Read Swahilli Yoshua Mwana wa Sira 41 Bible Online

Yoshua Mwana wa Sira 41 - Swahilli bible

Yoshua Mwana wa Sira 41

¹Kuhusu kifo Ewe Mauti! Ukumbusho wako ni uchungu! Kwake akaaye na amani katika kikao chake, Asiye na neno la kumfadhaisha; Ambaye amefanikiwa katika yote, Naye ana nguvu ya kula anasa.

²Ewe Mauti! Hukumu yako ina kibali! Kwake aliye fukara, amepungukiwa na nguvu, Mwenye miaka mingi, naye mzee sana; Ambaye aona fadhaa juu ya mambo yote, Naye ni mkaidi, ametindikiwa na saburi.

³Usiogope hukumu ya mauti; Uwakumbuke waliotangulia, Na wale watakaofuata.

⁴Ndiyo hukumu ya BWANA juu ya wote; Mbona wewe unakataa? Ndiyo mapenzi yake Aliye Juu, Kama ni miaka kumi, Au mia, au miaka elfu, Hakuna kuhoji wingi wa siku kaburini. Ajali ya mwovu

⁵Kizazi cha wakosaji ni machukizo, nao huzoea kukaa katika nyumba za wahalifu.

⁶Urithi wa wana wa wakosaji utaharibika, na kwa wazao wao kutakuwapo shutumu la daima,

⁷Watoto watamnung'unikia baba aliye mwovu, madhali kwa ajili yake watalaumiwa.

⁸Ole wenu! Watu waovu, Mlioiacha sheria ya Mungu Aliye Juu!

⁹Kuzaa mtazaa kwa madhara, Na kuzaliwa mtazaliwa kwa kuugua; Mkijikwaa, itawafurahisha watu, Na mkifa, sehemu yenu itakuwa laana.

¹⁰Yote yaliyo ya ubatili yataurudia ubatili, kadhalika na waovu wataendelea kutoka laana hata Jehanamu.

¹¹Wanadamu ni ubatili kwa habari ya miili yao; lakini jina la watauwa halitafutiwa mbali.

¹²Ujilinde sifa yako; maana itadumu kwako kuliko hazina elfu za thamani.

¹³Maisha mema yana siku zake; lakini sifa njema yadumu milele. Haya

¹⁴Wanangu sikilizeni mafundisho juu ya haya, na kuona soni sawasawa na hukumu yangu;

¹⁵kwa maana si vema kuishika haya ya kila namna;

¹⁶pia si kila namna ya soni inayopendeza. Adabu maishani

¹⁷Basi, mambo haya uyatahayarikie; uzinifu mbele ya baba na mama; na uongo mbele ya mtawala na mkuu;

¹⁸ulaghai mbele ya bwana na bibi; na dhambi mbele ya mkutano wa watu;

¹⁹Udhalimu mbele ya mshiriki na rafiki; na kiburi mahali ukaapo kama mgeni;

²⁰na kubadili kiapo na agano; kujiegama juu ya kiwi chakulani;

²¹kumkataa kwa dharau mtu aombaye bakshishi; kugeuza uso wako mbali na jamaa yako; kuuzuia bila haki mgawanyo wa urithi; kunyamaza kwao wanaokusalimu;

²²kumtazama mwanamke aliye malaya;

²³kumkodolea macho mwanamke aliyeolewa;

²⁴kujishughulisha mno na mjakazi wake, wala usikaribie kitanda chake;

²⁵makaripio mbele ya rafiki, na mashutumu ukiisha kumfadhili mtu;

²⁶kumwambia mtu mwingine neno ulilolisikia, na kufunua siri.

²⁷Hivyo utakuwa mwenye haya kweli kweli, na kuona kibali machoni pa kila mtu aliye hai.