Read Swahilli 1 Wamakabayo 7 Bible Online

1 Wamakabayo 7 - Swahilli bible

1 Wamakabayo 7

¹Katika mwaka wa mia moja na hamsini na moja Demetrio, mwana wa Seleuko, alirudi kutoka Rumi, akaenda pamoja na watu wachache kwenye mji wa pwani akajitawaza huko.

²Ikawa, alipokwenda kwenye jumba la kifalme la baba zake, wakuu wa jeshi waliwashika Antioko na Lisia wakawaleta kwake.

³Alipoambiwa yaliyofanyika alisema, Nisiwaone!

⁴Askari wakawaua, naye Demetrio aliketi katika kiti cha enzi.

⁵Nao Waisraeli wote walioasi na kuikana dini yao walimjia, pamoja na Alkimo, kiongozi wao, aliyetaka kuwa kuhani mkuu,

⁶wakawashtaki watu kwa mfalme, wakisema, Yuda na watu wake wamewaharibu rafiki zako wote, na kututawanya mbali na kwetu.

⁷Basi, tuma mtu unayemwamini aende akatazame jinsi alivyotuangamiza sisi na nchi ya mfalme; akawaadhibu, pamoja na wote waliowasaidia.

⁸Mfalme akamchagua Bakide, mmoja wa rafiki za mfalme, kiongozi wa nchi ng'ambo ya mto, mtu mkubwa katika ufalme, tena mwaminifu kwa mfalme.

⁹Akampeleka pamoja na yule mwovu Alkimo, ambaye alimthibitisha katika kazi ya kuhani mkuu, akimwamuru awapatilize wana wa Israeli.

¹⁰Wakaondoka na jeshi kubwa, wakaja katika nchi ya Uyahudi, wakatuma wajumbe kuwadanganya Yuda na ndugu zake kwa maneno ya amani.

¹¹Lakini hawakujali maneno yao, maana waliona wamekuja na jeshi kubwa.

¹²Jamii ya waandishi waliwaendea Alkimo na Bakide kutaka haki,

¹³na Wahasidimu walikuwa wa kwanza na wana wa Israeli kuomba amani kwao,

¹⁴maana walisema, Kuhani wa ukoo wa Haruni amekuja na askari, naye hatatudhulumu.

¹⁵Akawapa maneno ya amani na kuwaapia kwamba, Hatuna maazimio mabaya kwenu wala kwa rafiki zenu.

¹⁶Wakamsadiki. Lakini mara alishika watu sitini miongoni mwao akawaua kwa siku moja, kama ilivyoandikwa:

¹⁷ Waliitupa miili ya watakatifu wako Na kuimwaga damu yao Pande zote za Yerusalemu, Wala hapakuwa na mzishi.

¹⁸Watu wote wakatishwa na kuona hofu kwa sababu yao, wakisema, Kwao hakuna kweli wala haki; wamelivunja agano na kiapo walichokiapa!

¹⁹Bakide akaondoka Yerusalemu akapiga kambi yake Bezetha. Akatuma watu kukamata watoro wengi waliokuwa kwake na watu wengine, akawaua, akawatupa katika shimo kubwa.

²⁰Akamkabidhi Alkimo utawala wa nchi, akamwachia askari wa kumsaidia, kisha aliondoka akamrudia mfalme.

²¹Alkimo akaipigania kazi yake ya kuhani mkuu,

²²na wenye matata wote wakajiweka upande wake, wakaitiisha nchi ya Uyahudi na kufanya hasara nyingi.

²³Yuda akayaona mabaya yote ambayo Alkimo na wenzake wamewafanyia Waisraeli — kupita yale ya mataifa —

²⁴akazunguka kwenye mipaka ya Uyahudi akiwapatiliza wale waliomtoroka, na kuwazuia wasiondoke.

²⁵Alkimo alipoona ya kuwa Yuda na watu wake wamepata nguvu, wala hawezi kushindana nao, alikwenda tena kwa mfalme akawasingizia mabaya.

