Read Swahilli Yobu 4 Bible Online

Yobu 4 - Swahilli bible

Yobu 4

¹Kisha Elifazi yule Mtemani akamjibu Yobu:

²“Je, mtu akijaribu kukuambia neno utakasirika? Lakini nani awezaye kujizuia kusema?

³Sikiliza! Wewe umewafundisha wengi, na kuiimarisha mikono ya wanyonge.

⁴Maneno yako yamewainua waliokufa moyo, umewaimarisha waliokosa nguvu.

⁵Lakini sasa yamekupata, nawe ukakosa subira, yamekugusa, nawe ukafadhaika.

⁶Je, kumcha Mungu si ndilo tegemeo lako? Na unyofu wako si ndilo tumaini lako?

⁷Fikiri sasa: Nani asiye na hatia ambaye amepata kuangamia? Au, je, waadilifu wamepata kutupwa?

⁸Nijuavyo mimi, wapandao uovu na ubaya huvuna hayohayo,

⁹Mungu huwaangamiza hao kwa pumzi yake, hao huteketezwa kwa pigo la hasira yake.

¹⁰Waovu hunguruma kama simba mkali, lakini meno yao huvunjwa.

¹¹Simba mwenye nguvu hufa kwa kukosa mawindo, na watoto wa simba jike hutawanywa!

¹²“Siku moja, niliambiwa neno kwa siri, sikio langu lilisikia mnongono wake.

¹³ Nikiwa katika mawazo ya njozi za usiku, wakati usingizi mzito huwashika watu,

¹⁴nilishikwa na hofu na kutetemeka, mifupa yangu yote ikagonganagongana.

¹⁵Upepo ukapita mbele ya uso wangu, nywele za mwilini mwangu zikajisimamisha.

¹⁶Kitu kilisimama tuli mbele yangu, nilipokitazama sikukitambua kabisa. Kulikuwa na umbo fulani mbele yangu; kulikuwa kimya, kisha nikasikia sauti.

¹⁷Binadamu afaye aweza kuwa mwadilifu mbele ya[3] Mungu? Mtu aweza kuwa safi mbele ya Muumba wake?

¹⁸Hata watumishi wake, Mungu hana imani nao; na malaika wake huwaona wana kosa;

¹⁹sembuse binadamu viumbe vya udongo, watu ambao chanzo chao ni mavumbi, ambao waweza kupondwapondwa kama nondo!

²⁰Binadamu kwa masaa machache tu waweza kuangamia; huangamia milele bila kuacha hata alama yao!

²¹Iwapo uzi unaoshikilia uhai wao ukikatwa wao hufa tena bila kuwa na hekima.