Read Swahilli Kumbukumbu la Torati 20 Bible Online

Kumbukumbu la Torati 20 - Swahilli bible

Kumbukumbu la Torati 20

¹ Utokapo kwenda vitani kupigana na adui zako, na kuona farasi, na magari, na watu wengi kuliko wewe, usiwaogope; kwa kuwa BWANA Mungu wako, yu pamoja nawe, aliyekukweza kutoka nchi ya Misri.

²Na iwe, msogeapo mapiganoni, kuhani na akaribie na kusema na watu,

³awaambie, Sikilizeni, enyi Israeli, hivi leo mwasogea mapiganoni juu ya adui zenu mioyo yenu isizimie; msiogope, wala msiteteme, wala msiingiwe na hofu kwa ajili ya wao;

⁴ kwa maana BWANA, Mungu wenu, ndiye awaandamaye kwenda kuwapigania juu ya adui zenu, ili kuwaokoa ninyi.

⁵ Na maofisa na waseme na watu, na kuwaambia, Ni mtu gani aliye hapa aliyejenga nyumba mpya, wala hajaiweka wakfu? Arudi nyumbani kwake, asije akafa mapiganoni, ikawekwa wakfu na mtu mwingine.

⁶Ni mtu gani aliye hapa aliyepanda shamba la mizabibu, wala hajatumia matunda yake? Arudi nyumbani kwake asije akafa mapiganoni, yakatumiwa na mtu mwingine matunda yake.

⁷ Ni mtu gani aliye hapa aliyemposa mke wala hajaoa? Arudi nyumbani kwake asije akafa mapiganoni, huyo mwanamke akaolewa na mume mwingine.

⁸ Tena maofisa na waseme zaidi na watu, wawaambie, Ni mtu gani aliye hapa tena mwenye hofu na moyo mnyonge? Arudi nyumbani kwake, isije mioyo ya nduguze ikayeyuka mfano wa moyo wake.

⁹Itakuwa hapo watakapokwisha wale makamanda kusema na watu, na waweke majemadari wa majeshi juu ya watu.

¹⁰ Utakaposogea karibu ya mji kwenda kupigana juu yake, ndipo utakapowapigia ukelele wa amani.

¹¹ Itakuwa watakapokujibu kwa amani, na kukufungulia, ndipo watu wote watakaoonekana humo watakufanyia kazi ya shokoa, na kukutumikia.

¹²Na kwamba hawataki kufanya amani nawe, lakini watafanya vita juu yako, ndipo uuhusuru;

¹³ na BWANA, Mungu wako, autiapo mkononi mwako, mpige kila mume aliyemo kwa makali ya upanga;

¹⁴ lakini wanawake na watoto, na wanyama wa miji, na vilivyo mjini vyote, navyo ni nyara zake zote, uvitwae viwe mateka kwako; nawe utakula nyara za adui zako alizokupa BWANA, Mungu wako.

¹⁵Utaifanyia vivyo hivyo miji yote iliyo mbali sana nawe, isiyokuwa miji ya mataifa haya.

¹⁶ Lakini katika miji ya mataifa haya akupayo BWANA, Mungu wako, kuwa urithi, usihifadhi kuwa hai kitu chochote kipumzikacho;

¹⁷lakini uwaangamize kabisa, Mhiti, na Mwamori, na Mkanaani, na Mperizi, na Mhivi, na Myebusi, kama alivyokuamuru BWANA, Mungu wako;

¹⁸ wasije wakawafunza kufanya mfano wa machukizo yao yote, waliyoifanyia miungu yao; hivyo itakuwa ni makosa juu ya BWANA, Mungu wenu.

¹⁹Wewe utakapohusuru mji siku nyingi kwa kufanya vita juu yake, upate kuutwaa, usiangamize miti yake kwa kupeleka shoka juu yake, kwani utaweza kula matunda yake; wala usiiteme, kwa maana huo mti wa kondeni, je! Ni mtu, hata ukauzuie?

²⁰Ila miti uijuayo si miti ya kuliwa iangamize, na kuitema; ukajenge maburuji juu ya mji ufanyao vita juu yako, hata uanguke.