Read Swahilli Yudithi 12 Bible Online

Yudithi 12 - Swahilli bible

Yudithi 12

¹Holoferne akawaamuru watu wampeleke Yudithi kwenye meza ambako sahani zake za fedha ziliwekwa, na akaandaliwe chakula kutokana na vyakula maalumu anavyokula na kupewa divai.

² Lakini Yudithi akakataa, akisema, “Siwezi kula chakula hiki, kwani nitakuwa navunja sheria za Mungu wangu. Nitakula tu chakula nilichojichukulia.”

³Holoferne akamwuliza, “Lakini tutafanya nini wakati chakula chako na divai yako vimekwisha? Tutapata wapi chakula kwa ajili yako? Kambini mwetu hakuna Waisraeli.”

⁴Yudithi akamjibu, “Bwana, kwa hakika, kama uishivyo, nina chakula cha kutosha mpaka hapo Mungu atakapokuwa amenitumia kutekeleza mpango wake.”

⁵Watumishi binafsi wa Holoferne wakampeleka Yudithi kwenye hema. Akalala huko mpaka asubuhi na mapema alipoamka

⁶na kutuma ujumbe kwa Holoferne kuomba ruhusa aende bondeni kuomba.

⁷Holoferne akaagiza walinzi wake wamruhusu Yudithi kutoka kambini. Yudithi akakaa kambini kwa muda wa siku tatu, na kila usiku akatoka kwenda bondeni karibu na mji wa Bethulia na kuoga kwenye chemchemi.

⁸Baada ya kuoga, alimwomba Bwana Mungu amlinde katika mpango wake wa kuwaletea Waisraeli ushindi.

⁹Kisha baada ya kujiweka safi kidini alirudi na kukaa hemani mwake mpaka chakula chake cha jioni kilipoletwa kwake.

¹⁰Siku ya nne ya Yudithi kukaa kambini, Holoferne aliwafanyia karamu maofisa wenye vyeo vya juu, lakini hakuwaita maofisa waliokuwa kwenye zamu ya ulinzi.

¹¹Alimwambia Bagoa, towashi aliyesimamia mambo yake binafsi, “Nenda ukamshawishi yule mwanamke Mwebrania aliye chini ya ulinzi wako, aje hemani kula na kunywa pamoja nasi.

¹²Itakuwa aibu kwetu kumwacha mwanamke mzuri kama yule bila kuzungumza naye. Tusipomkaribisha atatucheka.”

¹³Hivyo, Bagoa akamwacha Holoferne, akamwendea Yudithi na kumwambia, “Ee mwanamke mzuri! Jemadari anakualika hemani mwake ili kunywa divai pamoja nasi! Hivyo karibu ufurahie divai pamoja nasi kama mmoja wa wanawake Waashuru wanaohudumu kwenye ikulu ya Nebukadneza. Hii ni heshima kubwa sana kwako”.

¹⁴Yudithi akamwambia, “Mimi ni nani kumkatalia bwana wangu? Nitafanya mara lolote analotaka, nalo litakuwa la kujivunia mpaka siku ya kufa kwangu.”

¹⁵Hivyo, Yudithi akainuka, akavalia mavazi na mapambo yake ya urembo. Mjakazi wake akamtangulia na kuweka mbele ya Holoferne ngozi za mbuzi alizopewa Yudithi na Bagoa ili kukalia anapokula.

¹⁶Yudithi akaingia hemani, akaketi. Holoferne alipomwona Yudithi, moyo ulimdunda kwa shauku kubwa ya kulala naye. (Tangu siku ile ya kwanza, alipomwona Yudithi, Holoferne alikuwa akitafuta nafasi ya kumtongoza.)

¹⁷Holoferne akamwambia Yudithi, “Kunywa, ufurahi pamoja nasi.”

¹⁸Yudithi akamjibu, “Bwana wangu, leo nitakunywa kwani leo ni siku ya maana sana maishani mwangu.”

¹⁹Halafu, mbele yake, alikula na kunywa kile kilichoandaliwa na mjakazi wake.

²⁰Holoferne alitekwa na uzuri wa Yudithi, akanywa divai nyingi zaidi ya vile alivyowahi kunywa tangu kuzaliwa kwake.