Read Swahilli Yoshua Mwana wa Sira 36 Bible Online

Yoshua Mwana wa Sira 36 - Swahilli bible

Yoshua Mwana wa Sira 36

¹Sala kwa ajili ya watu wa Mungu Ee Bwana, Mungu wa watu wote, utuokoe; uangalie uwatishe mataifa yote; uuinue mkono wako juu ya watu wageni;

²na kuwaonesha nguvu zako zilizo kuu.

³Kama vile ulivyojitakasa kati yetu mbele yao, vivyo hivyo ujitukuze kati yao mbele yetu;

⁴nao wakujue Wewe kama sisi tukujuavyo, ya kwamba hakuna Mungu ila Wewe peke yako.

⁵Tuonyeshe ishara tena, na kufanya mambo ya ajabu uutukuze mkono wako, naam, mkono wako wa kuume;

⁶uuamshe ukali wako na kumimina hasira; umtiishe mtesi, na kumwangamiza adui.

⁷Uuhimize wakati na kuuamuru mihula;

⁸ni nani atakayekuambia Wewe, Unafanyaje?

⁹Uwaponde kichwa wakuu wa maadui, wanaosema, Hakuna ila sisi.

¹⁰Uwakusanye kabila zote za Yakobo, na kuwafanya urithi wako kama siku za kale.

¹¹Ee BWANA, uwarehemu watu walioitwa kwa jina lako, na Israeli uliyemwita mzaliwa wako wa kwanza.

¹²Uuonee huruma mji wa patakatifu pako, Yerusalemu, mahali pako pa raha;

¹³Uujaze Sayuni adhama yako, na patakatifu pako utukufu wako.

¹⁴Uwashuhudie wale waliokuwa viumbe vyako tangu awali, na kuyathibitisha maneno ya unabii yaliyonenwa kwa jina lako.

¹⁵Uwajazi wakungojao, na watu watawasadiki manabii wako.

¹⁶Ee BWANA, uisikilize sala yao wakuombao, sawasawa na kibali chako kwa watu wako;

¹⁷na wote wakaao duniani watajua ya kwamba Wewe ndiwe BWANA, Mungu wa milele. Kutofautisha

¹⁸Tumbo litapokea kila namna ya chakula. Lakini namna moja hupita nyingine;

¹⁹Kinywa chaonja vyakula vya mawindo; Na moyo wa ufahamu maneno ya hila.

²⁰Moyo wenye hila huleta machukizo; Bali mwelekevu ataurudishia hayo. Kumchagua mke

²¹Mwanamke atamkubali mume yeyote, Ila binti mmoja ni mzuri kuliko mwingine.

²²Uzuri wa mwanamke huuburudisha uso, wala mwanamume hatamani neno lolote kuliko huo;

²³aidha, akiwa anao ulimi wa unyenyekevu, mume wake si mfano wa wanadamu.

²⁴Apataye mke hujipatia mali iliyo bora; msaidizi wa kumfaa, na nguzo ya kumtegemeza.

²⁵Pasipo ukuta shamba la mizabibu litafanyika ukiwa; naye asiye na mke atapata kuwa mtoro asiye na kikao.

²⁶Ni nani atakayewaamini kundi la wanyang'anyi warukao huku na huko?

²⁷Kadhalika mtu asiye na kiota, mwenye kulala ovyo wakati wa usiku popote alipo.