Read Swahilli Yoshua Mwana wa Sira 44 Bible Online

Yoshua Mwana wa Sira 44 - Swahilli bible

Yoshua Mwana wa Sira 44

¹Wimbo wa kuwaenzi wakale Haya na tuwasifu watu wa utauwa, Na baba zetu katika vizazi vyao.

²BWANA aliwafanyizia utukufu mwingi, Walio mashuhuri tangu siku za kale.

³Wale waliotawala katika milki zao, Maarufu kwa kuwa walikuwa hodari; Wale waliotoa mashauri kwa akili zao, Na kuhubiri mambo kwa unabii wao;

⁴Wakuu wa mataifa kwa ajili ya mawaidha, Waliowafaa watu kwa kuona mbele. Wenye hekima katika mafundisho yao, Wakitunga mithali za kupokezana;

⁵Wenye kuvumbua nyimbo na ngoma, Nao waliobuni tenzi kwa kuandika;

⁶Watu waelekevu wenye majaliwa, Ambao walistarehe katika makao yao;

⁷Hao wote walisifiwa katika vizazi vyao, Na kutukuzwa katika siku zao.

⁸Baadhi yao waliacha jina nyuma yao, Hata watu watangaze sifa zao;

⁹Baadhi yao hawana kumbukumbu, Wamepotea kana kwamba hawakuwako; Wamekuwa kana kwamba hawakuzaliwa, Wala watoto wao baada yao;

¹⁰Lakini hawa walikuwa watu wa utauwa, Wala kazi zao za haki hazisahauliki.

¹¹Wema wao utawadumia wazao wao, Na urithi wao una wana wa wana;

¹²Wazao wao wanashikamana na agano, Na watoto wao kwa ajili yao.

¹³Kumbukumbu lao litadumu milele, Wala haki yao haifutiki kamwe;

¹⁴Miili yao imezikwa katika amani, Na jina lao laishi hata vizazi vyote.

¹⁵Mkutano wa watu wataitangaza hekima yao, Na makusanyiko watazihubiri sifa zao. Enoko

¹⁶ Henoko alionekana kuwa mkamilifu, akaenda pamoja na BWANA, akatwaliwa naye; mfano wa kujuana naye hata vizazi vyote. Nuhu

¹⁷ Nuhu mwenye haki alionekana amekamilika; wakati wa ukiwa mtupu akapata kuwa mbegu ya kufanya upya wanadamu; kwa ajili yake kukawa na mabaki hapo palipokuja gharika.

¹⁸Tena pamoja naye likafanyika agano la milele; ya kwamba wote wenye mwili wasifutwe tena. Abrahamu

¹⁹ Abrahamu alikuwa baba wa mataifa mengi; wala hakupatikana mtu mfano wake kwa utukufu;

²⁰ambaye aliishika sheria yake Aliye Juu, na Mungu alifanya agano naye. Katika mwili wake akatilia agizo, naye alipojaribiwa alionekana kuwa amini.

²¹Kwa hiyo Mungu akamthibitishia kwa uapo ya kwamba atawabariki mataifa katika uzao wake, na kumzidisha kama mavumbi ya nchi, na kuwainua wazao wake kama nyota; na kuwapa urithi toka bahari mpaka bahari, na toka mto mpaka miisho ya dunia. Isaka na Yakobo

²² Kwa Isaka naye akalifanya kuwa thabiti, kwa ajili ya Abrahamu, baba yake.

²³Agano la wazazi wake akampa, na baraka ilikaa juu ya kichwa cha Israeli. Akamthibitisha katika baraka zake, akampa urithi wake. Akaugawa urithi huo sehemu zake katikati ya makabila kumi na mawili; na kutoka kwake akamtokeza Yusufu, mtu wa rehema, mwenye kibali mbele ya wote wenye mwili.