Read Swahilli Yoshua Mwana wa Sira 4 Bible Online

Yoshua Mwana wa Sira 4 - Swahilli bible

Yoshua Mwana wa Sira 4

¹Wajibu kwa Maskini na Wanyonge Mwanangu, angalia usimpunje maskini riziki yake, wala macho ya wahitaji usiyangojeze mno.

²Usimhuzunishe mwenye njaa, wala usimchokoze mtu mwenye shida.

³Usiudhikishe mtima wa mnyonge, wala usikawie kumpa fukara.

⁴Usimkatae mwombaji katika udhia wake, wala usiugeuzie uso wako mbali na mtu maskini.

⁵Wala usimpe mtu sababu kukulaani;

⁶mradi akikulaani katika uchungu wa roho yake, Yeye Muumba wake ataisikia sauti yake.

⁷Ujipatie kupendwa na kusanyiko, na mbele ya mkuu wa mji uiname kichwa.

⁸Umtegee maskini sikio lako, ukamjibu maneno ya amani kwa unyenyekevu.

⁹Umwopoe yeyote aliyedhulumiwa mkononi mwake yule amdhulumuye, wala usifanye woga utoapo hukumu.

¹⁰Uwe mfano wa baba kwa yatima, badala ya mume kwa mama yao; hivyo utakuwa mwana wake Aliye Juu, naye atakupenda kuliko akupendavyo mama yako. Thawabu za Hekima

¹¹Hekima huwafundisha wanawe na kuwaelimisha wanaomsikiliza.

¹²Wao wampendao hupenda uzima, nao wamtafutao watapata kibali kwa BWANA.

¹³Wao wamshikao wataurithi utukufu, hata na kudumu katika baraka ya BWANA.

¹⁴Wao nao wamtumikiao watamhudumia Yeye aliye Mtakatifu, nao wampendao BWANA huwapenda.

¹⁵Amsikiaye atahukumu kwa kweli, naye amjalie atakaa katika chumba chake cha ndani.

¹⁶Akimtumaini atamrithi, atakuwa naye hata vizazi vyote vya milele.

¹⁷Kwa maana mwanzo Hekima ataandamana naye kwa njia za kikombo, na kumletea hofu na woga, na kumwadhibisha kwa marudi yake, hata atakapoweza kumwamini roho yake, na kumhakiki kwa hukumu zake.

¹⁸Ndipo atakaporudi, na kumwongoza moja kwa moja, na kumfurahisha, na kumfunulia siri zake.

¹⁹Walakini akipotea, Hekima atamwacha, na kumtia mikononi mwa waangamizi. Haya na kuhangaika mno kibali cha watu

²⁰Mwanangu, uziangalie nyakati na majira, ujihadhari na maovu, ili usione haya kwa mambo ya roho yako.

²¹Kwa maana kuna haya iletayo dhambi, tena kuna haya iliyo utukufu na neema.

²²Usimjali mtu yeyote kiasi cha kujidhuru roho yako, wala usiingiwe na soni kiasi cha kujiangamiza.

²³Usiyazuie maneno yako iwapo yanaelekea hali ya salama, wala usifiche hekima yako kwa ajili ya uadilifu;

²⁴madhali kwa usemi hekima itajulikana, na mafundisho kwa neno la ulimi.

²⁵Usiseme neno kinyume cha kweli, na machoni pa Mungu uwe mnyenyekevu.

²⁶Usione haya kuungama dhambi zako, wala usijaribu kuuzuia mkondo wa mto.

²⁷Usijilaze chini ili mpumbavu akukanyage, lakini usimpendelee mwenye cheo.

²⁸Uishindanie kweli hata kufa, naye BWANA atakupigania wewe.

²⁹Usiwe mwepesi wa kunena, Mlegevu wa kutenda, msahaulifu.

³⁰Usiwe kama simba nyumbani mwako, Mwenye kutuhumu watumishi wako.

³¹ Mkono wako usinyoshwe kupokea, Ukarudishwa wakati wa kulipa.