Read Swahilli Zaburi 147 Bible Online

Zaburi 147 - Swahilli bible

Zaburi 147

¹Msifuni Mwenyezi-Mungu! Jinsi gani ilivyo vizuri kumwimbia sifa Mungu wetu! Yeye ni mwema na astahili kuimbiwa sifa.

²Mwenyezi-Mungu anajenga tena mji wa Yerusalemu; anawarudisha Waisraeli waliokuwa uhamishoni.

³Anawaponya waliovunjika moyo; na kuwatibu majeraha yao.

⁴Anaamua idadi itakayokuwako ya nyota, na kuzipa zote majina yao.

⁵Bwana wetu ni mkuu, ana nguvu nyingi; maarifa yake hayana kipimo.

⁶Mwenyezi-Mungu huwakweza wanyenyekevu, lakini huwatupa waovu mavumbini.

⁷Mwimbieni Mwenyezi-Mungu nyimbo za shukrani, mpigieni kinubi Mungu wetu!

⁸Yeye hulifunika anga kwa mawingu, huitengenezea nchi mvua, na kuchipusha nyasi vilimani.

⁹Huwapa wanyama chakula chao, na kuwalisha makinda ya kunguru yanapolia.

¹⁰Yeye hataki nguvu za farasi, wala hapendezwi na ushujaa wa askari;

¹¹lakini hupendezwa na watu wamchao, watu wanaotegemea fadhili zake.

¹²Umsifu Mwenyezi-Mungu, ee Yerusalemu! Umsifu Mungu wako, ee Siyoni!

¹³Maana yeye huimarisha milango yako, huwabariki watu waliomo ndani yako.

¹⁴Huweka amani mipakani mwako; hukushibisha kwa ngano safi kabisa.

¹⁵Yeye hupeleka amri yake duniani, na neno lake hufikia lengo lake haraka.

¹⁶Hutandaza theluji kama pamba, hutawanya umande kama majivu.

¹⁷Huleta mvua ya mawe kama kokoto na kwa ubaridi wake maji huganda.

¹⁸Kisha hutoa amri, maji hayo yakayeyuka; huvumisha upepo wake, nayo yakatiririka.

¹⁹Humjulisha Yakobo ujumbe wake, na Israeli masharti na maagizo yake.

²⁰Lakini hakuyatendea hivyo mataifa mengine; watu wengine hawayajui maagizo yake. Msifuni Mwenyezi-Mungu!