²⁶Mfalme akamtuma Nikano, mmoja wa wakuu wake wastahiki, mtu aliyewachukia Waisraeli na kuwa adui yao, akampa amri kuwaharibu watu hao.

²⁷Nikano akaja Yerusalemu na jeshi kubwa, akawadanganya Yuda na ndugu zake kwa maneno ya amani,

²⁸akisema, Isiwepo vita kati yetu. Nitakuja na watu wachache tu, ili niwatazame nyuso zenu kwa amani.

²⁹Akaingia Uyahudi, wakaamkiana kwa amani, lakini adui walikuwa wamejiweka tayari kumkamata Yuda.

³⁰Jambo hilo lilibainika kwa Yuda, akamwonea hofu, asikubali kumwona tena.

³¹Nikano alipoona shauri lake limetambulikana, akatoka kupigana na Yuda huko Kafasalama.

³²Watu wa Nikano wapatao mia tano wakaanguka, na wengine waliikimbilia ngome ya mji wa Daudi.

³³Baada ya hayo, Nikano alipanda kwenda mlima Sayuni, na makuhani wengine wakatoka katika patakatifu, pamoja na wazee wengine, ili kumsalimu kwa amani na kumwonesha sadaka ya kuteketezwa iliyokuwa ikitolewa kwa kumwombea mfalme.

³⁴Bali aliwadhihaki na kuwafanyia mzaha, akawaaibisha na kutoa maneno ya dharau.

³⁵Akaapa kwa hasira, Kama Yuda na jeshi lake hawatiwi mikononi mwangu, itakuwa, nitakaporudi kwa amani, nitaiteketeza kabisa nyumba hii. Akaondoka kwa hasira nyingi.

³⁶Makuhani wakaingia, wakasimama mbele ya madhabahu na patakatifu wakilia.

³⁷Wakasema, Wewe uliyeichagua nyumba hii iitwe kwa jina lako, iwe nyumba ya sala na dua kwa watu wako,

³⁸uwapatilize mtu huyu na jeshi lake, waanguke kwa upanga. Uzikumbuke kufuru zao, uyafute makao yao.

³⁹Nikano akaondoka Yerusalemu akapiga kambi Beth-horoni, na jeshi la Shamu likakutana naye pale.

⁴⁰Yuda naye alipiga kambi yake Adasa na watu elfu tatu.

⁴¹ Yuda akasali akisema, Watu wa mfalme walipotukana, malaika wako akatoka akapiga watu elfu mia moja na themanini na tano miongoni mwao.

⁴²Basi, vivi hivi ulipige jeshi hili mbele yetu leo, ili wale watakaosalia wajue ya kuwa ametukana patakatifu pako. Umhukumu sawasawa na uovu wake.

⁴³Majeshi yakapambana vitani siku ya kumi na tatu ya mwezi Adari, jeshi la Nikano likashindwa. Yeye mwenyewe alianguka katika mapigano ya kwanza,

⁴⁴hata askari wake walipoona ya kuwa ameanguka walitupa silaha zao wakakimbia.

⁴⁵Wakawafuatia mwendo wa kutwa kutoka Adasa hata kufika Gazara; wakapiga tarumbeta za ishara.

⁴⁶Watu wakatoka katika miji yote ya Uyahudi iliyozunguka, wakaanza kuwazunguka pande zote; wakawarudisha nyuma,

⁴⁷hata wote wakaanguka kwa upanga, asibaki hata mmoja. Wakachukua nyara na mateka, wakamkata Nikano kichwa na ule mkono wa kuume aliounyosha kwa ufidhuli, wakavileta na kuvitungika Yerusalemu.

⁴⁸Watu wakafurahi sana, wakiadhimisha siku ile kwa shangwe kuu.

⁴⁹Wakaagiza iadhimishwe kila mwaka, siku ya kumi na tatu ya Adari.

⁵⁰Nchi ya Uyahudi ikatulia kitambo.