Read Swahilli Yoshua Mwana wa Sira 37 Bible Online

Yoshua Mwana wa Sira 37 - Swahilli bible

Yoshua Mwana wa Sira 37

¹Marafiki walio waongo Kila rafiki atasema, Mimi nami ni rafiki; bali yuko aliye rafiki aliyeitwa tu jina hili.

²Si huzuni, hata kufa, iliyoko, yeye aliye rafiki mwaminifu atakapogeuka kuwa adui?

³Ewe wazo ovu la asili, ya nini kufanyika kwako, hata kufunika nchi kavu kwa hila!

⁴Yuko mjanja, apendaye kutazamia meza ya rafiki yake, bali wakati wa shida atakaa mbali naye.

⁵Ndiye rafiki hasa, ambaye atashindana na mgeni kwa ajili yako, na kuishika ngao juu ya adui.

⁶Usimsahau rafiki yako wakati wa mashindano yako, wala usikose kumkumbuka upatapo mateka yako. Athari katika kushauri

⁷Aliye mshauri huyakuza mashauri yake; bali yuko atoaye shauri kwa ajili yake mwenyewe.

⁸Ujihadhari na mshauri, ujue kwanza kama anahitaji kitu, (kwa maana atatoa shauri kwa ajili yake mwenyewe);

⁹asije akakunasa, akakuambia, Shauri lako li jema; kisha atasimama upande ili aone yatayokupata.

¹⁰Usifanye shauri na mtu anayekushuku; na yeye anayekuhusudu umfiche shauri lako.

¹¹Aidha, usifanye shauri na mwanamke juu ya mwenzake; wala na mwoga katika mambo ya vita; wala na mfanya biashara kuhusu bei ya bidhaa; wala na mnunuzi katika habari ya kuuza kitu; wala na bahili juu ya upaji; wala na mkatili juu ya upole; wala na mvivu kwa habari ya kazi yoyote; wala na mtu wa mshahara kuhusu wakati wa kupanda; wala na mtumishi mlegevu juu ya shughuli nyingi; watu hao usiwasikilize katika shauri lolote.

¹²Bali afadhali siku zote usuhubiane na mtu mtauwa, unayemjua ya kwamba anazishika amri za BWANA, na moyo wake ni sawasawa na moyo wako, naye atahuzunika pamoja nawe ukipatikana na msiba.

¹³Lakini ulisimamishe shauri la moyo wako mwenyewe; kwa maana hakuna mtu aliye mwaminifu kwako kuliko moyo wako;

¹⁴yaani, pengine moyo wa mtu humwarifu wakati wa kufaa, hata kupita walinzi saba wakaao juu ya mnara.

¹⁵Na zaidi ya hayo yote umwombe Aliye Juu, ili Yeye akuongoze hatua zako katika kweli. Hekima ya kweli na ya uongo

¹⁶Busara itangulie kila kazi, na mashauri yatangulie kila tendo.

¹⁷Shina la mashauri ya moyoni huchipuza matawi manne;

¹⁸mema na mabaya, uzima na mauti; na daima mtawala wake ni ulimi.

¹⁹Kuna mwenye busara, mkufunzi wa wengi, ila hawezi kujifaidia nafsi yake.

²⁰Kuna mwingine, mwerevu wa maneno, lakini anachukiwa; huyu atakosa riziki;

²¹kwa jinsi alivyonyimwa hekima, mradi hakupewa na BWANA msemo wa neema.

²²Kuna mwenye hekima hasa, naye anaonesha hekima kwa habari ya nafsi yake, na matunda ya ufahamu wake katika mwili wake.

²³Kuna mwenye hekima kweli kweli, naye awafundisha watu wake, na matunda ya ufahamu wake ni amini.

²⁴Mwenye hekima atashiba baraka, na wote wamwonao wamwita heri.

²⁵Maisha ya mwanadamu mmoja inahesabika kwa siku, lakini siku za Israeli hazina hesabu;

²⁶tena mwenye hekima miongoni mwa watu atarithi utukufu, na jina lake litadumu milele. Kuhusu kiasi

²⁷Mwanangu, jijaribu nafsi yako maadamu u mzima, uviangalie vitu visivyokufaa, usijipatie hivyo.

²⁸Kwa maana si vitu vyote viwafaavyo watu wote, wala siyo kila mtu apendezwaye na kila kitu.

²⁹Usione uchu wa anasa yoyote, wala usiwe na choyo kwa habari ya vyakula vyako.

³⁰Yaani, katika wingi wa vyakula kuna ugonjwa, na ulafi uzidio waleta msokoto wa tumbo.

³¹Wengi wamekufa kwa sababu ya kula kwa pupa, bali mwenye kujihadhari atauzidisha uzima wake.