Read Swahilli Yobu 16 Bible Online

Yobu 16 - Swahilli bible

Yobu 16

¹Hapo Yobu akajibu:

²“Mambo kama hayo nimeyasikia mengi; nyinyi ni wafariji duni kabisa!

³Mwisho wa maneno haya matupu ni lini? Au ni kitu gani kinachowachochea kujibu?

⁴Kama nyinyi mngekuwa mimi, na mimi nyinyi, ningeweza kusema kama nyinyi ningeweza kubuni maneno dhidi yenu, na kutikisa kichwa changu.

⁵Ningeweza kuwatia moyo kwa maneno yangu, na maneno yangu ya faraja yangewatuliza.

⁶“Lakini nikisema maumivu yangu hayatulii, na nikikaa kimya hayaondoki.

⁷Kweli Mungu amenichakaza[19] ameharibu kila kitu karibu nami.

⁸Amenifanya ninyauke, na huo ni ushindi dhidi yangu. Kukonda kwangu kumenikabili na kushuhudia dhidi yangu.

⁹Amenirarua kwa hasira na kunichukia; amenisagia meno; na adui yangu ananikodolea macho.

¹⁰Watu wananidhihaki na kunicheka; makundi kwa makundi hunizunguka, na kunipiga makofi mashavuni.

¹¹Mungu amenitia mikononi mwa wajeuri, na kunitupa mikononi mwa waovu.

¹²Nilikuwa nimestarehe, lakini akanivunjavunja, alinikaba shingo na kunipasua vipandevipande; alinifanya shabaha ya mishale yake,

¹³akanipiga mishale kutoka kila upande. Amenipasua figo bila huruma, na nyongo yangu akaimwaga chini.

¹⁴Hunivunja na kunipiga tena na tena; hunishambulia kama askari.

¹⁵“Nimejishonea mavazi ya gunia, fahari yangu nimeibwaga mavumbini.

¹⁶Uso wangu ni mwekundu kwa kulia, kope zangu zimekuwa nyeusi ti;

¹⁷ingawa sijafanya dhuluma kwa mkono wangu, na sala zangu kwa Mungu ni safi.

¹⁸“Ewe dunia, usiifunike damu yangu iliyomwagika; kilio changu kienee kila mahali.

¹⁹ Nina hakika ninaye shahidi wangu mbinguni, mwenye kunitetea yuko huko juu.

²⁰Rafiki zangu wanidharau; nabubujika machozi kumwomba Mungu.

²¹Laiti mtu angenitetea mbele ya Mungu, kama ifanyikavyo duniani kati za watu wawili.

²²Naam, miaka yangu ni michache, nami nitakwenda huko ambako sitarudi.