Read Swahilli Yohana 4 Bible Online

Yohana 4 - Swahilli bible

Yohana 4

¹ Kwa hiyo Bwana, alipofahamu ya kuwa Mafarisayo wamesikia ya kwamba, Yesu anafanya wanafunzi wengi kuliko Yohana, na kuwabatiza,

² (lakini Yesu mwenyewe hakubatiza, bali wanafunzi wake)

³aliondoka Yudea, akaenda zake tena mpaka Galilaya.

⁴ Naye alikuwa hana budi kupita katikati ya Samaria.

⁵ Basi akafika katika mji wa Samaria, uitwao Sikari, karibu na lile shamba ambalo Yakobo alimpa Yusufu mwanawe.

⁶Na hapo palikuwa na kisima cha Yakobo. Basi Yesu, kwa sababu amechoka kwa safari yake, akaketi vivi hivi kisimani. Nayo ilikuwa yapata saa sita.

⁷Akaja mwanamke Msamaria kuteka maji. Yesu akamwambia, Nipe maji ninywe.

⁸Kwa maana wanafunzi wake wamekwenda mjini kununua chakula.

⁹ Basi yule mwanamke Msamaria akamwambia, Imekuwaje wewe Myahudi kutaka maji kwangu, nami ni mwanamke Msamaria? (Maana Wayahudi hawachangamani na Wasamaria.)

¹⁰ Yesu akajibu, akamwambia, Kama ungaliijua karama ya Mungu, naye ni nani akuambiaye, Nipe maji ninywe, ungalimwomba yeye, naye angalikupa maji yaliyo hai.

¹¹Yule mwanamke akamwambia, Bwana, huna kitu cha kutekea, na kisima ni kirefu; basi umeyapata wapi hayo maji yaliyo hai?

¹² Je! Wewe u mkubwa kuliko baba yetu, Yakobo, aliyetupa kisima hiki, naye mwenyewe akanywa maji yake, na wanawe pia, na wanyama wake?

¹³ Yesu akajibu, akamwambia, Kila anywaye maji haya ataona kiu tena;

¹⁴ lakini yeyote atakayekunywa maji yale nitakayompa mimi hataona kiu milele; bali yale maji nitakayompa yatakuwa ndani yake chemchemi ya maji, yakibubujikia uzima wa milele.

¹⁵Yule mwanamke akamwambia, Bwana, unipe maji hayo, nisione kiu, wala nisije hapa kuteka.

¹⁶Yesu akamwambia, Nenda kamwite mumeo, uje naye hapa.

¹⁷Yule mwanamke akajibu, akasema, Sina mume. Yesu akamwambia, Umesema vema, Sina mume;

¹⁸kwa maana umekuwa na waume watano, naye uliye naye sasa siye mume wako; hapo umesema kweli.

¹⁹ Yule mwanamke akamwambia, Bwana, naona ya kuwa u nabii!

²⁰ Baba zetu waliabudu katika mlima huu, nanyi husema ya kwamba huko Yerusalemu ni mahali patupasapo kuabudia.

²¹ Yesu akamwambia, Mama, unisadiki, saa inakuja ambayo hamtamwabudu Baba katika mlima huu, wala kule Yerusalemu.

²² Ninyi mnaabudu msichokijua; sisi tunaabudu tukijuacho; kwa kuwa wokovu watoka kwa Wayahudi.

²³Lakini saa inakuja, nayo sasa ipo, ambayo waabuduo halisi watamwabudu Baba katika roho na kweli. Kwa maana Baba awatafuta watu kama hao wamwabudu.

²⁴ Mungu ni Roho, nao wamwabuduo yeye imewapasa kumwabudu katika roho na kweli.

²⁵ Yule mwanamke akamwambia, Najua ya kuwa yuaja Masihi, (aitwaye Kristo); naye atakapokuja, yeye atatufunulia mambo yote.

²⁶ Yesu akamwambia, Mimi ninayesema nawe, ndiye.

²⁷Mara hiyo wakaja wanafunzi wake, wakastaajabu kwa sababu alikuwa akisema na mwanamke; lakini hakuna aliyesema, Unatafuta nini? Au, Mbona unasema naye?

