Read Swahilli Yoshua Mwana wa Sira 43 Bible Online

Yoshua Mwana wa Sira 43 - Swahilli bible

Yoshua Mwana wa Sira 43

¹Ubora wa jua Fahari ya huko juu ni kweu angani, Kuba ya mbingu uonapo utukufu wake.

²Jua lizukapo huleta habari liendavyo; Jinsi zinavyotisha kazi zake Aliye Juu!

³Wakati wa adhuhuri huikausha nchi, Naye ni nani atakayehimili joto lake kali?

⁴Tanuri iliyopuliziwa huyeyusha madini; lakini vianga vya jua huiunguza milima, na ndimi zake hutoa mafukuto ya moto, na mwangaza wake hupofusha macho.

⁵BWANA ndiye mkuu, ambaye amelihuluku; tena kwa neno lake lahimiza mwendo wake. Ubora wa mwezi

⁶Mwezi nao pia huangaza kwa wakati wake, ili kutawala nyakati, na kuwa ishara ya ulimwengu.

⁷Kutoka kwa mwezi ni dalili ya sikukuu; Nuru yake hupungua ukipita mwezi mpevu.

⁸Mwezi nao huitwa kwa jina lake; Ukikua kwa ajabu ulivyobadilika; Mwanga wa ajabu kati ya majeshi ya juu, Ung'aapo katika anga la mbinguni. Utukufu wa nyota na upinde wa mvua

⁹Uzuri wa mbingu ndio fahari ya nyota, safusafu za kutoa nuru katika mahali pa BWANA palipo juu sana.

¹⁰Kwa neno lake Aliye Mtakatifu husimama taratibu, wala hazitasinzia mnamo mikesha yake. Upinde wa mvua

¹¹Uuangalie upinde wa mvua, kumhimidi Yeye aliyeufanya; uzuri wake unazidi sana katika mng'ao wake.

¹²Unaizungusha kuba ya mbingu duara ya fahari; nayo ndiyo mikono yake Aliye Juu iliyoupinda. Maajabu ya asili

¹³Kwa nguvu zake Yeye hutoa umeme, na kuvimemetesha vimulimuli vyake katika hukumu.

¹⁴Kwa amri yake hazina zafunguliwa, na mawingu yatoka ili kuruka kama ndege.

¹⁵Kwa uweza wake mkuu huyafanya mawingu kuwa magumu, na mvua ya mawe huvunjiwa mawe yake madogo.

¹⁶Sauti ya ngurumo yake huitetemesha nchi, na kwa kutokea kwake milima itatikisika. Kwa mapenzi yake kusi itavuma,

¹⁷pia na tufani ya kaskazi, na kimbunga.

¹⁸Mfano wa ndege wakiruka chini hunyunyiza theluji, na mfano wa nzige wakitua ndivyo inavyoanguka; jicho litashangaa kwa ajili ya uzuri wa weupe wake, na moyo utastaajabu kwa jinsi inavyonesha.

¹⁹Sakitu tena huimimina juu ya nchi kama chumvi, na kuvifanya vijiti kuchanua maua mfano wa vito.

²⁰Kisha huvumisha upepo wa baridi, na barafu itaganda juu ya maji; itayakalia kila makusanyiko ya maji, nayo maji yataivaa kana kwamba ni deraya.

²¹Huiunguza mimea ya milimani, na kuikausha nyika, na majani yote ya kondeni, kama moto.

²²Ukungu ukitanda kama mawingu ni kupona vitu vyote; kama umande baada ya joto utaleta furaha.

²³Kwa shauri lake amevituliza vilindi, na kupanda visiwa ndani yake.

²⁴Wale wasafirio baharini hunena upana wake, na sisi tusikiapo kwa masikio yetu twamaka mno.

²⁵Ndimo viendamo vile viumbe vya kigeni vya ajabu, jamii ya vyote vyenye uhai, yaani, viumbe vya vilindini vyenye nguvu.

²⁶Kwa kusudi lake huifanikisha kazi yake, Na kwa neno lake vyote vimekuwapo.

²⁷Tuseme maneno mengi; hatutadiriki; Jumla ya maneno ni, Ndiye vyote.

²⁸Sisi tupateje uwezo wa kumtukuza? Mradi ndiye Mkuu juu ya kazi zake zote.

²⁹BWANA hutisha sana, naye ni mkuu mwenye kupita vitu vyote; naam, uweza wake ni wa ajabu.

³⁰Mkija kumtukuza BWANA, mhimidini kadiri mwezavyo, maana hata hivyo kuna zaidi; mtakapomwadhimisha, tumieni nguvu zenu zote, maana hamtadiriki.

³¹Ni nani aliyemwona, hata aweze kumdhihirisha? Ni nani awezaye kumkuza alivyo?

³²Mambo mengi sana yamefichwa, makubwa kupita hayo; maana tulizoziona ni chache tu katika kazi zake.

³³Kwa kuwa BWANA ameviumba vitu vyote vilivyopo, nao wamchao amewapa hekima.