Read Swahilli Kutoka 25 Bible Online

Kutoka 25 - Swahilli bible

Kutoka 25

¹Mwenyezi-Mungu akamwambia Mose,

²“Waambie Waisraeli wanipe michango ya matoleo, nawe upokee kwa niaba yangu. Utapokea kutoka kwa mtu yeyote atakayetoa kwa moyo mkunjufu.

³Utapokea matoleo yafuatayo: Dhahabu, fedha, shaba,

⁴sufu ya buluu, ya zambarau na nyekundu, kitani safi iliyosokotwa manyoya ya mbuzi;

⁵ngozi za kondoo dume zilizotiwa rangi nyekundu, ngozi za mbuzi, mbao za mjohoro,

⁶mafuta kwa ajili ya taa, viungo kwa ajili ya mafuta ya kuweka wakfu na kwa ajili ya ubani wenye harufu nzuri,

⁷vito vya sardoniki, na vito vingine kwa ajili ya mapambo ya kizibao cha kuhani[35] na kifuko cha kifuani.[36]

⁸Vilevile Waisraeli watanitengenezea hema takatifu, ili niweze kukaa kati yao.

⁹Utatengeneza hema hiyo na vifaa vyake kulingana na mfano nitakaokuonesha.

¹⁰“Waisraeli watengeneze sanduku la mbao za mjohoro, lenye urefu wa sentimita 110, upana sentimita 66, na kimo sentimita 66.

¹¹Utalipaka sanduku hilo dhahabu safi ndani na nje, na kulifanyia ukingo wa dhahabu pande zote.

¹²Kisha utalitengenezea pete nne na kuzitia miguuni pake, kila mguu pete moja.

¹³Utatengeneza mipiko ya mjohoro na kuipaka dhahabu.

¹⁴Mipiko hiyo utaipitisha katika pete zilizo pande mbili za sanduku, kwa ajili ya kulibebea.

¹⁵Mipiko hiyo itabaki daima katika pete; isitolewe wakati wowote.

¹⁶Ndani ya sanduku hilo utaweka vibao viwili vya mawe vya ushuhuda.

¹⁷“Kisha utatengeneza kwa dhahabu safi kiti cha rehema,[37] urefu wake sentimita 110, na upana wake sentimita 66.

¹⁸Utatengeneza pia mfano wa viumbe hai viwili kwa kufua dhahabu, uviweke kwenye miisho miwili ya kiti hicho;

¹⁹kiumbe kimoja mwisho mmoja na kiumbe kingine mwisho mwingine. Viweke viumbe hivyo kwenye miisho ya kiti hicho, lakini viwe kitu kimoja na hicho kiti.

²⁰Viumbe hivyo vitaelekeana, mabawa yake yamekunjuka kukifunika kiti cha rehema; nyuso zake zitaelekea kiti hicho.

²¹Ndani ya sanduku utaweka vibao viwili vya mawe na kukiweka kiti cha rehema juu yake.

²²Mimi nitakutana nawe hapo; na kutoka juu ya kiti hicho cha rehema katikati ya viumbe hao walioko juu ya sanduku la ushuhuda, nitazungumza nawe na kukupa amri zote kwa ajili ya Waisraeli.

²³“Utatengeneza meza ya mbao za mjohoro yenye urefu wa sentimita 88, upana sentimita 44 na kimo sentimita 66.

²⁴Hiyo meza utaipaka dhahabu safi na kuizungushia utepe wa dhahabu.

²⁵Kisha utaizungushia ubao wenye upana wa sentimita 66.

²⁶Utaitengenezea pete nne za dhahabu na kuzitia kwenye pembe zake miguuni pake.

²⁷Pete hizo zitakuwa karibu na ule ubao wa kuizunguka meza na zitakuwa za kushikilia mipiko ya kuibebea hiyo meza.

²⁸Utatengeneza mipiko ya mjohoro na kuipaka dhahabu; mipiko itakuwa ya kuibebea hiyo meza.

²⁹Utatengeneza sahani na vikombe vya kuwekea ubani mezani, na pia bilauri na bakuli za kumiminia tambiko za kinywaji. Vifanye vyombo hivyo vyote kwa dhahabu safi.

³⁰ Meza hiyo utaiweka mbele ya sanduku la agano, na juu ya meza hiyo utaiweka ile mikate ya kuwekwa mbele yangu daima.

³¹“Utatengeneza kinara cha taa kwa dhahabu safi. Tako lake na ufito wa hicho kinara vitakuwa kitu kimoja, kadhalika na vikombe vyake, matumba yake na maua yake, vyote vitafuliwa kwa kipande kimoja tu cha dhahabu.

³²Matawi sita yatatokeza kila upande wa ufito wake, matawi matatu upande mmoja na matawi matatu upande mwingine.

³³Katika kila tawi kutakuwa na vikombe vitatu mfano wa maua ya mlozi, kila kimoja na tumba lake na ua lake.

³⁴Na katika ufito kutakuwa na vikombe vinne mfano wa maua ya mlozi, pamoja na vifundo vyake na maua yake.

³⁵Mahali panapotokezea kila jozi ya matawi yale sita, chini yake patakuwa na kifundo kimojakimoja.

³⁶Vifundo hivyo na matawi yake yatakuwa kitu kimoja na kinara hicho, na chote kitafuliwa kwa dhahabu safi.

³⁷Utatengeneza pia taa saba kwa ajili ya kinara hicho na kuziweka juu yake ili ziangaze kwa mbele.

³⁸Tengeneza pia koleo zake na visahani vyake kwa dhahabu safi.

³⁹Utatumia kilo thelathini na tano za dhahabu safi kutengeneza kinara hicho na vifaa vyake.

⁴⁰ Hakikisha kwamba umevitengeneza kwa mfano uliooneshwa kule mlimani.