Read Swahilli Yoshua Mwana wa Sira 39 Bible Online

Yoshua Mwana wa Sira 39 - Swahilli bible

Yoshua Mwana wa Sira 39

¹Shughuli za Mwandishi Lakini mtu aikazaye roho yake kumcha Mungu, na kuitafakari torati yake Aliye Juu, hayupo mbali. Yeye ataitafuta hekima ya watu wote wa kale, na kujishughulisha na maneno ya manabii.

²Yeye ataweka akiba ya mazungumzo ya watu maarufu, na kujiingiza katika vikombo vya mafumbo,

³na kuchungulia maana ya ndani ya mifano, na kujizoeza katika maana iliyofichwa ya mithali.

⁴Atatumika miongoni mwa wakuu, na kuhudhuria mbele ya wafalme. Atasafiri katikati ya nchi za mataifa wageni; ambaye yeye mwenyewe amepatwa na mema na mabaya katika wanadamu.

⁵Atajikaza moyo kumwendea mapema BWANA aliyemuumba, na kuomba dua mbele zake Aliye Juu, na kufumbua kinywa chake kwa kusali, na kumsihi kwa ajili ya dhambi zake.

⁶Akijaliwa na BWANA aliye Mkuu, atajazwa roho ya ufahamu, na kukupua maneno ya hekima yake kama manyunyu, na kumshukuru BWANA katika sala zake.

⁷Atayaeleza mashauri yake na maarifa yake, na kuzitafakari siri zake.

⁸Atadhihirisha mafundisho ya hekima, na kuona fahari juu ya sheria ya agano la BWANA.

⁹Wengi watausifu ufahamu wake, wala kadiri ulimwengu udumuvyo haufutiki; wala ukumbusho wake hautaondoka; ila jina lake litaisha kizazi baada ya kizazi.

¹⁰Mataifa watatangaza habari za hekima yake, na makusanyiko watazihubiri sifa zake;

¹¹katika kuishi kwake atabarikiwa kuliko watu elfu, naye atakapofariki atazidi kuwa heri. Wimbo wa kumsifu Mungu

¹²Nitazidi kuyahubiri niliyoyafikiri; nimejazwa kama mbalamwezi.

¹³Enyi watoto watakatifu, mnisikilize, na kuchanua kama mwaridi uotao kandokando ya kijito cha maji.

¹⁴Toeni harufu nzuri kama ya manukato, chanueni maua kama nyinyoro, mkaeneze harufu iliyo tamu; na kuimba wimbo ulio wa kuhimidi. Mhimidini BWANA kwa ajili ya matendo yake yote.

¹⁵Likuzeni jina lake, na kuzitoa sifa zake, kwa nyimbo za midomo yenu na kwa kinubi. Nanyi mtakapotoa sifa zake imbeni hivi,

¹⁶Matendo yote ya BWANA ni mazuri mno, Na kila haja huishibisha wakati wake.

¹⁷Kwa neno lake maji yalisimama kama fungu, Na kwa neno la kinywa chake ikawa nuru.

¹⁸Upesi huyafanikisha mapenzi yake, Wala hakuna atakayeupinga wokovu wake.

¹⁹Mambo yao wote wenye mwili ni mbele zake, Wala haiwezekani kufichwa machoni pake.

²⁰Huyachungulia tangu milele hata milele, Kwa hiyo wokovu wake hauna mpaka; Kwake hakuna dogo wala lililo hafifu, Wala hakuna la ajabu lisilowezekana.

²¹Hakuna kusema, Nini hii? Au, Mbona hivi? Maana yote yamechaguliwa kwa kusudi lake.

²²Baraka yake ilifurika nchi kavu kama Nile, Na kuinywesha maji mengi kama Mto.

²³Vivyo hivyo laana yake hufukuza mataifa, Na kuigeuza nchi ya neema kuwa ya chumvi;

²⁴Njia zake ni sawa mbele ya watakatifu, Ila zimejiinua kama milima kwa washupavu.

²⁵Mema amewawekea watu wema tangu awali, Na kwa waovu kuna mema na mabaya;

²⁶Yale yaliyo faradhi kwa maisha ya binadamu, Maji, na moto, na chuma, na chumvi, Unga wa ngano, na asali, na maziwa, Damu ya zabibu, na mafuta, na nguo;

²⁷Vitu hivi vyote ni vyema kwa wenye adili, Navyo kwa wakosaji vitageuka vibaya.

²⁸Kuna pepo zilizoumbwa kwa kisasi, Na kwa ghadhabu kali hupiga kwa nguvu; Muhula ukiwadia humimina ukali wake, Na kuikomesha hasira yake aliyezifanya.

²⁹Moto, na mvua ya mawe, na njaa, na tauni, Hayo yote yalihulukiwa kwa hukumu;

³⁰Meno ya wanyama, na nge, na nyoka, Na upanga ukiwaangamiza wenye dhambi.

³¹Hayo yote yakaumbwa kwa makusudi yake. Yamo kanzini mwake yatakapotakiwa; Yatashangilia wakati atakapoyaamuru, Wakati huo wasilivunje neno lake.

³²Kwa hiyo tangu mwanzo nilikusudia, nikafikiri hivyo, nami nitayaandika hayo.

³³Matendo yote ya BWANA ni mazuri mno, na kila haja huishibisha wakati wake.

³⁴Hakuna awezaye kusema, Hili ni baya kuliko hili; maana yote yatakuja kusifiwa kwa majira yake.

³⁵Na sasa imbeni sifa kwa moyo wote na kwa vinywa vyenu, nanyi lihimidini jina lake Aliye Mtakatifu.