeye aliye tajiri naye anasumbuka mwilini mwake.

¹⁵Afya na siha njema ni nzuri kuliko dhahabu safi, na roho iliyo hodari hupita mali isiyopimika.

¹⁶Hakuna utajiri kupita afya ya mwili, wala hakuna mali kupita changamko la moyo.

¹⁷Kufa kwafaa zaidi kuliko kuishi bure, na raha ya milele kuliko maumivu ya daima.

¹⁸Mambo mema mbele ya kinywa kilichofumbwa ni kama vyakula vilivyowekwa juu ya kaburi.

¹⁹Sadaka huifaidia sanamu namna gani? Ambayo haili wala hainusi;

²⁰ndivyo alivyo mtu mwenye mali asiyeweza kuzifurahia. Furaha

²¹ Usijizamishe roho yako katika huzuni, wala kujikwaza katika shauri lako.

²²Changamko la moyo ndiyo uzima wa mtu, na shangwe huzidisha siku zake.

²³Ujifurahishe roho yako na kuuburudisha moyo wako; uiondoe huzuni mbali nawe; kwa kuwa huzuni imewaangamiza wengi, wala ndani yake hamna faida.

²⁴Wivu na hasira pia hupunguza maisha, na kujisumbua kwaleta uzee kabla ya wakati wake.

²⁵Bali mtu mwenye moyo mkarimu hufurahi, na chakula chake chamfaa.