Read Swahilli Yobu 39 Bible Online

Yobu 39 - Swahilli bible

Yobu 39

¹“Je, wajua mbuzi wa milimani huzaa lini, au umewahi kuona kulungu akizaa?

²Je, wajua huchukua mimba kwa muda gani, au siku yenyewe ya kuzaa waijua?

³“Wajua wakati watakapochuchumaa kuzaa, wakati wa kuzaa watoto wao?

⁴Watoto wao hupata nguvu, hukua hukohuko porini, kisha huwaacha mama zao na kwenda zao.

⁵“Nani aliyemwacha huru pundamwitu? Nani aliyewaacha waende kwa kuwafungua?

⁶Mimi niliwapa jangwa liwe makao yao, mbuga zenye chumvi kuwa makazi yao.

⁷Hujitenga kabisa na makelele ya miji, hasikilizi kelele ya kumfanyisha kazi.

⁸Hutembeatembea milimani kupata malisho, na kutafuta chochote kilicho kibichi.

⁹“Je, nyati atakubali kukutumikia? Au je, atakubali kulala zizini mwako?

¹⁰Je, waweza kumfunga nyati kamba kulima shamba, au avute jembe la kulimia?

¹¹Je, utamtegemea kwa kuwa ana nguvu nyingi na kumwacha akufanyie kazi zako nzito?

¹²Je, wamtazamia nyati akuvunie mavuno yako, na kuleta nafaka mahali pa kupuria?

¹³“Mbuni hupigapiga mabawa yake kwa madaha, lakini hawezi kuruka kama korongo.[39]

¹⁴Mbuni huyaacha mayai yake juu ya ardhi ili yapate joto mchangani;

¹⁵lakini hajui kama yanaweza kukanyagwa, au kuvunjwa na mnyama wa porini.

¹⁶Mbuni huwatendea wanawe ukatili kama si wake, hata kazi yake ikiharibika yeye hana wasiwasi;

¹⁷kwa sababu nilimfanya asahau hekima yake, wala sikumpa sehemu yoyote ya akili.

¹⁸Lakini akianza kukimbia, humcheka hata farasi na mpandafarasi.

¹⁹“Je, Yobu, ndiwe uliyewapa farasi nguvu, ukawavika shingoni manyoya marefu?

²⁰Je, ni wewe unayemfanya farasi aruke kama nzige? Mlio wake wa maringo ni wa ajabu!

²¹Huparapara ardhi mabondeni kwa pupa; hukimbilia kwenye mapigano kwa nguvu zake zote.

²²Farasi huicheka hofu, na hatishiki; wala upanga hauwezi kumrudisha nyuma.

²³Silaha wachukuazo wapandafarasi, hugongana kwa sauti na kungaa juani.

²⁴Farasi husonga mbele, akitetemeka kwa hasira; tarumbeta iliapo, yeye hasimami.

²⁵Kila ipigwapo tarumbeta, yeye hutoa sauti; huisikia harufu ya vita toka mbali, huusikia mshindo wa makamanda wakitoa amri kwa makelele.

²⁶“Je, mwewe amejifunza kwako jinsi ya kuruka, na kunyosha mabawa yake kuelekea kusini?

²⁷Je, tai hupaa juu kwa amri yako, na kuweka kiota chake juu milimani?

²⁸Tai hufanya makazi yake juu ya miamba mirefu, na ncha kali za majabali ndizo ngome zake.

²⁹Kutoka huko huotea mawindo, macho yake huyaona kutoka mbali.

³⁰ Makinda yake hufyonza damu; pale ulipo mzoga ndipo alipo tai.”