²⁸Basi yule mwanamke akauacha mtungi wake, akaenda zake mjini, akawaambia watu,

²⁹Njoni, mtazame mtu aliyeniambia mambo yote niliyoyatenda. Je! Inawezekana kuwa huyu ndiye Kristo?

³⁰Basi wakatoka mjini, wakamwendea.

³¹Huko nyuma wanafunzi wakamsihi wakisema, Rabi, ule.

³² Akawaambia, Mimi ninacho chakula msichokijua ninyi.

³³Basi wanafunzi wake wakasemezana, Je! Mtu amemletea chakula?

³⁴ Yesu akawaambia, Chakula changu ndicho hiki, niyatende mapenzi yake aliyenituma, nikaimalize kazi yake.

³⁵ Hamsemi ninyi, Bado miezi minne, ndipo yanakuja mavuno? Tazama, mimi nawaambieni, Inueni macho yenu myatazame mashamba, ya kuwa yamekwisha kuwa meupe, tayari kwa mavuno.

³⁶Naye avunaye hupokea mshahara, na kukusanya matunda kwa uzima wa milele, ili yeye apandaye na yeye avunaye wapate kufurahi pamoja.

³⁷ Kwa maana hapo neno hilo huwa kweli, Mmoja hupanda akavuna mwingine.

³⁸Mimi niliwatuma myavune yale msiyoyataabikia; wengine walitaabika, nanyi mmeingia katika taabu yao.

³⁹Na katika mji ule Wasamaria wengi walimwamini kwa sababu ya neno la yule mwanamke, aliyeshuhudia kwamba, Aliniambia mambo yote niliyoyatenda.

⁴⁰Basi wale Wasamaria walipomwendea, walimsihi akae kwao; naye akakaa huko siku mbili.

⁴¹Watu wengi zaidi wakaamini kwa sababu ya neno lake.

⁴² Wakamwambia yule mwanamke, Sasa tunaamini, wala si kwa sababu ya maneno yako tu; maana sisi tumesikia wenyewe, tena tunajua ya kuwa hakika huyu ndiye Mwokozi wa ulimwengu.

⁴³ Na baada ya siku mbili hizo akaondoka huko, akaenda Galilaya.

⁴⁴ Kwa maana Yesu mwenyewe alishuhudia ya kwamba nabii hapati heshima katika nchi yake mwenyewe.

⁴⁵ Basi alipotoka Galilaya, Wagalilaya walimpokea; kwa kuwa wameyaona mambo yote aliyoyatenda huko Yerusalemu wakati wa sikukuu; maana hao nao waliiendea sikukuu.

⁴⁶ Basi alifika tena Kana ya Galilaya, hapo alipoyafanya yale maji kuwa divai. Na palikuwa na ofisa mmoja ambaye mwanawe alikuwa mgonjwa huko Kapernaumu.

⁴⁷ Huyo aliposikia ya kwamba Yesu amekuja kutoka Yudea mpaka Galilaya, alimwendea, akamsihi ashuke na kumponya mwanawe; kwa maana alikuwa karibu kufa.

⁴⁸ Basi Yesu akamwambia, Msipoona ishara na maajabu hamtaamini kabisa?

⁴⁹Yule ofisa akamwambia, Bwana, ushuke mtoto wangu asije akafa.

⁵⁰Yesu akamwambia, Nenda; mwanao yu hai. Mtu yule akaliamini lile neno aliloambiwa na Yesu, naye akashika njia.

⁵¹ Na alipokuwa akishuka, watumwa wake walimlaki, wakisema ya kwamba mtoto wake yu hai.

⁵²Basi akawauliza habari ya saa alipoanza kuwa na nafuu; nao wakamwambia, Jana, saa saba, homa ilimwacha.

⁵³ Basi babaye akafahamu ya kuwa ni saa ile ile aliyoambiwa na Yesu, Mwanao yu hai. Akaamini yeye na wote wa nyumbani mwake.

⁵⁴ Hiyo ni ishara ya pili aliyoifanya Yesu, alipokuwa ametoka Yudea kwenda Galilaya.