Read Swahilli Yoshua Mwana wa Sira 47 Bible Online

Yoshua Mwana wa Sira 47 - Swahilli bible

Yoshua Mwana wa Sira 47

¹Nathani Baada yake akasimama Nathani ili atoe unabii zamani za Daudi. Daudi

² Kama mafuta yalivyotengwa na kafara ya amani, vivyo hivyo Daudi alitengwa na wana wa Israeli.

³Naye alicheza pamoja na simba kana kwamba ni wana-mbuzi, pia pamoja na dubu kana kwamba ni wana-kondoo wa kundi.

⁴Je! Hakumwua jitu katika ujana wake, Akawaondolea watu lawama; Alipouinua mkono wake na jiwe la teo, Akayashusha majivuno ya Goliathi?

⁵Kwa maana alimwita Aliye Juu; Na yeye akaitia nguvu yamini yake; Ili amwue shujaa hodari wa vita; Ili aiinue pembe ya watu wake.

⁶Kwa hiyo binti za watu wakamtukuza wakiimba, na kumheshimu alivyoua makumi elfu yake; naye alipokwisha kuivaa taji la utukufu,

⁷alipigana na adui na kuwashinda pande zote; akajenga maboma yake kati ya Wafilisti, akaivunja pembe yao vipande vipande, hata siku hii ya leo.

⁸Katika kila kazi yake Daudi alimshukuru Mungu Aliye Juu kwa maneno matukufu; na kwa moyo wake wote akampenda Mola wake, akamhimidi kila siku daima.

⁹Pia akaweka waimbaji mbele ya madhabahu, ili watoe sauti tamu katika kuimba kwao.

¹⁰Akauongeza uzuri wa sikukuu, akaziratibisha nyakati katika ukamilifu; pindi walipolihimidi jina takatifu la BWANA, hata patakatifu pakavuma sauti tokea asubuhi na mapema.

¹¹Naye BWANA akamwondolea dhambi zake, akiinua pembe yake hata milele; akampa agano la ufalme, na kiti kitakatifu cha enzi katika Israeli. Sulemani

¹²Na kwa ajili yake akainuliwa mwanawe, mtu wa ufahamu aliyekaa salama.

¹³ Sulemani alimiliki katika siku za kufanikiwa; naye Mungu akampa raha kumzunguka pande zote; ili alijengee jina lake nyumba, na kumwekea tayari patakatifu pa milele.

¹⁴Jinsi ulivyohekimishwa ujanani, Na kujazwa ufahamu kama Nile!

¹⁵Nafsi yako uliifunikiza nchi, Na kuikusanya mifano kama bahari.

¹⁶Jina lako likafikia visiwa vya mbali, Nao wakazisikiliza habari zako;

¹⁷Kwa nyimbo, na mithali, na tafsiri, Ukawastaajabisha watu wote.

¹⁸ Katika jina la BWANA Mungu, Aitwaye Mungu wa Israeli, Ulikusanya dhahabu kama chuma, Na kuzidisha fedha kama mawe.

¹⁹ Ila kwa wanawake uliinamisha viuno, Na kutiishwa mwili wako;

²⁰Hivyo uliitupa heshima yako, Na kukinajisi kitanda chako. Uliwaletea wanao ghadhabu; Kuna sikitiko kwa upuzi wako;

²¹ Hata ufalme ukagawanyika, Wakatawala waasi katika Efraimu.

²² Bali BWANA hataiacha rehema yake, Wala kulivunja neno lake; Hatawafuta wazao wa mteule wake, Wala kuharibu uzao wa mpenzi wake. Basi, akamjalia Yakobo mabaki, na Daudi shina limtokalo. Rehoboamu na Yeroboamu

²³ Naye Sulemani akastarehe pamoja na baba zake. Huyo ndiye aliyemwacha nyuma yake, katika wazao wake, Rehoboamu, mpumbavu kabisa, asiyekuwa na ufahamu hata kidogo; ambaye aliwachukiza watu kwa shauri lake hata wakaasi. Yeroboamu

²⁴Yeroboamu mwana wa Nebati naye, aliyewakosesha Israeli, akawapatia Waefraimu kikwazo, hata wafukuzwe katika nchi yao. Tena dhambi zao zikaongezeka mno ajabu;

²⁵mradi walijiuza kutenda kila namna ya uovu, hata kisasi kiwaangukie.